“Умра-2015” баҳорги мавсуми бошланди

Рукн: Янгиликлар Чоп этилган: 10.02.2015

Ўзбекистон мусулмонлари идораси халқаро алоқалар бўлимининг хабар беришича, “Умра-2015” баҳорги мавсуми бошланди. 9 февраль куни ўзбекистонлик зиёратчиларнинг биринчи гуруҳи Тошкент–Жидда йўналишида умра амалларини адо этиш мақсадида Саудия Арабистонига жўнаб кетди.

“Умра-2015” Баҳор мавсумининг биринчи рейсида учиш зиёратчи, ишчи гуруҳи, гуруҳ раҳбарлари, шифокорлар ва ошпазлардан иборат 175 нафар  зиёратчиларга насиб этди.

Турли вилоят ва Қорақалпоғистон Республикаси зиёратчиларининг  Саудия Арабистонига учиш вақтларига қадар бир муддат вақт борлигини эътиборга олган ҳолда, уларнинг роҳатини таъминлаш мақсадида Ўзбекистон мусулмонлари идораси билан “Тошшаҳартрансхизмат” АК   ўртасида тузилган шартномага мувофиқ, зиёратчилар махсус бириктирилган автобусларда “Тошкент-3” маҳаллий аэропорти ва темир йўл вокзалидан “Новза” масжидига олиб келинади. Уларга “Новза” масжидида турар-жой, озиқ-овқат ва автобус хизматини амалга ошириш кўзда тутилган.

Зиёратчиларимизга Маккаи мукаррамада “Совфа ал-Миад” ва Мадинаи мунавварада “Файрузат ал-Хайр” меҳмонхоналарида “ал-Ҳидоя” ширкати томонидан хизмат кўрсатилади. Зиёратчиларни Жидда аэропортида кутиб олиш ва кузатиш тадбирлари “Ҳаж” ва “Умра” масалалари бўйича Атташе З.Абдуллаев бошчилигида ишчи гуруҳи ва “ал-Ҳидоя” ширкати ходимлари билан биргаликда, уюшган ҳолда амалга оширилади. Сафар мобайнида фуқароларимиз Макка ва Мадина шаҳарларидаги тарихий жойларни зиёрат қилишга муяссар бўлишади. Зиёратчилар Мадинаи мунавварада 3 кечаю 4 кундуз ва Маккаи мукаррамада 7 кечаю 6 кундуз бўлишади.

* * *

O‘zbekiston musulmonlari idorasi xalqaro aloqalar bo‘limining xabar berishicha, “Umra-2015” bahorgi mavsumi boshlandi. 9 fevral kuni o‘zbekistonlik ziyoratchilarning birinchi guruhi Toshkent–Jidda yo‘nalishida umra amallarini ado etish maqsadida Saudiya Arabistoniga jo‘nab ketdi.

“Umra-2015” Bahor mavsumining birinchi reysida uchish ziyoratchi, ishchi guruhi, guruh rahbarlari, shifokorlar va oshpazlardan iborat 175 nafar  ziyoratchilarga nasib etdi.

Turli viloyat va Qoraqalpog‘iston Respublikasi ziyoratchilarining  Saudiya Arabistoniga uchish vaqtlariga qadar bir muddat vaqt borligini e’tiborga olgan holda, ularning rohatini ta’minlash maqsadida O‘zbekiston musulmonlari idorasi bilan “Toshshahartransxizmat” AK   o‘rtasida tuzilgan shartnomaga muvofiq, ziyoratchilar maxsus biriktirilgan avtobuslarda “Toshkent-3” mahalliy aeroporti va temir yo‘l vokzalidan “Novza” masjidiga olib kelinadi. Ularga “Novza” masjidida turar-joy, oziq-ovqat va avtobus xizmatini amalga oshirish ko‘zda tutilgan.

Ziyoratchilarimizga Makkai mukarramada “Sovfa al-Miad” va Madinai munavvarada “Fayruzat al-Xayr” mehmonxonalarida “al-Hidoya” shirkati tomonidan xizmat ko‘rsatiladi. Ziyoratchilarni Jidda aeroportida kutib olish va kuzatish tadbirlari “Haj” va “Umra” masalalari bo‘yicha Attashe Z.Abdullaev boshchiligida ishchi guruhi va “al-Hidoya” shirkati xodimlari bilan birgalikda, uyushgan holda amalga oshiriladi. Safar mobaynida fuqarolarimiz Makka va Madina shaharlaridagi tarixiy joylarni ziyorat qilishga muyassar bo‘lishadi. Ziyoratchilar Madinai munavvarada 3 kechayu 4 kunduz va Makkai mukarramada 7 kechayu 6 kunduz bo‘lishadi.