Хунук қизга уйланиб пушаймон бўл(ма)ган йигит

Рукн: Ибрат Чоп этилган: 31.05.2018

Аввал иқтисодий аҳволи яхши эмасди, лекин кейин ўзини тиклаб олди. Отаси тақводор инсон бўлиб, имомлик қиларди. Иқтисодий аҳволи яхшилангач, отасига:

— Отажон энди уйланишни истайман. Шунча йил ўтди, энди оила қуриш вақти келди, бўлажак аёлимни ўзингиз топишингизни истайман, деди. Ҳаттоки куттирмай, никоҳлашингизни истайман. Тўйим, борган кунимда бўлсин. Топган келинингизни кўришим ҳам шарт эмас...

Бу аслида отасига бўлган ишончнинг бир кўриниши эди. Албатта тақводор бир мўмин, пайғамбаримиз алайҳиссаломнинг:

“Аёл тўрт нарса учун никоҳланади: моли учун, ҳасаби учун, чиройи учун ва дини учун. Бас, сен диндорини танла, қўлинг тупроққа қорилгур!”, деган ҳадисларига амал қилади. Отаси унга солиҳа, диндор бир қиз топди. Лекин қиз гўзал эмасди.

Йигит юртига қайтди. Уни Миср аэропортида кутиб олишиб, ёпинчиққа ўранган аёлининг ёнига олиб боришди. Хуллас хонада икки ёш ёлғиз қолдилар. Қиз ёпинчиғини олар-олмас, йигитнинг кайфияти тушиб кетади.

Отамнинг менга топган келини шуми? Шунча йилдан кейин катта ҳаяжон билан юртга қайтдим ва... Кўнглига чироқ ёқса ёришмасди. Келинга эътибор бермай ётиб ухлади. Куёвнинг бу ҳаракатидан гап нимада эканини тушунган келин кечанинг охирги учдан бир қисмида эрини уйғотишга ҳаракат қилди. Лекин эри уйғонишни рад этди. Келин қайта ҳаракат қилди, яна рад жавобини олди. Кейин уни уйғотиш учун эрининг юзига сув сепди. Эри уйғонди ва келин аста тушунтира кетди:

— Хаёлингиздан нималар ўтаётганини сезиб турибман, гўзал эмаслигимни биламан. Лекин шуни билишингизни истардимки, оила қуришни фақат бир сабабдан истадим. Пайғамбаримиз алайҳис саломнинг бир ҳадисларни амалда кўришни истадим. У зот шундай деганлар:

"Кечаси намоз ўқиган, аёлини ҳам намоз ўқишга уйғотган, агар бош тортса, юзига сув сепган кишига Аллоҳнинг раҳмати бўлсин. Кечаси туриб намоз ўқиган, эрини ҳам намоз ўқиш учун уйғотган, агар уйғонмаса, юзига сув сепган аёлга (ҳам) Аллоҳнинг раҳмати бўлсин!". Валлоҳи, бу тилагимни амалга оширганингиз учун сиздан жуда миннатдорман. Бу ҳадисни бажаришни жуда истардим, лекин гўзал эмаслигимни билганим учун, турмушга чиқишдан умидимни узгандим. Илтимос, ҳадисни қолган қисмини мен билан адо этсангиз! Куёв уйғонди, намозни бирга ўқидилар.

Намоз тугагач куёв келинга қараркан ҳайратдан карахт бўлиб қолди. Ўзи бу ҳақида шундай дейди:

— Намозни тугатиб, аёлимга қарар эканман, олдинроқ кўрганим, хунуккина аёл шу эканига ишонмасдим. Қасам ичиб айтаманки, худди ёнимда дунёнинг энг гўзал аёли турарди.

Туркчадан Марям Осиё таржимаси

Avval iqtisodiy ahvoli yaxshi emasdi, lekin keyin o‘zini tiklab oldi. Otasi taqvodor inson bo‘lib, imomlik qilardi. Iqtisodiy ahvoli yaxshilangach, otasiga:

— Otajon endi uylanishni istayman. Shuncha yil o‘tdi, endi oila qurish vaqti keldi, bo‘lajak ayolimni o‘zingiz topishingizni istayman, dedi. Hattoki kuttirmay, nikohlashingizni istayman. To‘yim, borgan kunimda bo‘lsin. Topgan keliningizni ko‘rishim ham shart emas...

Bu aslida otasiga bo‘lgan ishonchning bir ko‘rinishi edi. Albatta taqvodor bir mo‘min, payg‘ambarimiz alayhissalomning:

“Ayol to‘rt narsa uchun nikohlanadi: moli uchun, hasabi uchun, chiroyi uchun va dini uchun. Bas, sen dindorini tanla, qo‘ling tuproqqa qorilgur!”, degan hadislariga amal qiladi. Otasi unga soliha, dindor bir qiz topdi. Lekin qiz go‘zal emasdi.

Yigit yurtiga qaytdi. Uni Misr aeroportida kutib olishib, yopinchiqqa o‘rangan ayolining yoniga olib borishdi. Xullas xonada ikki yosh yolg‘iz qoldilar. Qiz yopinchig‘ini olar-olmas, yigitning kayfiyati tushib ketadi.

Otamning menga topgan kelini shumi? Shuncha yildan keyin katta hayajon bilan yurtga qaytdim va... Ko‘ngliga chiroq yoqsa yorishmasdi. Kelinga e’tibor bermay yotib uxladi. Kuyovning bu harakatidan gap nimada ekanini tushungan kelin kechaning oxirgi uchdan bir qismida erini uyg‘otishga harakat qildi. Lekin eri uyg‘onishni rad etdi. Kelin qayta harakat qildi, yana rad javobini oldi. Keyin uni uyg‘otish uchun erining yuziga suv sepdi. Eri uyg‘ondi va kelin asta tushuntira ketdi:

— Xayolingizdan nimalar o‘tayotganini sezib turibman, go‘zal emasligimni bilaman. Lekin shuni bilishingizni istardimki, oila qurishni faqat bir sababdan istadim. Payg‘ambarimiz alayhis salomning bir hadislarni amalda ko‘rishni istadim. U zot shunday deganlar:

"Kechasi namoz o‘qigan, ayolini ham namoz o‘qishga uyg‘otgan, agar bosh tortsa, yuziga suv sepgan kishiga Allohning rahmati bo‘lsin. Kechasi turib namoz o‘qigan, erini ham namoz o‘qish uchun uyg‘otgan, agar uyg‘onmasa, yuziga suv sepgan ayolga (ham) Allohning rahmati bo‘lsin!". Vallohi, bu tilagimni amalga oshirganingiz uchun sizdan juda minnatdorman. Bu hadisni bajarishni juda istardim, lekin go‘zal emasligimni bilganim uchun, turmushga chiqishdan umidimni uzgandim. Iltimos, hadisni qolgan qismini men bilan ado etsangiz! Kuyov uyg‘ondi, namozni birga o‘qidilar.

Namoz tugagach kuyov kelinga qararkan hayratdan karaxt bo‘lib qoldi. O‘zi bu haqida shunday deydi:

— Namozni tugatib, ayolimga qarar ekanman, oldinroq ko‘rganim, xunukkina ayol shu ekaniga ishonmasdim. Qasam ichib aytamanki, xuddi yonimda dunyoning eng go‘zal ayoli turardi.

Turkchadan Maryam Osiyo tarjimasi