Ислом.уз порталининг 10 йиллиги нишонланди

 

20 октябрь куни Тошкент шаҳридаги "Grand Ta‘lim" ўқув марказида Islom.uz порталининг 10 йиллигига бағишланган анжуман бўлиб ўтди. Унда ушбу сайт асосчиси Шайх Муҳаммад Содиқ Муҳаммад Юсуф ва бир қатор уламолар, илм аҳллари, порталнинг мухлислари иштирок этдилар. Анжуманни Шайх Муҳаммад Содиқ Муҳаммад Юсуф кириш сўзи билан очиб, хайрли дуолар қилдилар. Айни пайтда 20 дан ортиқ сайтни бирлаштирган порталнинг масъуллари ўзлари бошқараётган лойиҳа-сайтлар ҳақида маълумот бердилар. Тадбир сўнггида порталнинг 10 йиллигига бағишлаб ўтказилган танлов ғолиблари тақдирланди.

 

"Сиз азизларнинг хайрли дуоларингиз ижобати ўлароқ, Аллоҳ таоло Ислом.уз порталининг хизматларини юксак тақдирлади. Порталимиз ўнга яқин сайтлари республикамизда бир неча йиллардан буён ўтказиб келинаётган интернет фестивалида бир неча маротаба ғолиб бўлиб, энг юқори ўринларни эгаллади. Бу юксак эътироф севимли порталингизнинг савиясини, эл-юрт ичида қозонган обрўсини кўрсатувчи муҳим омилдир. Албатта, эришилган муваффақиятлар бизга янада катта масъулият юклайди. Сайтларимизнинг техник ва бадиий савиясини ошириш, унинг мазмун-моҳиятини бойитиш, камчиликларни бартараф этиш борасида, эл-юртга, халққа, ватанга янада кўпроқ хизмат қилиш, зиё таратиш борасида анча ишлар қилиниши керак. Бу борада сиз азизларнинг кўмак ва холис дуоларингиздан доимо умидвормиз, муқаддас динимизга хизматда бардавом қилишини сўраб Аллоҳ таолога тазарруълар қиламиз.

 

Яна бир бор барчангизни порталимизнинг 10 йиллик тўйи муносабати билан чин қалбдан муборакбод этамиз. Барчангизни порталимизда бевосита иштирок этишга ва ундаги маълумотлардан бемалол фойдаланишга таклиф этамиз" дейилади Шайх Муҳаммад Содиқ Муҳаммад Юсуф ҳазратларининг 10 йиллик муносабати билан ёзган мақоласида.

 

* * *

 

20 oktyabr kuni Toshkent shahridagi "Grand Ta‘lim" o‘quv markazida Islom.uz portalining 10 yilligiga bag‘ishlangan anjuman bo‘lib o‘tdi. Unda ushbu sayt asoschisi Shayx Muhammad Sodiq Muhammad Yusuf va bir qator ulamolar, ilm ahllari, portalning muxlislari ishtirok etdilar. Anjumanni Shayx Muhammad Sodiq Muhammad Yusuf kirish so‘zi bilan ochib, xayrli duolar qildilar. Ayni paytda 20 dan ortiq saytni birlashtirgan portalning mas’ullari o‘zlari boshqarayotgan loyiha-saytlar haqida ma’lumot berdilar. Tadbir so‘nggida portalning 10 yilligiga bag‘ishlab o‘tkazilgan tanlov g‘oliblari taqdirlandi.

 

"Siz azizlarning xayrli duolaringiz ijobati o‘laroq, Alloh taolo Islom.uz portalining xizmatlarini yuksak taqdirladi. Portalimiz o‘nga yaqin saytlari respublikamizda bir necha yillardan buyon o‘tkazib kelinayotgan internet festivalida bir necha marotaba g‘olib bo‘lib, eng yuqori o‘rinlarni egalladi. Bu yuksak e’tirof sevimli portalingizning saviyasini, el-yurt ichida qozongan obro‘sini ko‘rsatuvchi muhim omildir. Albatta, erishilgan muvaffaqiyatlar bizga yanada katta mas’uliyat yuklaydi. Saytlarimizning texnik va badiiy saviyasini oshirish, uning mazmun-mohiyatini boyitish, kamchiliklarni bartaraf etish borasida, el-yurtga, xalqqa, vatanga yanada ko‘proq xizmat qilish, ziyo taratish borasida ancha ishlar qilinishi kerak. Bu borada siz azizlarning ko‘mak va xolis duolaringizdan doimo umidvormiz, muqaddas dinimizga xizmatda bardavom qilishini so‘rab Alloh taologa tazarru’lar qilamiz.

 

Yana bir bor barchangizni portalimizning 10 yillik to‘yi munosabati bilan chin qalbdan muborakbod etamiz. Barchangizni portalimizda bevosita ishtirok etishga va undagi ma’lumotlardan bemalol foydalanishga taklif etamiz" deyiladi Shayx Muhammad Sodiq Muhammad Yusuf hazratlarining 10 yillik munosabati bilan yozgan maqolasida.