Барҳаёт суннатлар

Рукн: Ибрат Чоп этилган: 24.02.2015

Бундан ўн беш аср муқаддам Пайғамбаримиз (с.а.в.) томонларидан айтилган табобат, инсон саломатлигига оид тавсияларнинг нақадар муҳим ва аниқ эканлигини бугунги ривожланган тиббиёт ҳам эътироф этади. Бу эса Расулуллоҳ (с.а.в.)нинг чексиз илм соҳиби эканликларини яна бир тасдиқлайди.

Манбаларда ҳижратгача Мадинадаги одамларнинг кўпчилиги безгак касаллиги билан оғригани ҳақида маълумотлар бор. Пайғамбаримиз (с.а.в.) Мадинага ҳижрат қилганларидан сўнг шаҳар атрофида 30000 туп хурмо дарахтини экишга бошчилик қилганлар. Бу билан безгак хасталигининг олди олинган. Чунки хурмо дарахти намликни камайтириш хусусиятига эга. Айни усул ботқоқликларнинг қуришига сабаб бўлган.

Набий (с.а.в.) вабо ва ўпка сили каби юқумли касалликларга чалинган кишиларни кўпчиликдан узоқлаштириш кераклигини таъкидлаганлар. Шунга кўра, Пайғамбаримиз (с.а.в.) даврларида бу касаллик билан оғриган беморларни тоғда, чўпонлар билан қолдиришган ва уларга кўпроқ сут ичиришни тайинлашган. Тоғнинг тоза ҳавоси ва табиий омиллар таъсирида даво топганларидан сўнг яна Мадинага қайтишган.

Яна Расулуллоҳ (с.а.в.) бир ҳадисларида: “Вабо, ўлат каби касалликлар тарқаган шаҳарга кирмангиз ҳам ва у ердан чиқиб ҳам кетмангиз”, деган тавсияни берганлар (Имом Бухорий ривояти). Бу эса бугунги тиббиёт тилида карантинни ифодалайди.

Яна Жанобимиз (с.а.в.) кўзи оғриган кишиларга кўпроқ хурмо ейишни, иситма чиққанда баданни совуқ сувда чайишни тавсия этганлар. Бугунги тиббиётда ҳам бу тавсиялар ўз аҳамиятини йўқотмаган.

Расулуллоҳ (с.а.в.)нинг айтганларига, суннат тарзида васият қилган тавсияларига амал қилиш умримизни гўзаллаштиради, охиратимиз хайрини таъминлайди.

Мадина Зарипова тайёрлади

“Ирфон” тақвимининг 2009 йил, 2-сонидан олинди.

* * *

Bundan o‘n besh asr muqaddam Payg‘ambarimiz (s.a.v.) tomonlaridan aytilgan tabobat, inson salomatligiga oid tavsiyalarning naqadar muhim va aniq ekanligini bugungi rivojlangan tibbiyot ham e’tirof etadi. Bu esa Rasululloh (s.a.v.)ning cheksiz ilm sohibi ekanliklarini yana bir tasdiqlaydi.

Manbalarda hijratgacha Madinadagi odamlarning ko‘pchiligi bezgak kasalligi bilan og‘rigani haqida ma’lumotlar bor. Payg‘ambarimiz (s.a.v.) Madinaga hijrat qilganlaridan so‘ng shahar atrofida 30000 tup xurmo daraxtini ekishga boshchilik qilganlar. Bu bilan bezgak xastaligining oldi olingan. Chunki xurmo daraxti namlikni kamaytirish xususiyatiga ega. Ayni usul botqoqliklarning qurishiga sabab bo‘lgan.

Nabiy (s.a.v.) vabo va o‘pka sili kabi yuqumli kasalliklarga chalingan kishilarni ko‘pchilikdan uzoqlashtirish kerakligini ta’kidlaganlar. Shunga ko‘ra, Payg‘ambarimiz (s.a.v.) davrlarida bu kasallik bilan og‘rigan bemorlarni tog‘da, cho‘ponlar bilan qoldirishgan va ularga ko‘proq sut ichirishni tayinlashgan. Tog‘ning toza havosi va tabiiy omillar ta’sirida davo topganlaridan so‘ng yana Madinaga qaytishgan.

Yana Rasululloh (s.a.v.) bir hadislarida: “Vabo, o‘lat kabi kasalliklar tarqagan shaharga kirmangiz ham va u yerdan chiqib ham ketmangiz”, degan tavsiyani berganlar (Imom Buxoriy rivoyati). Bu esa bugungi tibbiyot tilida karantinni ifodalaydi.

Yana Janobimiz (s.a.v.) ko‘zi og‘rigan kishilarga ko‘proq xurmo yeyishni, isitma chiqqanda badanni sovuq suvda chayishni tavsiya etganlar. Bugungi tibbiyotda ham bu tavsiyalar o‘z ahamiyatini yo‘qotmagan.

Rasululloh (s.a.v.)ning aytganlariga, sunnat tarzida vasiyat qilgan tavsiyalariga amal qilish umrimizni go‘zallashtiradi, oxiratimiz xayrini ta’minlaydi.

Madina Zaripova tayyorladi

“Irfon” taqvimining 2009 yil, 2-sonidan olindi.