Сафарга ҳозирлик кўрдингизми?

Рукн: Ибрат Чоп этилган: 09.10.2015

Ҳорун ар-Рашид девона Баҳлулни саройга чақириб, у билан суҳбат қураркан, ҳассасини унга тутқазиб, масхаралаганнамо шундай дебди:

— Ҳазрат, мана шу ҳассамни сизга ҳадя қилсам, кун келиб ўзингиздан ҳам девона, телба ва аҳмоқ одамга сиз ҳам совға қилиб юборарсиз.

Бир вақтлар халифанинг қаттиқ касал бўлганини эшитган Баҳлул зиёратга борибди. Ҳорун ар-Рашиддан ҳол сўрабди:

— Аҳволларингиз қалай?

— Олдимда катта сафар турибди.

— Қачон қайтиб келасиз?

— Қайтмайдиган сафарга кетяпман.

— Ҳар доим сафарга чиққанингиздек, хизматкору ошпазларингизни аввалдан юбордингизми?

— Йўқ, бир ўзим борадиган охират сафарига кетяпман.

— Шунақами? У ҳолда бир пайтлар менга бир омонат бергандингиз. Ўша ҳассани ўзингизга топширсам. Муборак бўлсин! Дунёда сиздан кўра аҳмоқ одамни кўрмадим. Сиз уч кунлик сафарга икки ойлаб тайёргарлик кўриб, аввалдан хизматкорларингизни у ерга юбориб, ўзингизга шароит ҳозирлардингиз. Аммо олдингизда жуда узоқ бўлган охират сафари турганда унга тайёргарлик кўрганингизни билмадим.

* * *

Horun ar-Rashid devona Bahlulni saroyga chaqirib, u bilan suhbat qurarkan, hassasini unga tutqazib, masxaralagannamo shunday debdi:

— Hazrat, mana shu hassamni sizga hadya qilsam, kun kelib o‘zingizdan ham devona, telba va ahmoq odamga siz ham sovg‘a qilib yuborarsiz.

Bir vaqtlar xalifaning qattiq kasal bo‘lganini eshitgan Bahlul ziyoratga boribdi. Horun ar-Rashiddan hol so‘rabdi:

— Ahvollaringiz qalay?

— Oldimda katta safar turibdi.

— Qachon qaytib kelasiz?

— Qaytmaydigan safarga ketyapman.

— Har doim safarga chiqqaningizdek, xizmatkoru oshpazlaringizni avvaldan yubordingizmi?

— Yo‘q, bir o‘zim boradigan oxirat safariga ketyapman.

— Shunaqami? U holda bir paytlar menga bir omonat bergandingiz. O‘sha hassani o‘zingizga topshirsam. Muborak bo‘lsin! Dunyoda sizdan ko‘ra ahmoq odamni ko‘rmadim. Siz uch kunlik safarga ikki oylab tayyorgarlik ko‘rib, avvaldan xizmatkorlaringizni u yerga yuborib, o‘zingizga sharoit hozirlardingiz. Ammo oldingizda juda uzoq bo‘lgan oxirat safari turganda unga tayyorgarlik ko‘rganingizni bilmadim.