Ўзбекистон уламолари мусулмонларни Рамазон ҳайити билан қутладилар

Рукн: Янгиликлар Чоп этилган: 09.08.2013

Бу йилги Рамазон гарчи йилнинг энг иссиқ пайтига тўғри келган бўлса-да, файзли ўтганини кўп мусулмонлар таъкидламоқдалар.

Рамазон ҳайити муносабати билан Ўзбекистон мусулмонлари идораси, муфтий Усмонхон Алимов ҳазратларининг табриги бугун барча жомеъ масжидларида ўқиб эшиттирилган. Табрикнинг тўлиқ матни Ўзбекистон мусулмонлари идораси расмий сайти - www.muslim.uz да эълон қилинди. Ушбу сайтда Рамазон ойи давомида юртимиздаги жомеъ масжидларидаги таровеҳ тадбирларидан видеолавҳалар мунтазам эълон қилинди.

Юртимизнинг фахри, забардаст олим Шайх Муҳаммад Содиқ Муҳаммад Юсуф ҳазратлари ҳам ҳар йилги анъанага кўра, бу йил ҳам мусулмонларни Рамазон ҳайити билан табриклаб, эзгу ниятлар тилади. Табрикнинг видеонусхаси www.islom.uz  да эълон қилинди.

Бу йил Шайх Муҳаммад Содиқ Муҳаммад Юсуф ҳазратлари Рамазоннинг 29 кунида юртимизнинг жомеъ масжидларига ташриф буюриб, долзарб мавзулардаги маърузалари билан иштирок этдилар. Ушбу тадбирлардан фото ва видеорепортажлар info.islom.uz сайтида мунтазам эълон қилинди.

Жорий 2013 йилнинг муборак Рамазон ойида юртимизнинг барча ҳудудларидаги жами 774 та масжидда хатми Қуръон, 1263 та масжидда таровеҳ намозлари адо этилди.

* * *

Bu yilgi Ramazon garchi yilning eng issiq paytiga to‘g‘ri kelgan bo‘lsa-da, fayzli o‘tganini ko‘p musulmonlar ta’kidlamoqdalar.

Ramazon hayiti munosabati bilan O‘zbekiston musulmonlari idorasi, muftiy Usmonxon Alimov hazratlarining tabrigi bugun barcha jome’ masjidlarida o‘qib eshittirilgan. Tabrikning to‘liq matni O‘zbekiston musulmonlari idorasi rasmiy sayti - www.muslim.uz da e’lon qilindi. Ushbu saytda Ramazon oyi davomida yurtimizdagi jome’ masjidlaridagi taroveh tadbirlaridan videolavhalar muntazam e’lon qilindi.

Yurtimizning faxri, zabardast olim Shayx Muhammad Sodiq Muhammad Yusuf hazratlari ham har yilgi an’anaga ko‘ra, bu yil ham musulmonlarni Ramazon hayiti bilan tabriklab, ezgu niyatlar tiladi. Tabrikning videonusxasi www.islom.uz  da e’lon qilindi.

Bu yil Shayx Muhammad Sodiq Muhammad Yusuf hazratlari Ramazonning 29 kunida yurtimizning jome’ masjidlariga tashrif buyurib, dolzarb mavzulardagi ma’ruzalari bilan ishtirok etdilar. Ushbu tadbirlardan foto va videoreportajlar info.islom.uz saytida muntazam e’lon qilindi.

Joriy 2013 yilning muborak Ramazon oyida yurtimizning barcha hududlaridagi jami 774 ta masjidda xatmi Qur’on, 1263 ta masjidda taroveh namozlari ado etildi.