Кўйлаги ямоқ бола
Ҳазрат Умар ибн Хаттобнинг (розияллоҳу анҳу) ёш ўғиллари кўчада болалар билан ўйнар эди. Боланинг кўйлагига бир неча ямоқ солинган бўлиб, тенгқурлари унинг устидан кулишди. "Отанг амирул мўминин бўлса-ю, сен шундай йиртиқ-ямоқ кийимда юрсанг", деб камситишди. Ҳазрат Умар (розияллоҳу анҳу) ўғиллари бундан жуда хафа бўлди. Отасининг ҳузурига бориб:
– Болалар кийимимдаги ямоқларни кўриб, устимдан кулишяпти, – деб бўлган воқеани сўзлаб берди.
Шунда Ҳазрат Умар (розияллоҳу анҳу) ўғлига:
– Хазиначига бориб, хазинадан бир кийимлик мато берар экансиз, отам маошларидан олиб ўрнига қўяр эканлар, дегин, – деб тайинладилар.
Ўғил хазиначининг олдига бориб амирул мўмининнинг сўзларини айтди. Хазиначи унга:
– Агар отангиз маош олгунларича яшаб туришларига кафолат берсалар, сиз айтган матони бераман, – деди.
Ўғил хазиначининг ҳеч нарса бермаcлигини тушунди. Оталари Ҳазрат Умар (розияллоҳу анҳу) ҳузурларига бориб, хазиначи нима деб жавоб берганини айтди. Шунда Умари Одил:
– Агар хазиначи сен айтган матони бериб юборганида эди, мен уни шу ондаёқ ишдан бўшатган бўлар эдим, – дедилар, сўнгра ўғилларига таскин бердилар.
* * *
Hazrat Umar ibn Xattobning (roziyallohu anhu) yosh o‘g‘illari ko‘chada bolalar bilan o‘ynar edi. Bolaning ko‘ylagiga bir necha yamoq solingan bo‘lib, tengqurlari uning ustidan kulishdi. "Otang amirul mo‘minin bo‘lsa-yu, sen shunday yirtiq-yamoq kiyimda yursang", deb kamsitishdi. Hazrat Umar (roziyallohu anhu) o‘g‘illari bundan juda xafa bo‘ldi. Otasining huzuriga borib:
– Bolalar kiyimimdagi yamoqlarni ko‘rib, ustimdan kulishyapti, – deb bo‘lgan voqeani so‘zlab berdi.
Shunda Hazrat Umar (roziyallohu anhu) o‘g‘liga:
– Xazinachiga borib, xazinadan bir kiyimlik mato berar ekansiz, otam maoshlaridan olib o‘rniga qo‘yar ekanlar, degin, – deb tayinladilar.
O‘g‘il xazinachining oldiga borib amirul mo‘mininning so‘zlarini aytdi. Xazinachi unga:
– Agar otangiz maosh olgunlaricha yashab turishlariga kafolat bersalar, siz aytgan matoni beraman, – dedi.
O‘g‘il xazinachining hech narsa bermacligini tushundi. Otalari Hazrat Umar (roziyallohu anhu) huzurlariga borib, xazinachi nima deb javob berganini aytdi. Shunda Umari Odil:
– Agar xazinachi sen aytgan matoni berib yuborganida edi, men uni shu ondayoq ishdan bo‘shatgan bo‘lar edim, – dedilar, so‘ngra o‘g‘illariga taskin berdilar.