“Минор” жомеъ масжиди қурилиши ниҳоясига етди

Рукн: Янгиликлар Чоп этилган: 01.10.2014

Тошкент шаҳри марказида жойлашган "Минор"  жомеъ масжиди қурилиши ниҳоясига етди. 2013 йилда қабул қилинган “Тошкент шаҳрининг Минор маҳалласи ҳудудида масжид барпо этиш чора-тадбирлари тўғрисида”ги Президент қарорига биноан барпо этилаётган ушбу жомеъ масжиди миллий меъморчилигимиз анъаналарини ўзида мужассам этган бўлиб, бир пайтнинг ўзида уч мингдан зиёд намозхонни бағрига сиғдира олади.

Лойиҳага кўра, масжиднинг бош биноси – икки қаватли хонақоҳ қад кўтарди, иккита пештоқ, баландлиги 38 метр бўлган иккита минора  ва бир гумбаз нафақат кичик ҳалқа йўл, балки олис-олислардан ҳам кўриниб, қўр тўкиб туради. Масжид ҳовлисининг икки томонида миллий ёғоч ўймакорлиги услубларида безатилган устунлар ўрнатилиши ўзига хос салобат касб этади. Ҳудуддаги саранжом-саришталик пойтахт қиёфасига алоҳида кўрк ва чирой бағишламоқда. Айни пайтда Бўзсув ёқасигача кўркам майсазорлар ва хиёбон тиклаш ишлари якунига етай деб қолди.

Жомеъ масжидининг очилиш маросими бугун бўлиб ўтди. Қурбон ҳайити куни ҳам катта жамоат йиғилии кутилмоқда.

Ўзбекистон мусулмонлари идораси уламолар кенгаши қарорига кўра, "Минор"  жомеъ масжидига Раҳматуллоҳ Сайфуддинов имом-хатиб этиб тайинланди.

Раҳматуллоҳ қори Ҳабибуллоҳ ўғли 1975 йил 18 май куни Сурхондарё вилоятининг Музробот туманида таваллуд топган. Бухородаги “Мир Араб” мадрасасини ва Имом Бухорий номидаги Тошкент ислом институтини (1995-1999) тамомлаган. Шайхонтоҳур туманидаги “Оқ тунукали” масжидида имом-хатиб, Юнусобод туманидаги “Мирзо Юсуф” жомеъ масжидида ноиби, имом, “Юнусобод Оқтепа”  жомеъ масжиди имом-хатиби, “Хўжа Аламбардор” жомеъ масжиди имом-хатиби вазифасида фаолият олиб борган.

Унинг илмий-ижтимоий, диний-маърифий мавзудаги 60 яқин теле ва радио эшиттиришлари эфирга узатилган, 500 га яқин мақолалари, “Ҳалол савдо касбларнинг яхшиси” номли китоби чоп этилган. Жума мавъизалари жамланган 10 та СD албоми чиқарилган.

Раҳматуллоҳ Сайфуддинов 2011 йилнинг "Энг намунали имоми", 2012 йилнинг "Энг фаол имом хатиби" кўрик-танловлари ғолиби.

* * *

Toshkent shahri markazida joylashgan "Minor"  jome’ masjidi qurilishi nihoyasiga yetdi. 2013 yilda qabul qilingan “Toshkent shahrining Minor mahallasi hududida masjid barpo etish chora-tadbirlari to‘g‘risida”gi Prezident qaroriga binoan barpo etilayotgan ushbu jome’ masjidi milliy me’morchiligimiz an’analarini o‘zida mujassam etgan bo‘lib, bir paytning o‘zida uch mingdan ziyod namozxonni bag‘riga sig‘dira oladi.

Loyihaga ko‘ra, masjidning bosh binosi – ikki qavatli xonaqoh qad ko‘tardi, ikkita peshtoq, balandligi 38 metr bo‘lgan ikkita minora  va bir gumbaz nafaqat kichik halqa yo‘l, balki olis-olislardan ham ko‘rinib, qo‘r to‘kib turadi. Masjid hovlisining ikki tomonida milliy yog‘och o‘ymakorligi uslublarida bezatilgan ustunlar o‘rnatilishi o‘ziga xos salobat kasb etadi. Hududdagi saranjom-sarishtalik poytaxt qiyofasiga alohida ko‘rk va chiroy bag‘ishlamoqda. Ayni paytda Bo‘zsuv yoqasigacha ko‘rkam maysazorlar va xiyobon tiklash ishlari yakuniga yetay deb qoldi.

Jome’ masjidining ochilish marosimi bugun bo‘lib o‘tdi. Qurbon hayiti kuni ham katta jamoat yig‘ilii kutilmoqda.

O‘zbekiston musulmonlari idorasi ulamolar kengashi qaroriga ko‘ra, "Minor"  jome’ masjidiga Rahmatulloh Sayfuddinov imom-xatib etib tayinlandi.

Rahmatulloh qori Habibulloh o‘g‘li 1975 yil 18 may kuni Surxondaryo viloyatining Muzrobot tumanida tavallud topgan. Buxorodagi “Mir Arab” madrasasini va Imom Buxoriy nomidagi Toshkent islom institutini (1995-1999) tamomlagan. Shayxontohur tumanidagi “Oq tunukali” masjidida imom-xatib, Yunusobod tumanidagi “Mirzo Yusuf” jome’ masjidida noibi, imom, “Yunusobod Oqtepa”  jome’ masjidi imom-xatibi, “Xo‘ja Alambardor” jome’ masjidi imom-xatibi vazifasida faoliyat olib borgan.

Uning ilmiy-ijtimoiy, diniy-ma’rifiy mavzudagi 60 yaqin tele va radio eshittirishlari efirga uzatilgan, 500 ga yaqin maqolalari, “Halol savdo kasblarning yaxshisi” nomli kitobi chop etilgan. Juma mav’izalari jamlangan 10 ta SD albomi chiqarilgan.

Rahmatulloh Sayfuddinov 2011 yilning "Eng namunali imomi", 2012 yilning "Eng faol imom xatibi" ko‘rik-tanlovlari g‘olibi.