Шоҳ Шужоънинг қизи

Рукн: Ибрат Чоп этилган: 05.09.2015

Шоҳ Шужоъ Кирмонийнинг бир қизи бўлиб, Кирмон волийлари унга талабгор эди. Шоҳ Шужоъ улардан уч кун муҳлат сўради ва бу вақт ичида масжидларни кезиб юрди. Бир масжидда намозини чиройли ўқиётган ёш йигитни кўрди. Ибодати тугагунича уни кузатди. Кейин ёнига бориб уйланган ёки уйланмаганини сўради. Йигит уйланмаганини айтди.

– Қуръони карим ўқийдиган, тақводор, гўзал қиз билан оила қуришни истайсанми? – яна сўради Шоҳ Шужоъ.

– Менга ким ҳам қиз берарди? – деди йигит. – Ёнимдаги уч дирҳамдан бошқа ҳеч нарсам йўқ...

– Мен бераман. Уч кумушнинг бирига нон, бирига қатиқ, яна бирига хўшбўйлик сотиб ол.

Шундай қилиб Шоҳ Шужоъ қизини бояги йигитга турмушга берди. Қиз фақир куёвнинг уйига кирганида нон бўлагини кўрди ва сўради:

– Бу нима?

– Сенинг насибанг, эртага эрталаб ейишинг учун олиб қўйгандим.

Келинчак уйига кетишга чоғланди. Буни кўрган йигит:

– Э-воҳ, – деди. – Шоҳ Шужоъдай одамнинг қизи мен билан яшолмаслигига кўзим етганди.

Қиз буни эшитиб айтди:

– Мен сенинг фақирлигинг сабабли эмас, имонинг заифлиги учун кетяпман. Сен оқшомда туриб, эрталабки таомингни ғамини қиляпсан. Мен эса отамнинг ишига ҳайрон бўляпман. У доим сени ҳаромдан сақланган, дунё­га муҳаббат қўймаган кишига бераман, дерди. Аммо мени Раббига эътимод қилмаган, қалбида ҳаловати йўқ одамга берибди...

Бу гаплардан таъсирланган йигит нонни олиб чиқиб бир фақирга берди, шундан кейингина қиз кетиш ниятидан қайтди.

Машраббону Неъматова тайёрлади.

“Ирфон” тақвимининг 2012 йил 4-сонидан олинди.

* * *

Shoh Shujo’ Kirmoniyning bir qizi bo‘lib, Kirmon voliylari unga talabgor edi. Shoh Shujo’ ulardan uch kun muhlat so‘radi va bu vaqt ichida masjidlarni kezib yurdi. Bir masjidda namozini chiroyli o‘qiyotgan yosh yigitni ko‘rdi. Ibodati tugagunicha uni kuzatdi. Keyin yoniga borib uylangan yoki uylanmaganini so‘radi. Yigit uylanmaganini aytdi.

– Qur’oni karim o‘qiydigan, taqvodor, go‘zal qiz bilan oila qurishni istaysanmi? – yana so‘radi Shoh Shujo’.

– Menga kim ham qiz berardi? – dedi yigit. – Yonimdagi uch dirhamdan boshqa hech narsam yo‘q...

– Men beraman. Uch kumushning biriga non, biriga qatiq, yana biriga xo‘shbo‘ylik sotib ol.

Shunday qilib Shoh Shujo’ qizini boyagi yigitga turmushga berdi. Qiz faqir kuyovning uyiga kirganida non bo‘lagini ko‘rdi va so‘radi:

– Bu nima?

– Sening nasibang, ertaga ertalab yeyishing uchun olib qo‘ygandim.

Kelinchak uyiga ketishga chog‘landi. Buni ko‘rgan yigit:

– E-voh, – dedi. – Shoh Shujo’day odamning qizi men bilan yasholmasligiga ko‘zim yetgandi.

Qiz buni eshitib aytdi:

– Men sening faqirliging sababli emas, imoning zaifligi uchun ketyapman. Sen oqshomda turib, ertalabki taomingni g‘amini qilyapsan. Men esa otamning ishiga hayron bo‘lyapman. U doim seni haromdan saqlangan, dunyo­ga muhabbat qo‘ymagan kishiga beraman, derdi. Ammo meni Rabbiga e’timod qilmagan, qalbida halovati yo‘q odamga beribdi...

Bu gaplardan ta’sirlangan yigit nonni olib chiqib bir faqirga berdi, shundan keyingina qiz ketish niyatidan qaytdi.

Mashrabbonu Ne’matova tayyorladi.

“Irfon” taqvimining 2012 yil 4-sonidan olindi.