Дунё мусулмонлари сони қанча?

 

Ер юзида мусулмонлар сони ортиб бораётгани ҳақида оммавий ахборот воситаларида бот-бот айтиб ўтилади. Айниқса, Ғарб матбуоти бу тўғрида кўп ёзади. Хўш, ҳозир жаҳонда қанча мусулмон яшайди?

Маълумотларга кўра, дунё аҳолисининг бешдан бири (23,5 фоизи), яъни 1,6 милярддан ортиқ киши Ислом динига эътиқод қилади. Ислом дини эргашувчилари сонига кўра, насронийликдан сўнг дунёда иккинчи ўриндадир. Йигирма саккиз мамлакатда Ислом давлат дини ёки расмий дин мақомига эга.

Сўнгги эллик йил ичида Ер юзидаги мусулмонларнинг сони 235 фоизга ўсган. XX асрда Ислом дини эргашувчилари сони бўйича Франсия, Буюк Британия ва АҚШ каби мамлакатларда иккинчи ўринга чиқди. Илмий фаразларга кўра, 2030 йилга бориб, дунё аҳолисининг чорак қисми, яъни тўртдан бири ёки 26,4 фоизи мусулмонлардан иборат бўлади. Ғарб мамлакатларида мусулмонлар сони ортиши кутиляпти. Ислом динига эътиқод қилувчилар сони бўйича Покистон етакчига айланиши мумкин. Ҳозирги ўсиш бўйича ҳисобланса, яқин йигирма йил ичида муслимлар сони 2,2 милярд кишига етади.

Мусулмонлар дунёнинг 120 мамлакатида истиқомат қилади, 49 мамлакатда эса аҳолининг кўпчилик қисмини ташкил этади. Улар 60 га яқин тилда сўзлашади. Ислом динига эътиқод қилувчилар гаплашадиган тиллар орасида араб, бенгал, панжоб, яван, турк, урду, форс, пуштун, синдҳи ва кашмир тиллари етакчилик қилади.

Мусулмонларнинг асосий қисми – 85 фоизи суннийлик мазҳабида, қолган 15 фоизга яқин мусулмон шиалик тарафдори.

Йирик исломий муассаса – Ислом Ҳамкорлик Ташкилотига 57 давлат аъзо, уларнинг 49 таси мусулмон мамлакати, қолганлари мусулмон аҳолиси бор ўлкалардир.

 

 

* * *

 

Yer yuzida musulmonlar soni ortib borayotgani haqida ommaviy axborot vositalarida bot-bot aytib o‘tiladi. Ayniqsa, G‘arb matbuoti bu to‘g‘rida ko‘p yozadi. Xo‘sh, hozir jahonda qancha musulmon yashaydi?

Ma’lumotlarga ko‘ra, dunyo aholisining beshdan biri (23,5 foizi), ya’ni 1,6 milyarddan ortiq kishi Islom diniga e’tiqod qiladi. Islom dini ergashuvchilari soniga ko‘ra, nasroniylikdan so‘ng dunyoda ikkinchi o‘rindadir. Yigirma sakkiz mamlakatda Islom davlat dini yoki rasmiy din maqomiga ega.

So‘nggi ellik yil ichida Yer yuzidagi musulmonlarning soni 235 foizga o‘sgan. XX asrda Islom dini ergashuvchilari soni bo‘yicha Fransiya, Buyuk Britaniya va AQSh kabi mamlakatlarda ikkinchi o‘ringa chiqdi. Ilmiy farazlarga ko‘ra, 2030 yilga borib, dunyo aholisining chorak qismi, ya’ni to‘rtdan biri yoki 26,4 foizi musulmonlardan iborat bo‘ladi. G‘arb mamlakatlarida musulmonlar soni ortishi kutilyapti. Islom diniga e’tiqod qiluvchilar soni bo‘yicha Pokiston yetakchiga aylanishi mumkin. Hozirgi o‘sish bo‘yicha hisoblansa, yaqin yigirma yil ichida muslimlar soni 2,2 milyard kishiga yetadi.

Musulmonlar dunyoning 120 mamlakatida istiqomat qiladi, 49 mamlakatda esa aholining ko‘pchilik qismini tashkil etadi. Ular 60 ga yaqin tilda so‘zlashadi. Islom diniga e’tiqod qiluvchilar gaplashadigan tillar orasida arab, bengal, panjob, yavan, turk, urdu, fors, pushtun, sindhi va kashmir tillari yetakchilik qiladi.

Musulmonlarning asosiy qismi – 85 foizi sunniylik mazhabida, qolgan 15 foizga yaqin musulmon shialik tarafdori.

Yirik islomiy muassasa – Islom Hamkorlik Tashkilotiga 57 davlat a’zo, ularning 49 tasi musulmon mamlakati, qolganlari musulmon aholisi bor o‘lkalardir.