Туркиянинг Шонлиурфа вилоятидаги ўзбеклар ифторлик уюштирмоқдалар

Туркиянинг Шонлиурфа вилояти Жейланпинар ноҳиясида яшовчи ўзбеклар ҳар куни ифторлик дастурхонида йиғилмоқдалар. Шонлиурфалик ўзбек Муҳаммад Амин Қаҳрамоннинг айтишича, Эврен паша қишлоғида ҳар куни 200 кишилик ифторлик дастурхони уюштирилмоқда. Бир кун ош, бир кун шўрва ва бошқа ўзбекона таомлар ифторлик дастурхонини безамоқда. Ифторликдан сўнг хуфтон ва таровиҳ намозлари адо этилмоқда.

Ҳозирда Туркиянинг Шонлиурфа вилоятида 2000, Хатай вилоятида 10000, Анқарада 3000 нафар ўзбеклар истиқомат қилади. Улар 20-30-йилларда Ўзбекистондан Афғонистонга кўчиб кетган ватандошларимизнинг авлодларидир. Ўтган асрнинг 80-йилларида Афғонистондаги ўзбекларнинг баъзилари Туркияга кўчишган эди. Улар ана шу ҳудудларда ерлашишган.

Муҳаммад Амин Қаҳрамон Туркияда туғилган бўлишига қарамай, ўзбек тилида равон гапиради. Унинг аждодлари Сурхондарёнинг Шўрчисидан бўлиб, авлодлар ҳалигача эски ўзбек лаҳжасида гаплашишади. Муҳаммад Амин Қаҳрамоннинг айтишича, Туркиядаги ёш ўзбекларнинг аксарияти замонавий ўзбекча ўқиш ва ёзишни билмайди, лекин қарийб 70 фоизи ўзбек тилида гаплашади. Қишлоқдаги барча ватандошларимиз каби унинг энг катта орзуларидан бири — Ватанни кўриб келиш.

* * *

Turkiyaning Shonliurfa viloyati Jeylanpinar nohiyasida yashovchi o‘zbeklar har kuni iftorlik dasturxonida yig‘ilmoqdalar. Shonliurfalik o‘zbek Muhammad Amin Qahramonning aytishicha, Evren pasha qishlog‘ida har kuni 200 kishilik iftorlik dasturxoni uyushtirilmoqda. Bir kun osh, bir kun sho‘rva va boshqa o‘zbekona taomlar iftorlik dasturxonini bezamoqda. Iftorlikdan so‘ng xufton va tarovih namozlari ado etilmoqda.

Hozirda Turkiyaning Shonliurfa viloyatida 2000, Xatay viloyatida 10000, Anqarada 3000 nafar o‘zbeklar istiqomat qiladi. Ular 20-30-yillarda O‘zbekistondan Afg‘onistonga ko‘chib ketgan vatandoshlarimizning avlodlaridir. O‘tgan asrning 80-yillarida Afg‘onistondagi o‘zbeklarning ba’zilari Turkiyaga ko‘chishgan edi. Ular ana shu hududlarda yerlashishgan.

Muhammad Amin Qahramon Turkiyada tug‘ilgan bo‘lishiga qaramay, o‘zbek tilida ravon gapiradi. Uning ajdodlari Surxondaryoning Sho‘rchisidan bo‘lib, avlodlar haligacha eski o‘zbek lahjasida gaplashishadi. Muhammad Amin Qahramonning aytishicha, Turkiyadagi yosh o‘zbeklarning aksariyati zamonaviy o‘zbekcha o‘qish va yozishni bilmaydi, lekin qariyb 70 foizi o‘zbek tilida gaplashadi. Qishloqdagi barcha vatandoshlarimiz kabi uning eng katta orzularidan biri — Vatanni ko‘rib kelish.

• Олдинги
• Кейинги