“Минор” жоме масжидида намозхонлар учун ифторлик уюштирилмоқда

Рукн: Янгиликлар Чоп этилган: 22.06.2015

Тошкент шаҳрининг “Минор” жоме масжидида намозхонлар ташаббуси билан ифторлик дастурхони ташкил этилмоқда. Исломий бағрикенглик намунаси бўлган ушбу тадбирга дини, миллати, рўза тутган ва тутмаганидан қатъи назар барча таклиф этилмоқда. Бугунги ифторлик дастурхонида ҳам 500 киши иштирок этди.

“Минор” жоме масжиди имоми Раҳматуллоҳ қори Ҳабибуллоҳ ўғли таъкидлаганидек: "Ушбу ифторликлар худди Ҳарами шарифдаги ифторликларни эслатиб юборди. Мусулмонларнинг мана шундай гўзал тадбирларига кўпчилик хавас қилмоқда. Рамазон ойининг фазилатларини батафсил баён қилгувчи ҳадисда Расулуллоҳ (соллаллоҳу алайҳи ва саллам): “Эй одамлар! Сизларга энг улуғ ва баракотли ой соя солиб келмоқда... У – хайр эҳсон улашиладиган ой. У ойда мўминнинг ризқи зиёда бўлади. Кимки у ойда бирорта рўзадорга ифторлик қилиб берса, унинг гуноҳлари кечирилади ва дўзахдан озод бўлади. Шунингдек, унга ҳам рўзадорнинг савобидан ҳеч қанча кам бўлмаган савоб берилади” дедилар. Шунда саҳобалар: “Эй Расулулоҳ! Биз ҳаммамиз ҳам рўзадорга ифторлик қилиб бера олмаймиз-ку”, дедилар. Расулуллоҳ (соллаллоҳу алайҳи ва саллам): “Аллоҳ таоло бу савобни рўзадорга бир қултум сут ёки битта хурмо ёки бўлмаса, бир ҳўплам сув билан ифторлик қилиб берган кишига ҳам беради. Кимки рўзадорнинг қорнини тўйғазса, Аллоҳ қиёматда унга ҳавзи кавсаридан бир қултум сув ичиради, натижада у то жаннатга киргунича чанқамайди. Рамазон — аввали раҳмат, ўртаси мағфират, охири дўзахдан озод қилиш ойидир. Кимки у ойда ходимларнинг оғирини енгил қилса, Аллоҳ унинг гуноҳларини кечиради, ҳамда дўзахдан озод қилади”, дедилар".

Раҳматуллоҳ қори Ҳабибуллоҳ ўғли барчани ушбу ифторлик дастурхонига таклиф этиб, "Ҳозирги қисқа кечаларда ифторликка хонадонларга бормасдан, шу ерда биргалашиб ифтор қилсак-да, кейин шошилмасдан масжидга келсак қандай яхши", - деди.

* * *

Toshkent shahrining “Minor” jome masjidida namozxonlar tashabbusi bilan iftorlik dasturxoni tashkil etilmoqda. Islomiy bag‘rikenglik namunasi bo‘lgan ushbu tadbirga dini, millati, ro‘za tutgan va tutmaganidan qat’i nazar barcha taklif etilmoqda. Bugungi iftorlik dasturxonida ham 500 kishi ishtirok etdi.

“Minor” jome masjidi imomi Rahmatulloh qori Habibulloh o‘g‘li ta’kidlaganidek: "Ushbu iftorliklar xuddi Harami sharifdagi iftorliklarni eslatib yubordi. Musulmonlarning mana shunday go‘zal tadbirlariga ko‘pchilik xavas qilmoqda. Ramazon oyining fazilatlarini batafsil bayon qilguvchi hadisda Rasululloh (sollallohu alayhi va sallam): “Ey odamlar! Sizlarga eng ulug‘ va barakotli oy soya solib kelmoqda... U – xayr ehson ulashiladigan oy. U oyda mo‘minning rizqi ziyoda bo‘ladi. Kimki u oyda birorta ro‘zadorga iftorlik qilib bersa, uning gunohlari kechiriladi va do‘zaxdan ozod bo‘ladi. Shuningdek, unga ham ro‘zadorning savobidan hech qancha kam bo‘lmagan savob beriladi” dedilar. Shunda sahobalar: “Ey Rasululoh! Biz hammamiz ham ro‘zadorga iftorlik qilib bera olmaymiz-ku”, dedilar. Rasululloh (sollallohu alayhi va sallam): “Alloh taolo bu savobni ro‘zadorga bir qultum sut yoki bitta xurmo yoki bo‘lmasa, bir ho‘plam suv bilan iftorlik qilib bergan kishiga ham beradi. Kimki ro‘zadorning qornini to‘yg‘azsa, Alloh qiyomatda unga havzi kavsaridan bir qultum suv ichiradi, natijada u to jannatga kirgunicha chanqamaydi. Ramazon — avvali rahmat, o‘rtasi mag‘firat, oxiri do‘zaxdan ozod qilish oyidir. Kimki u oyda xodimlarning og‘irini yengil qilsa, Alloh uning gunohlarini kechiradi, hamda do‘zaxdan ozod qiladi”, dedilar".

Rahmatulloh qori Habibulloh o‘g‘li barchani ushbu iftorlik dasturxoniga taklif etib, "Hozirgi qisqa kechalarda iftorlikka xonadonlarga bormasdan, shu yerda birgalashib iftor qilsak-da, keyin shoshilmasdan masjidga kelsak qanday yaxshi", - dedi.