Итоатсизлик қилмоқчи бўлсанг...

Иброҳим Адҳамнинг ҳузурларига бир одам келиб: «Эй Абу Исҳоқ, ўз устимдан ҳеч назорат ўрната олмаяпман. Маслаҳат беринг, мендаги бу итоатсизликка бирор чора борми?» дебди. Шунда ҳазрат: «Агар қуйидаги бешта шарт­ни қабул қилиб, уларни амалга татбиқ эта олсанг, итоатсизлигинг сенга ҳеч қандай зиён етказолмайди». «Унда уларни тезроқ айтинг», сабрсизланибди сўровчи.

– Биринчи шарт шу – Аллоҳга  итоатсизлик қилмоқчи бўлсанг, У берган ҳеч нарсани емагин.

– Ие, унда ҳеч нарса еёлмайман, дунёдаги барча нарса Аллоҳники, ахир!

– Шуни била туриб, У Зотга итоатсизлик қилиш тўғрими? – сўрадилар ҳазрат.

– Йўқ, тўғри эмас, – деди бояги киши ва иккинчи шартни сўради.

– Қачон Аллоҳ таолога итоатдан ташқари ишни қилгинг келса, У Зотнинг ерини тарк эт.

– Бу биринчисидан ҳам қийинроқ-ку! Унда мен қаерга бораман?!

– Берган ризқи билан ризқланиб, ерида яшаб туриб, Аллоҳ таолога итоат қилмаслик тўғрими?

– Йўқ, албатта. Учинчи шартни айтинг, эй Абу Исҳоқ.

– Берган ризқидан еб, ерида яшаб, шукр ўрнига итоатсизликка ўтсанг, Аллоҳ таоло сени кўра олмайдиган жой топиб, нима қилсанг, қилавер.

– Бу нима деганингиз, эй Иброҳим? – қичқириб юборди бояги одам. – Ахир, Аллоҳ таолодан беркинадиган ҳеч қандай жой йўқ!

– Шуни била туриб, У Зотнинг амрларига бўйсунмаслик яхшими? Энди тўртинчи шартга келсак, жонингни олиш учун ўлим фариштаси келганида, унга: «Аллоҳга сидқидилдан тавба қилиб, итоатда бўлишим учун  менга озгина вақт бер», деб айт.

– Бунинг асло иложи йўқ...

– Тавба-тазарру учун ўлимингни озгина вақтга ҳам кечиктиролмасанг, нажот топишдан қандай умид қиласан? Ва ниҳоят, бешинчи шарт – азоб фаришталари сени дўзах сари етаклашганида, улар билан бирга борма.

– Кошки улар мендан сўраб ўтиришса экан!

– Шундай бўлгач, Аллоҳ таолога қандай итоатсизлик қилиш мумкин?

– Етар, эй Абу Исҳоқ, етар, – дея йиғлаб юборди бояги одам. – Мен шу ондаёқ Аллоҳга юзланиб тавба қиламан. Ҳеч бир ишда У Зотнинг амр ва қайтариқларидан чиқмайман!

Дилафрўз тайёрлади

“Ирфон” тақвимининг 2011 йил, 3-сонидан олинди.

* * *

Ibrohim Adhamning huzurlariga bir odam kelib: «Ey Abu Ishoq, o‘z ustimdan hech nazorat o‘rnata olmayapman. Maslahat bering, mendagi bu itoatsizlikka biror chora bormi?» debdi. Shunda hazrat: «Agar quyidagi beshta shart­ni qabul qilib, ularni amalga tatbiq eta olsang, itoatsizliging senga hech qanday ziyon yetkazolmaydi». «Unda ularni tezroq ayting», sabrsizlanibdi so‘rovchi.

– Birinchi shart shu – Allohga  itoatsizlik qilmoqchi bo‘lsang, U bergan hech narsani yemagin.

– Ie, unda hech narsa yeyolmayman, dunyodagi barcha narsa Allohniki, axir!

– Shuni bila turib, U Zotga itoatsizlik qilish to‘g‘rimi? – so‘radilar hazrat.

– Yo‘q, to‘g‘ri emas, – dedi boyagi kishi va ikkinchi shartni so‘radi.

– Qachon Alloh taologa itoatdan tashqari ishni qilging kelsa, U Zotning yerini tark et.

– Bu birinchisidan ham qiyinroq-ku! Unda men qaerga boraman?!

– Bergan rizqi bilan rizqlanib, yerida yashab turib, Alloh taologa itoat qilmaslik to‘g‘rimi?

– Yo‘q, albatta. Uchinchi shartni ayting, ey Abu Ishoq.

– Bergan rizqidan yeb, yerida yashab, shukr o‘rniga itoatsizlikka o‘tsang, Alloh taolo seni ko‘ra olmaydigan joy topib, nima qilsang, qilaver.

– Bu nima deganingiz, ey Ibrohim? – qichqirib yubordi boyagi odam. – Axir, Alloh taolodan berkinadigan hech qanday joy yo‘q!

– Shuni bila turib, U Zotning amrlariga bo‘ysunmaslik yaxshimi? Endi to‘rtinchi shartga kelsak, joningni olish uchun o‘lim farishtasi kelganida, unga: «Allohga sidqidildan tavba qilib, itoatda bo‘lishim uchun  menga ozgina vaqt ber», deb ayt.

– Buning aslo iloji yo‘q...

– Tavba-tazarru uchun o‘limingni ozgina vaqtga ham kechiktirolmasang, najot topishdan qanday umid qilasan? Va nihoyat, beshinchi shart – azob farishtalari seni do‘zax sari yetaklashganida, ular bilan birga borma.

– Koshki ular mendan so‘rab o‘tirishsa ekan!

– Shunday bo‘lgach, Alloh taologa qanday itoatsizlik qilish mumkin?

– Yetar, ey Abu Ishoq, yetar, – deya yig‘lab yubordi boyagi odam. – Men shu ondayoq Allohga yuzlanib tavba qilaman. Hech bir ishda U Zotning amr va qaytariqlaridan chiqmayman!

Dilafro‘z tayyorladi

“Irfon” taqvimining 2011 yil, 3-sonidan olindi.

• Олдинги
• Кейинги