Жаннатдаги иккинчи қаср кимники?

Рукн: Ибрат Чоп этилган: 31.05.2018

Рамазон Бутий роҳимаҳуллоҳ Шом ўлкасида бўлиб ўтган бир воқеани ҳикоя қилиб бергандилар.

Бир бадавлат киши масжид қуришга киришди ва барча савобни ўзи олиш мақсадида қурилиш ишларида ҳеч кимдан кўмак олмасликни қаттиқ тайинлади.

Кунларнинг бирида у туш кўрди. Аллоҳ унинг учун Жаннатда гўзал бир қаср тайёрлаб қўйган экан. Қизиғи, қаср ёнида худди шундай яна бир қаср бўлиб, бунисидан ҳеч қандай ками йўқ экан. “Бу ким учун?”, деб сўраганида, “масжид қуришда сен билан шерик бўлган киши учун”, деган жавоб келибди. Уйғониб кетиб қурилиш томон шошилибди.

Қурувчиларнинг каттасидан “қурилишга ким шерик бўлди?”, деб сўраган экан, шундай жавоб берибди: “Бир онахон бир дона ғишт кўтариб келди ва савобингизга шерик бўлишни истади. Биз “хўжайин бунга асло кўнмайди, у билиб қолса, ишимиз чатоқ бўлади”, деб айтдик. Шунда у: “хавотир олма, хўжайининг ҳозир менинг уйимда, ухлаб ётипти” деб айтди (яъни у сизнинг аёлингиз экан)”…

Усмон розияллоҳу анҳудан ривоят қилинади, Расулуллоҳ соллаллоҳу алайҳи ва салламнинг шундай деганларини эшитдим: “Ким Аллоҳ учун бир масжид қурса, Аллоҳ унинг учун Жаннатда бир уй бино қилади” (Бухорий ва Муслим ривояти).

Арабчадан Абдулбосит Нусратуллаев таржимаси

Ramazon Butiy rohimahulloh Shom o‘lkasida bo‘lib o‘tgan bir voqeani hikoya qilib bergandilar.

Bir badavlat kishi masjid qurishga kirishdi va barcha savobni o‘zi olish maqsadida qurilish ishlarida hech kimdan ko‘mak olmaslikni qattiq tayinladi.

Kunlarning birida u tush ko‘rdi. Alloh uning uchun Jannatda go‘zal bir qasr tayyorlab qo‘ygan ekan. Qizig‘i, qasr yonida xuddi shunday yana bir qasr bo‘lib, bunisidan hech qanday kami yo‘q ekan. “Bu kim uchun?”, deb so‘raganida, “masjid qurishda sen bilan sherik bo‘lgan kishi uchun”, degan javob kelibdi. Uyg‘onib ketib qurilish tomon shoshilibdi.

Quruvchilarning kattasidan “qurilishga kim sherik bo‘ldi?”, deb so‘ragan ekan, shunday javob beribdi: “Bir onaxon bir dona g‘isht ko‘tarib keldi va savobingizga sherik bo‘lishni istadi. Biz “xo‘jayin bunga aslo ko‘nmaydi, u bilib qolsa, ishimiz chatoq bo‘ladi”, deb aytdik. Shunda u: “xavotir olma, xo‘jayining hozir mening uyimda, uxlab yotipti” deb aytdi (ya’ni u sizning ayolingiz ekan)”…

Usmon roziyallohu anhudan rivoyat qilinadi, Rasululloh sollallohu alayhi va sallamning shunday deganlarini eshitdim: “Kim Alloh uchun bir masjid qursa, Alloh uning uchun Jannatda bir uy bino qiladi” (Buxoriy va Muslim rivoyati).

Arabchadan Abdulbosit Nusratullayev tarjimasi