Бу йил 5200 нафар зиёратчи Ҳажга боради, квота қисқармайдиган бўлди

Дин ишлари бўйича қўмита Ахборот хизмати хабар беришича, “Ҳаж-2013” мавсумида ўзбекистонлик ҳожилар квотаси тўлалигича сақланиб қолади.

Аввал хабар берилганидек, бугунги кунда Саудия Арабистони Подшоҳлиги ҳукумати “Ҳаж” ва “Умра” мавсумларида мамлакатга келадиган зиёратчиларга қулайликлар яратиш мақсадида Макка ва Мадина шаҳарларидаги икки харам ҳудудини кенгайтириш ишларини бошлаганлиги ҳамда муқаддас шаҳарлар инфраструктурасини тубдан ўзгартириш ишларини кенг кўламда давом эттираётганлиги сабабли “Ҳаж” ва “Умра” мавсумларида хориждан келадиган зиёратчилар сонини 20%га қисқартириш масаласида барча дунё давлатлари қаторида Ўзбекистонга ҳам расмий мурожаат қилганлиги айтиб ўтилган эди.

Жорий йилнинг 15 июнида икки томонлама шартномага кўра, мамлакатимизда 5200 нафар зиёратчининг сафари билан боғлиқ барча режалаштирилган ишлар якунлангани ҳамда Ўзбекистон Республикаси ва Саудия Арабистони Подшоҳлиги ўртасида тузилган шартномада кўрсатилган ўринларни сақлаб қолиш масаласида Дин ишлари бўйича қўмита томонидан Саудия Арабистони Ҳаж ишлари вазири номига хат йўлланди.

Бундан ташқари, мамлакатимизнинг Саудия Арабистонидаги элчиси Саудия Арабистони Подшоҳлигининг Маданият ва ахборот вазири Абдулазиз Муҳиддинхўжа ҳамда Ҳаж ишлари вазири Бандар бин Муҳаммад Хажжор билан квотани сақлаб қолиш юзасидан учрашувлар ўтказди.

Ўзбекистоннинг “Ҳаж-2013” мавсумида зиёратчилар сонини тўлалигича сақлаб қолиш масаласидаги уринишлари ўзининг самарали натижасини берди.

Жорий йилнинг 24 сентябрь куни Ҳаж мавсумида зиёратчиларимиз сонини сақлаб қолиш бўйича қилган мурожаатларимиз Саудия Арабистони Подшоҳи девонида кўриб чиқилгани ҳамда Ўзбекистондан Ҳаж зиёратига борадиганлар сонини 5200 нафар этиб белгиланганлиги тўғрисида Саудия Арабистони Ҳаж ишлари вазирлигидан хат олинди.

Шунга асосан ҳозирда барча зиёратчиларимиз ҳужжатлари белгиланган тартибда Саудия Арабистони Подшоҳлигининг Тошкентдаги элчихонасига виза расмийлаштириш учун тайёрланмоқда, деб хабар берилади Дин ишлари бўйича қўмита Ахборот хизмати сайтида.

* * *

Din ishlari bo‘yicha qo‘mita Axborot xizmati xabar berishicha, “Haj-2013” mavsumida o‘zbekistonlik hojilar kvotasi to‘laligicha saqlanib qoladi.

Avval xabar berilganidek, bugungi kunda Saudiya Arabistoni Podshohligi hukumati “Haj” va “Umra” mavsumlarida mamlakatga keladigan ziyoratchilarga qulayliklar yaratish maqsadida Makka va Madina shaharlaridagi ikki xaram hududini kengaytirish ishlarini boshlaganligi hamda muqaddas shaharlar infrastrukturasini tubdan o‘zgartirish ishlarini keng ko‘lamda davom ettirayotganligi sababli “Haj” va “Umra” mavsumlarida xorijdan keladigan ziyoratchilar sonini 20%ga qisqartirish masalasida barcha dunyo davlatlari qatorida O‘zbekistonga ham rasmiy murojaat qilganligi aytib o‘tilgan edi.

Joriy yilning 15 iyunida ikki tomonlama shartnomaga ko‘ra, mamlakatimizda 5200 nafar ziyoratchining safari bilan bog‘liq barcha rejalashtirilgan ishlar yakunlangani hamda O‘zbekiston Respublikasi va Saudiya Arabistoni Podshohligi o‘rtasida tuzilgan shartnomada ko‘rsatilgan o‘rinlarni saqlab qolish masalasida Din ishlari bo‘yicha qo‘mita tomonidan Saudiya Arabistoni Haj ishlari vaziri nomiga xat yo‘llandi.

Bundan tashqari, mamlakatimizning Saudiya Arabistonidagi elchisi Saudiya Arabistoni Podshohligining Madaniyat va axborot vaziri Abdulaziz Muhiddinxo‘ja hamda Haj ishlari vaziri Bandar bin Muhammad Xajjor bilan kvotani saqlab qolish yuzasidan uchrashuvlar o‘tkazdi.

O‘zbekistonning “Haj-2013” mavsumida ziyoratchilar sonini to‘laligicha saqlab qolish masalasidagi urinishlari o‘zining samarali natijasini berdi.

Joriy yilning 24 sentabr kuni Haj mavsumida ziyoratchilarimiz sonini saqlab qolish bo‘yicha qilgan murojaatlarimiz Saudiya Arabistoni Podshohi devonida ko‘rib chiqilgani hamda O‘zbekistondan Haj ziyoratiga boradiganlar sonini 5200 nafar etib belgilanganligi to‘g‘risida Saudiya Arabistoni Haj ishlari vazirligidan xat olindi.

Shunga asosan hozirda barcha ziyoratchilarimiz hujjatlari belgilangan tartibda Saudiya Arabistoni Podshohligining Toshkentdagi elchixonasiga viza rasmiylashtirish uchun tayyorlanmoqda, deb xabar beriladi Din ishlari bo‘yicha qo‘mita Axborot xizmati saytida.

• Олдинги
• Кейинги