Тошкент шаҳридаги “Чимир ота” жомеъ масжиди қайта таъмирланди

Тошкент шаҳрининг Шифокорлар шаҳарчасида жойлашган “Чимир ота” жомеъ масжидини қайта таъмирлаш ишлари битказилди. Масжид тарихий анъаналаримизга мос ҳолда пишиқ ғиштдан жуда чиройли қилиб тикланган. 40 квадрат метр майдонни эгаллаган масжид хонақоҳи бўйи 35 метр, хонақоҳ ичидан гумбазнинг баландлиги 27 метрдир. Масжидга ажратилган умумий ер майдони ярим гектарга яқин. Хонақоҳ ва айвонларга бир вақтда 2000 дан ортиқ намозхон жойлашиши мумкин.

“Чимир ота” масжидинининг номланиши тўғрисида икки хил маълумот бор. Чимир ота Хожа Аҳмад Яссавий ҳазратларининг иқтидорли шогирдларидан ёки зурриёдларидан бири бўлиб, Яссавий тариқатини Шош диёрида тарқатиш учун пири муршидлари тамонидан жўнатилади. Иккинчи маълумотга кўра, Чимир ота тахминан 1450-1530 йилларда Тошкентда туғилиб, шу ерда яшаб вафот этган. Ва ҳозирги Чимир ота қабристонига дафн этилган уламолардан биридир.

Жомеъ масжиди 1989 йил октябр ойидан расмий равишда фаолият бошлаган. Шинамгина безатилган қироатхона, кутубхона ва янги таҳоратхоналар намозхонлар ихтиёрида. Масжидда айвонлар, намоз ўқиш учун қўшимча бинолар мавжуд.

Жума ва ҳайит намозларида масжидда беш мингдан ортиқ намозхон ибодатларини адо этадилар.

Бу йил Islom.uz портали томонидан ташкил қилинган “Энг обод масжид” кўрик-танловида Чимир ота жомеъ масжиди ғолиб деб топилди.

* * *

Toshkent shahrining Shifokorlar shaharchasida joylashgan “Chimir ota” jome’ masjidini qayta ta’mirlash ishlari bitkazildi. Masjid tarixiy an’analarimizga mos holda pishiq g‘ishtdan juda chiroyli qilib tiklangan. 40 kvadrat metr maydonni egallagan masjid xonaqohi bo‘yi 35 metr, xonaqoh ichidan gumbazning balandligi 27 metrdir. Masjidga ajratilgan umumiy yer maydoni yarim gektarga yaqin. Xonaqoh va ayvonlarga bir vaqtda 2000 dan ortiq namozxon joylashishi mumkin.

“Chimir ota” masjidinining nomlanishi to‘g‘risida ikki xil ma’lumot bor. Chimir ota Xoja Ahmad Yassaviy hazratlarining iqtidorli shogirdlaridan yoki zurriyodlaridan biri bo‘lib, Yassaviy tariqatini Shosh diyorida tarqatish uchun piri murshidlari tamonidan jo‘natiladi. Ikkinchi ma’lumotga ko‘ra, Chimir ota taxminan 1450-1530 yillarda Toshkentda tug‘ilib, shu yerda yashab vafot etgan. Va hozirgi Chimir ota qabristoniga dafn etilgan ulamolardan biridir.

Jome’ masjidi 1989 yil oktyabr oyidan rasmiy ravishda faoliyat boshlagan. Shinamgina bezatilgan qiroatxona, kutubxona va yangi tahoratxonalar namozxonlar ixtiyorida. Masjidda ayvonlar, namoz o‘qish uchun qo‘shimcha binolar mavjud.

Juma va hayit namozlarida masjidda besh mingdan ortiq namozxon ibodatlarini ado etadilar.

Bu yil Islom.uz portali tomonidan tashkil qilingan “Eng obod masjid” ko‘rik-tanlovida Chimir ota jome’ masjidi g‘olib deb topildi.

• Олдинги
• Кейинги