Бир қултум сув қадри

Рукн: Ибрат Чоп этилган: 29.08.2015

Кунларнинг бирида машҳур ҳукмдор Ҳорун ар-Рашид сафарга чиқди. Ёнида ходимларидан Ибн Саммок бор эди. Йўлда жуда чанқаган ҳукмдор сув сўради. «Худо ҳаққи, бироз сабр қилинг», деди Ибн Саммок. Кейин кўзада сув узата туриб қайтиб олди ва: «Фараз қилинг, ушбу сувдан ман қилиндингиз, уни ичиш учун нимангизни берардингиз?» деб сўради.

– Бор мулкимнинг ярмини берган бўлардим.

Ҳукмдорнинг ташналиги қонганидан кейин ходим яна сўради:

– Мана, сувни ҳам ичдингиз. Энди Расулуллоҳ (с.а.в)га яқинлигингиз ҳурмати, айтинг, ўша сув вужудингиздан қайтиб чиқмади (яъни, пешобингиз тутилиб қолди) дейлик, унда нима қилардингиз?

– Мулкимнинг қолган ярмини берардим.

Шунда Ибн Саммок асл мақсадини сўзлади: «Бир қултум сув ва уни чиқариб ташлашга ҳам арзимайдиган мол-мулк учун ўзини таҳликага отиш, талашиб-тортишиш, унга эга бўлиб қувониш ақлли одамга ярашмайди». Бу сўзлардан Ҳорун ар-Рашид қаттиқ таъсирланди ва йиғлади.

Моҳидил Фахриддинҳожи қизи тайёрлади.

“Ирфон” тақвимининг 2012 йил 3-сонидан олинди.

* * *

Kunlarning birida mashhur hukmdor Horun ar-Rashid safarga chiqdi. Yonida xodimlaridan Ibn Sammok bor edi. Yo‘lda juda chanqagan hukmdor suv so‘radi. «Xudo haqqi, biroz sabr qiling», dedi Ibn Sammok. Keyin ko‘zada suv uzata turib qaytib oldi va: «Faraz qiling, ushbu suvdan man qilindingiz, uni ichish uchun nimangizni berardingiz?» deb so‘radi.

– Bor mulkimning yarmini bergan bo‘lardim.

Hukmdorning tashnaligi qonganidan keyin xodim yana so‘radi:

– Mana, suvni ham ichdingiz. Endi Rasululloh (s.a.v)ga yaqinligingiz hurmati, ayting, o‘sha suv vujudingizdan qaytib chiqmadi (ya’ni, peshobingiz tutilib qoldi) deylik, unda nima qilardingiz?

– Mulkimning qolgan yarmini berardim.

Shunda Ibn Sammok asl maqsadini so‘zladi: «Bir qultum suv va uni chiqarib tashlashga ham arzimaydigan mol-mulk uchun o‘zini tahlikaga otish, talashib-tortishish, unga ega bo‘lib quvonish aqlli odamga yarashmaydi». Bu so‘zlardan Horun ar-Rashid qattiq ta’sirlandi va yig‘ladi.

Mohidil Faxriddinhoji qizi tayyorladi.

“Irfon” taqvimining 2012 yil 3-sonidan olindi.