Шайтон васвасаси иймондан айирадими?

Рукн: Ибрат Чоп этилган: 10.12.2014
Ашраф Али Таҳонавий айтадилар:
«Бир киши менга хат ёзиб, ўз ҳолатини баён этди:
«Ҳазрат, менинг қалбимга шундай ярамас, қабиҳ фикрлар, алфози куфрлар келадики, агар у гапларни тилимга чиқариб юборсам, кофир бўлиб кетаман, деб қўрқаман. Мана шундай ифлос фикрлар кўнглимга келганда мен иймондан ажраб қолмайманми? Ушбу мактубни ёзяпман-у, шуларни ўйлаб, кўзимдан ёш тўхтамаяпти…»
Кейин мен унга жавоб ёздим:
«Шундай хаёлотлар келганда сиз уни қандай қаршилаяпсиз?»
«Тақсир, бунақа ҳолатда қалбим эзилиб кетади. Ҳалиги ярамас хаёлни ичимдан чиқараман, деб ўзимни қийнаб, йиғлашгача бораман, аламланиб кетаман».
«Сиз бешак мусулмонсиз. Аллоҳ агар сизга раҳм қилмаганида шу фикрни тилингизга чиқарган бўларди. Расулуллоҳ с.а.в. дердилар: «Шайтоннинг ишини фақат васваса қилиш қилиб қўйган Аллоҳга ҳамду санолар бўлсин!» Демак, шайтон бизни васваса қилади-ю, ундан уёғига ўта олмайди. Шайтон зинога даъват қилиши мумкин, лекин сизнинг қўлингиздан етаклаб, у ишни қилдиролмайди. 
Менинг даргоҳимда минглаб инсон ваъз тинглайди. Қани биронтаси туриб «менинг қорнимда нажосат йўқ», деб айтсин-чи. Модомики, ҳамманинг қорнида нажосат бор экан, то у ташқарига чиқмагунча таҳорат синмаяптими, қалбдаги ифлос нарсалар тилга чиқмагунча иймон ҳам синмайди».
 
* * *
 
Ashraf Ali Tahonaviy aytadilar:
«Bir kishi menga xat yozib, o‘z holatini bayon etdi:
«Hazrat, mening qalbimga shunday yaramas, qabih fikrlar, alfozi kufrlar keladiki, agar u gaplarni tilimga chiqarib yuborsam, kofir bo‘lib ketaman, deb qo‘rqaman. Mana shunday iflos fikrlar ko‘nglimga kelganda men iymondan ajrab qolmaymanmi? Ushbu maktubni yozyapman-u, shularni o‘ylab, ko‘zimdan yosh to‘xtamayapti…»
Keyin men unga javob yozdim:
«Shunday xayolotlar kelganda siz uni qanday qarshilayapsiz?»
«Taqsir, bunaqa holatda qalbim ezilib ketadi. Haligi yaramas xayolni ichimdan chiqaraman, deb o‘zimni qiynab, yig‘lashgacha boraman, alamlanib ketaman».
«Siz beshak musulmonsiz. Alloh agar sizga rahm qilmaganida shu fikrni tilingizga chiqargan bo‘lardi. Rasululloh s.a.v. derdilar: «Shaytonning ishini faqat vasvasa qilish qilib qo‘ygan Allohga hamdu sanolar bo‘lsin!» Demak, shayton bizni vasvasa qiladi-yu, undan uyog‘iga o‘ta olmaydi. Shayton zinoga da’vat qilishi mumkin, lekin sizning qo‘lingizdan yetaklab, u ishni qildirolmaydi. 
Mening dargohimda minglab inson va’z tinglaydi. Qani birontasi turib «mening qornimda najosat yo‘q», deb aytsin-chi. Modomiki, hammaning qornida najosat bor ekan, to u tashqariga chiqmaguncha tahorat sinmayaptimi, qalbdagi iflos narsalar tilga chiqmaguncha iymon ham sinmaydi».