Уммат дарди

Рукн: Ибрат Чоп этилган: 11.04.2015

Бир солиҳ киши бойникига зиёфатга чақирилди, даъватга ижобат этиб, меҳмонга борди. Лекин егуликларга қўл чўзмай ўтираверди. Ҳайрон бўлган мезбон ниҳоят:

– Дастурхондаги барча неъматлар ҳалол, шубҳаланмай, бемалол еб ўтиринг, – деди.

Солиҳ киши жавоб берди:

– Менинг бир неча болаларим бор. Улар уйда оч ўтиргани ҳолда, менинг бу ерда турфа таомлар ейишим мурувватдан бўлмас.

Бу гапдан сўнг унинг оиласига дарҳол егуликлар жўнатилди. Шундан кейингина меҳмон овқатлана бошлади.

Қиссадан ҳисса:

Қиёмат кунида Ҳақ таоло Ҳабиби (с.а.в.)ни жаннатга даъват этади. Ҳар турли неъматлар ила безанган жаннат ҳам у зот (с.а.в.)га интизор. Аммо гуноҳкор умматлар қийинчилик ва заҳмат ичра. Шу онда Ҳабибуллоҳ (с.а.в.) улар учун Аллоҳдан мағфират сўраб, ёлворадилар:

– Парвардигорим! Умматимнинг гуноҳкорларини жаҳаннамга ташлама!

Шунда Ҳақ таолодан хитоб бўладики:

– Жаннатимни Сиз учун бино қилдим. Гуноҳкор умматларингизни Сизнинг шафоатингиз ила жаннатга киритаманки, бу раҳматимнинг кенглиги ва ҳузуримда қимматингиз қай даражада юксак эканлиги ифодасидир!

“Ирфон” тақвимининг 2010 йил, 2-сонидан олинди.

* * *

Bir solih kishi boynikiga ziyofatga chaqirildi, da’vatga ijobat etib, mehmonga bordi. Lekin yeguliklarga qo‘l cho‘zmay o‘tiraverdi. Hayron bo‘lgan mezbon nihoyat:

– Dasturxondagi barcha ne’matlar halol, shubhalanmay, bemalol yeb o‘tiring, – dedi.

Solih kishi javob berdi:

– Mening bir necha bolalarim bor. Ular uyda och o‘tirgani holda, mening bu yerda turfa taomlar yeyishim muruvvatdan bo‘lmas.

Bu gapdan so‘ng uning oilasiga darhol yeguliklar jo‘natildi. Shundan keyingina mehmon ovqatlana boshladi.

Qissadan hissa:

Qiyomat kunida Haq taolo Habibi (s.a.v.)ni jannatga da’vat etadi. Har turli ne’matlar ila bezangan jannat ham u zot (s.a.v.)ga intizor. Ammo gunohkor ummatlar qiyinchilik va zahmat ichra. Shu onda Habibulloh (s.a.v.) ular uchun Allohdan mag‘firat so‘rab, yolvoradilar:

– Parvardigorim! Ummatimning gunohkorlarini jahannamga tashlama!

Shunda Haq taolodan xitob bo‘ladiki:

– Jannatimni Siz uchun bino qildim. Gunohkor ummatlaringizni Sizning shafoatingiz ila jannatga kiritamanki, bu rahmatimning kengligi va huzurimda qimmatingiz qay darajada yuksak ekanligi ifodasidir!

“Irfon” taqvimining 2010 yil, 2-sonidan olindi.