Илтижонинг ижобати

Рукн: Ибрат Чоп этилган: 19.03.2015

Покистонлик Доктор Ишон Ҳусайний кўрсатган хизматлари учун халқаро тақдирлаш маросимига кетаётган эди. Самолётга чиқди. Об-ҳавонинг ёмонлиги туфайли самолётни яқин орадаги аэропортга қўндиришга мажбур бўлдилар. Кейинги самолёт эса 16 соатдан кейин учиши керак эди. У бундан жаҳли чиқиб, “Мажлисга албатта етиб боришим лозим, 16 соат кута олмайман”, дея бақирди. Аэропортда вазифасини бажараётган ишчилар унга кетаётган шаҳри бу ердан 6 соат узоқликда эканини, хоҳласа ижарага машина олиб, у ерга кетавериши мумкинлигини айтдилар.

Доктор шоша-пиша йўлга чиқди-ю, аммо аксига олиб йўлда ҳам шиддатли ёмғир қуя бошлади. Селнинг қаттиқлигидан йўлда ҳеч нарса кўринмас ва машина ҳам қимирлай олмайдиган ҳолга келди.

Доктор йўл юзидаги эски бир уйнинг эшигини тақиллатиб, ўзини ичкарига отди. Уйнинг ичида бир кекса аёл ўтирарди. Докторнинг ҳовлиқиб “Менга телефон беринг, бир жойга зудлик билан қўнғироқ қилишим лозим” деганини эшитиб, юзига табассум югурди ва шундай деди: “Кўрмаяпсанми ҳолимизни болам, бу ёқларда на телефон, на электр токи бор. Кир ичкарига, бир оз дамингни ол, овқатлан, чой ич, ундан кейин ишларингни ҳал қиларсан”.

Доктор чорасизликдан аёлнинг айтганларини қилди, бир оз исиниб, овқатланди. У чойини ичиб бўлгунча кекса аёл намозини ўқиб, узун-узун дуолар қилди. Буларни диққат билан кузатиб турган доктор, аёлнинг бир бешикни тебратаётганини ва бешикда бир гўдак ҳаракатсиз ётганини кўриб, “Онажон, бу кимнинг боласи, тинчликми, нима сабабдан кўз-ёшлар билан дуо қилдингиз?”, деб сўради. Кекса аёл эса “Бу менинг ҳам ота, ҳам онасидан етим қолган неварам, оғир ҳасталикка чалинди, бу атрофларда ҳеч қайси шифокор чора топа олмади. Ишон Ҳусайний деган бир доктор бормиш, фақатгина у бир чора топа олади деб айтишганди. Бироқ, у жуда ҳам узоқда бўлгани учун, жигарбандимнинг ишини осон қилсин дея бир неча кундан бери Аллоҳга илтижолар қиламан…”, деди.

Доктор Ҳусайний кўз ёшларини тўхтата олмай, “Ўрнингиздан туринг онажон, Аллоҳ дуоларингизни қабул қилди. Сизнинг дуоларингиз осмондан чақмоқ чақтириб учоқни ҳам ерга қўндирди, селлар оқизди ва ниҳоят мени сизга йўллади, доктор Ҳусайний менман онажон. Аллоҳ Ўз бандаларининг истакларини шундай ҳолда бажариб қўйишига иймоним комил бўлди. Бутун йўлларингиз тўсилиб қолган тақдирда ҳам, осмонлар-у ерни яратган Зотга сиғининг. Унинг марҳамати дуо биландир”, деди.

* * *

Pokistonlik Doktor Ishon Husayniy ko‘rsatgan xizmatlari uchun xalqaro taqdirlash marosimiga ketayotgan edi. Samolyotga chiqdi. Ob-havoning yomonligi tufayli samolyotni yaqin oradagi aeroportga qo‘ndirishga majbur bo‘ldilar. Keyingi samolyot esa 16 soatdan keyin uchishi kerak edi. U bundan jahli chiqib, “Majlisga albatta yetib borishim lozim, 16 soat kuta olmayman”, deya baqirdi. Aeroportda vazifasini bajarayotgan ishchilar unga ketayotgan shahri bu yerdan 6 soat uzoqlikda ekanini, xohlasa ijaraga mashina olib, u yerga ketaverishi mumkinligini aytdilar.

Doktor shosha-pisha yo‘lga chiqdi-yu, ammo aksiga olib yo‘lda ham shiddatli yomg‘ir quya boshladi. Selning qattiqligidan yo‘lda hech narsa ko‘rinmas va mashina ham qimirlay olmaydigan holga keldi.

Doktor yo‘l yuzidagi eski bir uyning eshigini taqillatib, o‘zini ichkariga otdi. Uyning ichida bir keksa ayol o‘tirardi. Doktorning hovliqib “Menga telefon bering, bir joyga zudlik bilan qo‘ng‘iroq qilishim lozim” deganini eshitib, yuziga tabassum yugurdi va shunday dedi: “Ko‘rmayapsanmi holimizni bolam, bu yoqlarda na telefon, na elektr toki bor. Kir ichkariga, bir oz damingni ol, ovqatlan, choy ich, undan keyin ishlaringni hal qilarsan”.

Doktor chorasizlikdan ayolning aytganlarini qildi, bir oz isinib, ovqatlandi. U choyini ichib bo‘lguncha keksa ayol namozini o‘qib, uzun-uzun duolar qildi. Bularni diqqat bilan kuzatib turgan doktor, ayolning bir beshikni tebratayotganini va beshikda bir go‘dak harakatsiz yotganini ko‘rib, “Onajon, bu kimning bolasi, tinchlikmi, nima sababdan ko‘z-yoshlar bilan duo qildingiz?”, deb so‘radi. Keksa ayol esa “Bu mening ham ota, ham onasidan yetim qolgan nevaram, og‘ir hastalikka chalindi, bu atroflarda hech qaysi shifokor chora topa olmadi. Ishon Husayniy degan bir doktor bormish, faqatgina u bir chora topa oladi deb aytishgandi. Biroq, u juda ham uzoqda bo‘lgani uchun, jigarbandimning ishini oson qilsin deya bir necha kundan beri Allohga iltijolar qilaman…”, dedi.

Doktor Husayniy ko‘z yoshlarini to‘xtata olmay, “O‘rningizdan turing onajon, Alloh duolaringizni qabul qildi. Sizning duolaringiz osmondan chaqmoq chaqtirib uchoqni ham yerga qo‘ndirdi, sellar oqizdi va nihoyat meni sizga yo‘lladi, doktor Husayniy menman onajon. Alloh O‘z bandalarining istaklarini shunday holda bajarib qo‘yishiga iymonim komil bo‘ldi. Butun yo‘llaringiz to‘silib qolgan taqdirda ham, osmonlar-u yerni yaratgan Zotga sig‘ining. Uning marhamati duo bilandir”, dedi.