«Худо» билан гаплашган оми

Рукн: Ибрат Чоп этилган: 03.11.2015

Ҳасан Басрийнинг бир оми муридлари бўлиб, доим у кишини зиёрат қиларкан. Анча пайт зиёратга келмаган муридларини бир куни шайх кўчада кўриб қолиб, нега келмаётганлигини сўрабдилар.

— Тақсир, мен Худога етишиб қолдим. Ҳар куни хуфтондан сўнг Аллоҳ билан гаплашяпман.

— Бугун ҳам Худо билан муножот қилганингда менинг номимни ҳам эслаб қўй, — дебдилар шайх.

Оми шогирд ўз тасаввурича бу кеча ҳам Худо билан муножот қилаётиб, устознинг гапини эслаб, Ҳасан Басрий дебди. Шунда тасаввури буткул тарқаб, гўнгхонада ўтирганини кўрибди.

Шайтон ҳар куни васваса қилиб, уни гўнгтепага олиб келар ва гўё худо билан гаплашаётгандек тасаввур уйғотарди.

Сўфи Оллоёр айтадилар: «Кўрдингизми, яхши одамнинг номики шайтоннинг ишини хабата қилиб, уни қочирдими, энди ўша яхши одам уйингизда пайдо бўлса, у хонадонга шайтон кира олармиди? Шундай экан фарзандингизни яхши одам қилиб тарбияланг, уларни илмли қилинг!»

* * *

Hasan Basriyning bir omi muridlari bo‘lib, doim u kishini ziyorat qilarkan. Ancha payt ziyoratga kelmagan muridlarini bir kuni shayx ko‘chada ko‘rib qolib, nega kelmayotganligini so‘rabdilar.

— Taqsir, men Xudoga yetishib qoldim. Har kuni xuftondan so‘ng Alloh bilan gaplashyapman.

— Bugun ham Xudo bilan munojot qilganingda mening nomimni ham eslab qo‘y, — debdilar shayx.

Omi shogird o‘z tasavvuricha bu kecha ham Xudo bilan munojot qilayotib, ustozning gapini eslab, Hasan Basriy debdi. Shunda tasavvuri butkul tarqab, go‘ngxonada o‘tirganini ko‘ribdi.

Shayton har kuni vasvasa qilib, uni go‘ngtepaga olib kelar va go‘yo xudo bilan gaplashayotgandek tasavvur uyg‘otardi.

So‘fi Olloyor aytadilar: «Ko‘rdingizmi, yaxshi odamning nomiki shaytonning ishini xabata qilib, uni qochirdimi, endi o‘sha yaxshi odam uyingizda paydo bo‘lsa, u xonadonga shayton kira olarmidi? Shunday ekan farzandingizni yaxshi odam qilib tarbiyalang, ularni ilmli qiling!»