Ўзбекистонда Рамазон ҳайити 9 августда нишонланади

Рукн: Янгиликлар Чоп этилган: 07.08.2013

Ўзбекистон Мусулмонлари идорасининг матбуот хизмати хабар қилишича, ЎМИ Уламолар ҳайъати 2013 йилда Рамазон ҳайитининг биринчи куни 9 август жума кунига тўғри келиши ҳақида қарор қабул қилган.

Хабарда келтирилишича, Ислом дини таълимотида Рамазон ҳайитининг биринчи кунини белгилаш учун Пайғамбаримиз алайҳиссаломнинг “Янги ойни кўриб рўза тутинглар ва янги ойни кўриб ҳайит қилинглар” деган ҳадиси шарифлари асос қилиб олинган. Шунга мувофиқ, ҳайит байрамини белгилашда Ислом дини кўрсатмаларига таянилган.

Рамазон ҳайити намози Тошкент шаҳридаги жоме масжидларда 2013 йил 9 август куни эрталабки соат 06:00 да адо этилади. Қолган ҳудудларда орадаги вақт тафовутига мос шаклда ўқилади.

7 август куни Ўзбекистон Республикаси Президентининг «Рамазон ҳайитини нишонлаш тўғрисида» Қарори эълон қилинди. Унга кўра, муборак Рамазон ҳайитининг халқимиз маънавий ҳаётидаги ўрни ва аҳамиятини эътиборга олиб, миллий-диний қадриятларимизни сақлаш ва улуғлаш ҳамда Ўзбекистон Республикаси Президентининг “Рўза ҳайитини дам олиш куни деб эълон қилиш тўғрисида”ги 1992 йил 27 мартдаги ПФ-368-сон фармонига мувофиқ, Ўзбекистон мусулмонлари идорасининг 2013 йилда Рамазон ҳайитининг биринчи куни 9 август жума кунига тўғри келиши ҳақида қабул қилган қарорини инобатга олиб, 2013 йил 9 август дам олиш куни деб белгиланди.

Эслатиб ўтамиз, Ўзбекистондан ташқари Покистон, Ҳиндистон давлатларида ҳам Рамазон ҳайити 9 август куни нишонланади.

Ийди Рамазон байрамингиз муборак бўлсин!

* * *

O‘zbekiston Musulmonlari idorasining matbuot xizmati xabar qilishicha, O‘MI Ulamolar hay’ati 2013 yilda Ramazon hayitining birinchi kuni 9 avgust juma kuniga to‘g‘ri kelishi haqida qaror qabul qilgan.

Xabarda keltirilishicha, Islom dini ta’limotida Ramazon hayitining birinchi kunini belgilash uchun Payg‘ambarimiz alayhissalomning “Yangi oyni ko‘rib ro‘za tutinglar va yangi oyni ko‘rib hayit qilinglar” degan hadisi shariflari asos qilib olingan. Shunga muvofiq, hayit bayramini belgilashda Islom dini ko‘rsatmalariga tayanilgan.

Ramazon hayiti namozi Toshkent shahridagi jome masjidlarda 2013 yil 9 avgust kuni ertalabki soat 06:00 da ado etiladi. Qolgan hududlarda oradagi vaqt tafovutiga mos shaklda o‘qiladi.

7 avgust kuni O‘zbekiston Respublikasi Prezidentining «Ramazon hayitini nishonlash to‘g‘risida» Qarori e’lon qilindi. Unga ko‘ra, muborak Ramazon hayitining xalqimiz ma’naviy hayotidagi o‘rni va ahamiyatini e’tiborga olib, milliy-diniy qadriyatlarimizni saqlash va ulug‘lash hamda O‘zbekiston Respublikasi Prezidentining “Ro‘za hayitini dam olish kuni deb e’lon qilish to‘g‘risida”gi 1992 yil 27 martdagi PF-368-son farmoniga muvofiq, O‘zbekiston musulmonlari idorasining 2013 yilda Ramazon hayitining birinchi kuni 9 avgust juma kuniga to‘g‘ri kelishi haqida qabul qilgan qarorini inobatga olib, 2013 yil 9 avgust dam olish kuni deb belgilandi.

Eslatib o‘tamiz, O‘zbekistondan tashqari Pokiston, Hindiston davlatlarida ham Ramazon hayiti 9 avgust kuni nishonlanadi.

Iydi Ramazon bayramingiz muborak bo‘lsin!