Қалблари дунёдан холи эди

Имом Аъзам тижорат билан шуғулланганлари, жуда бадавлат инсон бўлганликлари маълум. Бу улуғ зот пешингача талабаларга дарс берар, пешиндан кейин эса тижорий ишлар билан машғул бўлардилар. Бир куни дарс пайтида масжид эшигидан кимдир овоз берди:

– Ҳазрат, кемангиз чўкиб кетибди (у зотнинг мол ташийдиган кемалари ҳам бўлган)!

Имом Аъзам бир онлик тараддуддан кейин:

– Алҳамдулиллаҳ, – дедилар.

Бир оздан кейин яна бояги одам янги хабар келтирди:

– Адашибмиз, ҳазрат, чўккан кема бошқасиники экан.

Имом Аъзам бунга ҳам боягидек жавоб бердилар. Хабар келтирган одам ҳайратда қолди:

– Ҳазрат, кемангиз чўкканини айтдик, «Алҳамдулиллаҳ», дедингиз. Чўккан кема сизники эмаслигини эшитиб ҳам, шу жавобни бердингиз. Сабаби нима?

Имом Аъзам изоҳ бердилар:

– Кемамнинг чўкиб кетганини эшитганимда қалбимга назар ташладим. Дунё молини йўқотиш сабабли озгина бўлса ҳам қайғуни кўрмадим. Бунинг учун Аллоҳ таолога ҳамд айтдим. Чўккан кема меники эмаслигини билганимда ҳам шундай қилдим; дунё молини қўлга киритиш сабабли заррача қувонч йўқ эди. Бу сафар қалбимни дунё матосига ҳирс қўйишдан муҳофаза қилгани учун Аллоҳ таолога ҳамд келтирдим, шукр айтдим.

“Ирфон” тақвимининг 2012 йил 2-сонидан олинди.

* * *

Imom A’zam tijorat bilan shug‘ullanganlari, juda badavlat inson bo‘lganliklari ma’lum. Bu ulug‘ zot peshingacha talabalarga dars berar, peshindan keyin esa tijoriy ishlar bilan mashg‘ul bo‘lardilar. Bir kuni dars paytida masjid eshigidan kimdir ovoz berdi:

– Hazrat, kemangiz cho‘kib ketibdi (u zotning mol tashiydigan kemalari ham bo‘lgan)!

Imom A’zam bir onlik taradduddan keyin:

– Alhamdulillah, – dedilar.

Bir ozdan keyin yana boyagi odam yangi xabar keltirdi:

– Adashibmiz, hazrat, cho‘kkan kema boshqasiniki ekan.

Imom A’zam bunga ham boyagidek javob berdilar. Xabar keltirgan odam hayratda qoldi:

– Hazrat, kemangiz cho‘kkanini aytdik, «Alhamdulillah», dedingiz. Cho‘kkan kema sizniki emasligini eshitib ham, shu javobni berdingiz. Sababi nima?

Imom A’zam izoh berdilar:

– Kemamning cho‘kib ketganini eshitganimda qalbimga nazar tashladim. Dunyo molini yo‘qotish sababli ozgina bo‘lsa ham qayg‘uni ko‘rmadim. Buning uchun Alloh taologa hamd aytdim. Cho‘kkan kema meniki emasligini bilganimda ham shunday qildim; dunyo molini qo‘lga kiritish sababli zarracha quvonch yo‘q edi. Bu safar qalbimni dunyo matosiga hirs qo‘yishdan muhofaza qilgani uchun Alloh taologa hamd keltirdim, shukr aytdim.

“Irfon” taqvimining 2012 yil 2-sonidan olindi.

• Олдинги
• Кейинги