Юртдошларимиз Умра зиёратига жўнаб кетишди

22 июль куни 06:50 да ўзбекистонлик зиёратчиларнинг 225 нафардан иборат биринчи гуруҳи Тошкент-Жидда йўналишида умра амалларини адо этиш мақсадида Саудия Арабистонига жўнаб кетишди.

Жорий йилнинг 22 июлидан 3 август кунига қадар ўзбекистонлик зиёратчиларни Рамазон ойидаги умра сафарига юбориш режалаштирилган, дея хабар беради Дин ишлари бўйича қўмита Ахборот хизмати.

Зиёратчилар Макка ва Мадина шаҳрида умра ибодатларини адо этадилар. Зиёрат 10 кунни ташкил етади (Мадинада 4 кун, Маккада 6 кун). Ўзбекистонлик зиёратчиларни жойлаштириш учун Мадина шаҳрида “Масжиди набавий”дан 20 метр масофада жойлашган тўрт юлдузли “Сафва ал-Мавадда” меҳмонхонаси, Макка шаҳрида эса “Ҳарам масжиди”дан 800 метр узоқликдаги “Бишара ал-Мавадда” меҳмонхонаси тайёрлаб қўйилган. Зиёратчилар ибодати, овқатланиши (ифторлик, саҳарлик), уларга тиббий хизмат кўрсатиш, кузатиш ва кутиб олиш бўйича барча шароитлар яратилган. Умра зиёратидан фуқароларимизнинг қайтиши 1 август кунидан 12 август кунига қадар амалга оширилади.

Зиёратчиларнинг Тошкент аэропортидан кузатиш тадбирлари Дин ишлари бўйича қўмита, Ўзбекистон мусулмонлари идораси, мутасадди вазирликлар ва идоралар ходимлари (Умра ишчи гуруҳи) билан биргаликда уюшган ҳолда амалга оширилмоқда. Рамазон умра зиёратида жами 1183 нафар фуқароларимизнинг (Тошкент – Жидда – Тошкент йўналиши бўйича 6 та чартер рейсида) сафарлари ташкил этилади. Умра сафари давомида зиёратчиларга 2 нафар ишчи гуруҳ, 7 нафар шифокор ва 2 нафар ошпаз хизмат кўрсатади.

Ушбу умра мавсуми Рамазон ойи - ёзнинг жазирама иссиғига тўғри келишини ҳисобга олган ҳолда, ёши катта, кекса зиёратчиларга эҳтиёт чораларини кўриш бўйича тавсиялар берилмоқда. Мазкур масалада Соғлини сақлаш вазирлиги вакиллари ҳамкорлигида йўриқнома ишлаб чиқилган ва барча зиёратчиларга тарқатилган.

Зиёратчилар учун Саудиядаги меҳмонхоналарда сунъий йўлдош орқали Ўзбекистон телевидениясининг дастурларини томоша қилиб, Ватанимизда бўлаётган воқеалардан хабардор бўлиш имконияти яратилган. Шу билан бирга, сафар мобайнида фуқароларимиз Макка ва Мадина шаҳарларидаги тарихий жойларни зиёрат қилишга муяссар бўладилар. Умра зиёратчиларини Жидда аэропортида кутиб олиш, кузатиш ва уларга қулай шароитлар яратиш ишлари Президентимиз қарори асосида Жиддадаги Бош консулликда жорий этилган Ҳаж ва умра масалалари бўйича атташе томонидан ташкил этилмоқда.

22 iyul kuni 06:50 da o‘zbekistonlik ziyoratchilarning 225 nafardan iborat birinchi guruhi Toshkent-Jidda yo‘nalishida umra amallarini ado etish maqsadida Saudiya Arabistoniga jo‘nab ketishdi.

Joriy yilning 22 iyulidan 3 avgust kuniga qadar o‘zbekistonlik ziyoratchilarni Ramazon oyidagi umra safariga yuborish rejalashtirilgan, deya xabar beradi Din ishlari bo‘yicha qo‘mita Axborot xizmati.

Ziyoratchilar Makka va Madina shahrida umra ibodatlarini ado etadilar. Ziyorat 10 kunni tashkil yetadi (Madinada 4 kun, Makkada 6 kun). O‘zbekistonlik ziyoratchilarni joylashtirish uchun Madina shahrida “Masjidi nabaviy”dan 20 metr masofada joylashgan to‘rt yulduzli “Safva al-Mavadda” mehmonxonasi, Makka shahrida esa “Haram masjidi”dan 800 metr uzoqlikdagi “Bishara al-Mavadda” mehmonxonasi tayyorlab qo‘yilgan. Ziyoratchilar ibodati, ovqatlanishi (iftorlik, saharlik), ularga tibbiy xizmat ko‘rsatish, kuzatish va kutib olish bo‘yicha barcha sharoitlar yaratilgan. Umra ziyoratidan fuqarolarimizning qaytishi 1 avgust kunidan 12 avgust kuniga qadar amalga oshiriladi.

Ziyoratchilarning Toshkent aeroportidan kuzatish tadbirlari Din ishlari bo‘yicha qo‘mita, O‘zbekiston musulmonlari idorasi, mutasaddi vazirliklar va idoralar xodimlari (Umra ishchi guruhi) bilan birgalikda uyushgan holda amalga oshirilmoqda. Ramazon umra ziyoratida jami 1183 nafar fuqarolarimizning (Toshkent – Jidda – Toshkent yo‘nalishi bo‘yicha 6 ta charter reysida) safarlari tashkil etiladi. Umra safari davomida ziyoratchilarga 2 nafar ishchi guruh, 7 nafar shifokor va 2 nafar oshpaz xizmat ko‘rsatadi.

Ushbu umra mavsumi Ramazon oyi - yozning jazirama issig‘iga to‘g‘ri kelishini hisobga olgan holda, yoshi katta, keksa ziyoratchilarga ehtiyot choralarini ko‘rish bo‘yicha tavsiyalar berilmoqda. Mazkur masalada Sog‘lini saqlash vazirligi vakillari hamkorligida yo‘riqnoma ishlab chiqilgan va barcha ziyoratchilarga tarqatilgan.

Ziyoratchilar uchun Saudiyadagi mehmonxonalarda sun’iy yo‘ldosh orqali O‘zbekiston televideniyasining dasturlarini tomosha qilib, Vatanimizda bo‘layotgan voqealardan xabardor bo‘lish imkoniyati yaratilgan. Shu bilan birga, safar mobaynida fuqarolarimiz Makka va Madina shaharlaridagi tarixiy joylarni ziyorat qilishga muyassar bo‘ladilar. Umra ziyoratchilarini Jidda aeroportida kutib olish, kuzatish va ularga qulay sharoitlar yaratish ishlari Prezidentimiz qarori asosida Jiddadagi Bosh konsullikda joriy etilgan Haj va umra masalalari bo‘yicha attashe tomonidan tashkil etilmoqda.

• Олдинги
• Кейинги