Кулфатми ё саодат?

Анча йиллар аввал яшаган шотландиялик Кларк ва оиласининг бир орзуси бор эди – АҚШга саёҳат қилиш. Бунинг учун Кларк ва хотини тинмай ишлаб, пул жамғаришарди. Ниҳоят етарли маблағ йиғилди. Кларк ўзи, хотини ва тўққиз фарзанди учун АҚШга кетаётган янги лайнерга билет сотиб олди.

Улар бўлажак сафар завқи ва янги ҳаёт умиди билан кута бошлашди. Бироқ кетишга бир кун қолганда кенжа фарзанднинг оёғини ит тишлаб олди. Доктор боланинг оёғини тикиб, Кларкларнинг уйи эшигига сариқ қоғоз ёпиштириб қўйди. Болада қутуриш касаллиги пайдо бўлиш эҳтимоли мавжудлиги туфайли хонадон ўн тўрт кунга карантинга қўйилганди. Оиланинг орзу-умидлари пучга чиқди! Энди улар АҚШга саёҳат қила олишмайди. Кларк уларсиз сафарга отланган кемани қирғоқдан кузатиб қолди. Кейин аламидан йиғлаб юборди ва бу бахтсизликда кенжатойини айблади.

Орадан беш кун ўтиб Шотландия бўйлаб даҳшатли хабар тарқалди – қудратли “Титаник” ҳалокатга учрабди. “Чўкмас кема” дея таърифланган “Титаник” ўзи билан бағридаги юзлаб одамларни ҳам уммон тубига олиб кетганди. Кларкнинг оиласи ҳам ўша кемада бўлиши керак эди. Лекин ўша, улар бахтсизлик санаган воқеа – кенжа ўғилнинг оёғини ит тишлаб олгани туфайли ватанларида қолишганди. Кларк бу даҳшатли хабарни эшитгач, ўғлини бағрига босди ва деди: “Раҳмат, болажоним”.

Шоакмал тайёрлади.

“Ирфон” тақвимининг 2013 йил 1-сонидан олинди.

* * *

Ancha yillar avval yashagan shotlandiyalik Klark va oilasining bir orzusi bor edi – AQShga sayohat qilish. Buning uchun Klark va xotini tinmay ishlab, pul jamg‘arishardi. Nihoyat yetarli mablag‘ yig‘ildi. Klark o‘zi, xotini va to‘qqiz farzandi uchun AQShga ketayotgan yangi laynerga bilet sotib oldi.

Ular bo‘lajak safar zavqi va yangi hayot umidi bilan kuta boshlashdi. Biroq ketishga bir kun qolganda kenja farzandning oyog‘ini it tishlab oldi. Doktor bolaning oyog‘ini tikib, Klarklarning uyi eshigiga sariq qog‘oz yopishtirib qo‘ydi. Bolada quturish kasalligi paydo bo‘lish ehtimoli mavjudligi tufayli xonadon o‘n to‘rt kunga karantinga qo‘yilgandi. Oilaning orzu-umidlari puchga chiqdi! Endi ular AQShga sayohat qila olishmaydi. Klark ularsiz safarga otlangan kemani qirg‘oqdan kuzatib qoldi. Keyin alamidan yig‘lab yubordi va bu baxtsizlikda kenjatoyini aybladi.

Oradan besh kun o‘tib Shotlandiya bo‘ylab dahshatli xabar tarqaldi – qudratli “Titanik” halokatga uchrabdi. “Cho‘kmas kema” deya ta’riflangan “Titanik” o‘zi bilan bag‘ridagi yuzlab odamlarni ham ummon tubiga olib ketgandi. Klarkning oilasi ham o‘sha kemada bo‘lishi kerak edi. Lekin o‘sha, ular baxtsizlik sanagan voqea – kenja o‘g‘ilning oyog‘ini it tishlab olgani tufayli vatanlarida qolishgandi. Klark bu dahshatli xabarni eshitgach, o‘g‘lini bag‘riga bosdi va dedi: “Rahmat, bolajonim”.

Shoakmal tayyorladi.

“Irfon” taqvimining 2013 yil 1-sonidan olindi.

• Олдинги
• Кейинги