Виждонимга қулоқ тутганимдан бахтиёрман

2012 йилнинг декабр ойида Наварра шаҳрида енгил атлетика бўйича муҳим мусобақалар бўлиб ўтди. Ютуққа катта миқдордаги пул мукофоти қўйилди. Мусобақаларда дунёнинг энг кучли спортчилари, жумладан, Лондондаги Олимпиада ўйинларида 3000 метрга тўсиқлар оша югуриш бўйича бронза медали совриндори кениялик Абал Мутаи ҳам иштирок этди. У барча саралаш баҳсларида ишонч билан ғалаба қозониб, финалга қадар етиб келди. Финалда финиш чизиғига чамаси ўн метрлар қолганда, масофани тўла босиб ўтдим, деб ўйлаб тўхтаб қолди ва мухлисларга қараб қарсак чала бошлади. Мутаи трибунадан испан тилида финиш чизиғига яна ўн метр борлиги ҳақида янграётган қичқириқларга эътибор бермасди.

Унинг ортидан испаниялик Иван Фернандес Анайя изма-из таъқиб қилиб келарди. Анайя кениялик спортчидан бемалол ўтиб кетиб, мусобақа ғолибига айланиши мумкин эди. Аммо бунинг ўрнига... Мутаини елкасидан итариб, қўли билан финиш чизиғигача масофа борлигига ишора қилди. Испаниялик спортчи ғалаба қозониш имкониятини кўкка совуриб, кениялик рақибини финишга деярли олиб келди, қувиб ўтмади.

Мусобақа тугагач, Иван Фернандес Анайядан “Ғалаба қозонишни истамадингизми?” деб сўрашди. 24 ёшли спортчи: “Йўқ, ғолиб бўлишни жудаям истагандим. Бироқ агар Испания термаси таркибида Европа чемпионатига бериладиган йўлланма бўлганда ҳам, шу йўлни тутардим. Чунки мен ғалабага ҳақли эмасдим. Орамиздаги масофа узоқ, агар Мутаи хато қилмаса, уни қувиб ўтиш имконим йўқ эди. Мен учун олтин медалдан кўра ўзлигимни сақлаб қолиш муҳим. Мен шундай қилганимдан, виждон амрига қулоқ тутганимдан бахтиёрман”.

Шоакмал тайёрлади.

“Ирфон” тақвимининг 2013 йил 2-сонидан олинди.

* * *

2012 yilning dekabr oyida Navarra shahrida yengil atletika bo‘yicha muhim musobaqalar bo‘lib o‘tdi. Yutuqqa katta miqdordagi pul mukofoti qo‘yildi. Musobaqalarda dunyoning eng kuchli sportchilari, jumladan, Londondagi Olimpiada o‘yinlarida 3000 metrga to‘siqlar osha yugurish bo‘yicha bronza medali sovrindori keniyalik Abal Mutai ham ishtirok etdi. U barcha saralash bahslarida ishonch bilan g‘alaba qozonib, finalga qadar yetib keldi. Finalda finish chizig‘iga chamasi o‘n metrlar qolganda, masofani to‘la bosib o‘tdim, deb o‘ylab to‘xtab qoldi va muxlislarga qarab qarsak chala boshladi. Mutai tribunadan ispan tilida finish chizig‘iga yana o‘n metr borligi haqida yangrayotgan qichqiriqlarga e’tibor bermasdi.

Uning ortidan ispaniyalik Ivan Fernandes Anayya izma-iz ta’qib qilib kelardi. Anayya keniyalik sportchidan bemalol o‘tib ketib, musobaqa g‘olibiga aylanishi mumkin edi. Ammo buning o‘rniga... Mutaini yelkasidan itarib, qo‘li bilan finish chizig‘igacha masofa borligiga ishora qildi. Ispaniyalik sportchi g‘alaba qozonish imkoniyatini ko‘kka sovurib, keniyalik raqibini finishga deyarli olib keldi, quvib o‘tmadi.

Musobaqa tugagach, Ivan Fernandes Anayyadan “G‘alaba qozonishni istamadingizmi?” deb so‘rashdi. 24 yoshli sportchi: “Yo‘q, g‘olib bo‘lishni judayam istagandim. Biroq agar Ispaniya termasi tarkibida Yevropa chempionatiga beriladigan yo‘llanma bo‘lganda ham, shu yo‘lni tutardim. Chunki men g‘alabaga haqli emasdim. Oramizdagi masofa uzoq, agar Mutai xato qilmasa, uni quvib o‘tish imkonim yo‘q edi. Men uchun oltin medaldan ko‘ra o‘zligimni saqlab qolish muhim. Men shunday qilganimdan, vijdon amriga quloq tutganimdan baxtiyorman”.

Shoakmal tayyorladi.

“Irfon” taqvimining 2013 yil 2-sonidan olindi.

• Олдинги
• Кейинги