Зайнаб бинти Абу Салама

Рукн: Саҳобалар Чоп этилган: 26.06.2019

Тўлиқ исми: Зайнаб бинти Абу Салама Абдуллоҳ ибн Абдул Асад ибн Ҳилол ибн Амр ибн Махзум, Махзумия.

Расулуллоҳнинг (соллаллоҳу алайҳи ва саллам) тарбияларини олган (ўгай қизлари). Онаси:Умму Салама бинти Абу Умайя (розияллоҳу анҳо).

Ривоят қилинади: Ҳабашистонда туғилган. Расулуллоҳ (соллаллоҳу алайҳи ва саллам) хонадонларига келганида гўдак эди. Ибн Саъд (раҳимаҳуллоҳ) айтади: Асмо бинти Абу Бакр уни эмизган. Шунинг учун Зайнаб Зубайр ибн Аввом болаларининг холаси.

Асл исми Барра бинти Абу Салама ибн Абдул Асад бўлган. Расулуллоҳ (соллаллоҳу алайҳи ва саллам) исмини “Зайнаб” қўйганлар. Мадина аёлларининг фазилатлиси эди. Пайғамбаримиз (алайҳиссалом) уни яхши кўриб: “Зайнаб қаэрда? Зайнаб нима қилди?” деб чақирар эдилар.

Ҳадис ривоят қилиши: Пайғамбаримиздан (алайҳиссалом) 7 та ҳадис ривоят қилган. Шунингдек, Ойша ва Умму Ҳабибалардан (розияллоҳу анҳунна) ҳам ҳадис ривоят қилган. Зайнаб бинти Абу Саламадан (розияллоҳу анҳо) ўғли Абу Убайда ибн Абдуллоҳ ибн Замъа, Муҳаммад ибн Ато, Арок ибн Молик, Хумайд ибн Нофеъ, Урва ибн Зубайр, Абу Салама ибн Абдураҳмон, Зайнул Обидийн Али ибн Ҳусайн ва бошқалар (розияллоҳу анҳум) ҳадис ривоят қилишган.

Фазилати: Зайнаб бинти Абу Салама (розияллоҳу анҳо) холасининг ўғли саҳоба Абдуллоҳ ибн Замаъ ибн Асвадга (розияллоҳу анҳу) турмушга чиқди. Расулуллоҳнинг (соллаллоҳу алайҳи ва саллам) тарбияларини олгани сабаб кейинчалик Мадина аёлларининг фақиҳаси бўлиб етишди. Абу Рифоа Соиғ айтади: “Мадиналик фақиҳ аёлни эслайдиган бўлсам, Зайнаб бинти Абу Саламани эслардим. Зайнаб бинти Абу Салама бундай ҳикоя қилганди: “Бир куни Расулуллоҳ (соллаллоҳу алайҳи ва саллам) таҳорат олаётган эдилар. Онам: У зотнинг олдиларига кир, деб айтдилар. Кирганимда, Расулуллоҳ (соллаллоҳу алайҳи ва саллам) юзимга сув сачратиб: “Орқангга қайт”, деб айтдилар. Мен Зайнабни қариганида кўрдим. Юзига биронта ажин тушмаган эди” (Имом Табароний “Кабир” китобида келтирган).

Ҳижратнинг саксонинчи йиллари оламдан ўтди.

Ихтибор Қодирова | "Ҳидоят" журналидан

To‘liq ismi: Zaynab binti Abu Salama Abdulloh ibn Abdul Asad ibn Hilol ibn Amr ibn Maxzum, Maxzumiya.

Rasulullohning (sollallohu alayhi va sallam) tarbiyalarini olgan (o‘gay qizlari). Onasi:Ummu Salama binti Abu Umayya (roziyallohu anho).

Rivoyat qilinadi: Habashistonda tug‘ilgan. Rasululloh (sollallohu alayhi va sallam) xonadonlariga kelganida go‘dak edi. Ibn Sa’d (rahimahulloh) aytadi: Asmo binti Abu Bakr uni emizgan. Shuning uchun Zaynab Zubayr ibn Avvom bolalarining xolasi.

Asl ismi Barra binti Abu Salama ibn Abdul Asad bo‘lgan. Rasululloh (sollallohu alayhi va sallam) ismini “Zaynab” qo‘yganlar. Madina ayollarining fazilatlisi edi. Payg‘ambarimiz (alayhissalom) uni yaxshi ko‘rib: “Zaynab qaerda? Zaynab nima qildi?” deb chaqirar edilar.

Hadis rivoyat qilishi: Payg‘ambarimizdan (alayhissalom) 7 ta hadis rivoyat qilgan. Shuningdek, Oysha va Ummu Habibalardan (roziyallohu anhunna) ham hadis rivoyat qilgan. Zaynab binti Abu Salamadan (roziyallohu anho) o‘g‘li Abu Ubayda ibn Abdulloh ibn Zam’a, Muhammad ibn Ato, Arok ibn Molik, Xumayd ibn Nofe’, Urva ibn Zubayr, Abu Salama ibn Abdurahmon, Zaynul Obidiyn Ali ibn Husayn va boshqalar (roziyallohu anhum) hadis rivoyat qilishgan.

Fazilati: Zaynab binti Abu Salama (roziyallohu anho) xolasining o‘g‘li sahoba Abdulloh ibn Zama’ ibn Asvadga (roziyallohu anhu) turmushga chiqdi. Rasulullohning (sollallohu alayhi va sallam) tarbiyalarini olgani sabab keyinchalik Madina ayollarining faqihasi bo‘lib yetishdi. Abu Rifoa Soig‘ aytadi: “Madinalik faqih ayolni eslaydigan bo‘lsam, Zaynab binti Abu Salamani eslardim. Zaynab binti Abu Salama bunday hikoya qilgandi: “Bir kuni Rasululloh (sollallohu alayhi va sallam) tahorat olayotgan edilar. Onam: U zotning oldilariga kir, deb aytdilar. Kirganimda, Rasululloh (sollallohu alayhi va sallam) yuzimga suv sachratib: “Orqangga qayt”, deb aytdilar. Men Zaynabni qariganida ko‘rdim. Yuziga bironta ajin tushmagan edi” (Imom Tabaroniy “Kabir” kitobida keltirgan).

Hijratning saksoninchi yillari olamdan o‘tdi.

Ixtibor Qodirova | "Hidoyat" jurnalidan