Умид ниҳоли

Рукн: Ибрат Чоп этилган: 30.03.2015

Икки ёш севишиб оила қуришди. Бироқ ҳеч қанча вақт ўтмай билишдики, турмуш улар ўйлаганларидек енгил, бир текис кечмас экан. Эр-хотин бир-бирини севишса-да, арзимаган нарсалар устида тортишиб қолишар, ҳатто жанжаллашиб кетишарди. Бу ҳол тобора одат тусини ола бошлади.

Бир куни икковлари ўтириб, муносабатларини кўздан кечиришга қарор қилишди. Тан олиш керакки, уларнинг иккови ҳам ажрашишни хоҳламас, лекин бу аҳволда яшаш ҳам тўғри келмасди. Ўйга толган эр ниҳоят мулоҳазасини шундай баён қилди: “Кел, бундай қиламиз. Боғчамизга кўчат экамиз, агар у уч ой ичида кўкариб кетса, муносабатларимизни қайта кўриб чиқамиз. Мабодо, ниҳол қуриб қолса, унда... ажрашамиз. Бу муддат ичида алоҳида хоналарда яшаб турамиз”.

Эрининг таклифи аёлга ҳам маъқул келди. Эртасига улар бозордан бир мевали дарахт кўчатини олиб келиб, боғчаларига ўтқазишди. Орадан бир ой ўтди. Қоронғу кечаларнинг бирида эр-хотин боғчада бир-бирларига рўбарў келиб қолишди – иккисининг ҳам қўлида сув тўлдирилган идиш бор эди...

“Ирфон” тақвимининг 2009 йил, 4-сонидан олинди.

* * *

Ikki yosh sevishib oila qurishdi. Biroq hech qancha vaqt o‘tmay bilishdiki, turmush ular o‘ylaganlaridek yengil, bir tekis kechmas ekan. Er-xotin bir-birini sevishsa-da, arzimagan narsalar ustida tortishib qolishar, hatto janjallashib ketishardi. Bu hol tobora odat tusini ola boshladi.

Bir kuni ikkovlari o‘tirib, munosabatlarini ko‘zdan kechirishga qaror qilishdi. Tan olish kerakki, ularning ikkovi ham ajrashishni xohlamas, lekin bu ahvolda yashash ham to‘g‘ri kelmasdi. O‘yga tolgan er nihoyat mulohazasini shunday bayon qildi: “Kel, bunday qilamiz. Bog‘chamizga ko‘chat ekamiz, agar u uch oy ichida ko‘karib ketsa, munosabatlarimizni qayta ko‘rib chiqamiz. Mabodo, nihol qurib qolsa, unda... ajrashamiz. Bu muddat ichida alohida xonalarda yashab turamiz”.

Erining taklifi ayolga ham ma’qul keldi. Ertasiga ular bozordan bir mevali daraxt ko‘chatini olib kelib, bog‘chalariga o‘tqazishdi. Oradan bir oy o‘tdi. Qorong‘u kechalarning birida er-xotin bog‘chada bir-birlariga ro‘baro‘ kelib qolishdi – ikkisining ham qo‘lida suv to‘ldirilgan idish bor edi...

“Irfon” taqvimining 2009 yil, 4-sonidan olindi.