Ўзбекистоннинг бир қанча масжидларида “Шарли Эбдо” карикатураларига кескин муносабат билдирилди

Рукн: Янгиликлар Чоп этилган: 23.01.2015

Бугунги жума маърузаларида Ўзбекистоннинг бир қанча масжидларида Франциянинг “Шарли Эбдо” журнали чоп этган карикатураларга нисбатан кескин муносабат билдирилди. Ўтган ҳафта 5 миллион нусхада, мусулмонларнинг севимли пайғамбари Муҳаммад с.а.в.ни мазах қилган  карикатуралар билан сотувга чиқарилган журнал бутун дунё мусулмонларининг норозилигига сабаб бўлган эди. Бунга қарши қатор мамлакатларда норозилик намойишлари бўлиб ўтди.

“Мусулмонларнинг туйғуларини ҳақорат қилиш, пайғамбарлар шахсини беҳурмат қилувчи масхара расмларни нашр этиш ҳеч қандай қолипга сиғмайдиган, инсонийлик меъёрларига буткул зид бўлган ишдир. Буни инсон ҳуқуқлари билан оқлаб бўлмайди. Бу ишлар мусулмонларга нисбатан қилинаётган катта фитнадир”, дейилади маърузалардан бирида.

Куни кеча Ўзбекистон Президенти Ислом Каримов Олий Мажлис Сенатининг 22 январь, пайшанба куни бўлиб ўтган биринчи мажлисида Парижда “Шарли Эбдо” журнали таҳририятида амалга оширилган теракт ва ундан кейинги воқеалар юзасидан фикр билдирар экан, “Мана яқинда Францияда бўлган намойишни оладиган бўлсак, бунақа ўйинлар ҳаммаси - хўжакўрсинлик учун, ҳаммаси сохта обрў топиш учун бўляпти. Диний масалани ўртага қўйиш, сиëсатлаштириш, бу - бирорта динга ëқмайди. Эътибор беринглар, дунëда тинчлик бўлиб, озгина мустаҳкамлашиб бораëтганда, албатта битта бемаза иш чиқиб қолади. Бунақа ўйинлар ҳисобидан обрў топиш - популизмдир. Ўзбекча айтганда, мусулмонча айтганда, муқаддас динимизни мана шунақа ўйинлар учун ишлатиш, бу - уволдир. Бу дунëда ҳам, у дунëда ҳам Худо бунақаларни ҳеч қачон кечирмайди. Шуни жуда чуқур билишимиз керак”, - деб таъкидлаганди.

Бундан аввал Шайх Муҳаммад Содиқ Муҳаммад Юсуф ҳазратлари ҳам карикатураларга муносабатини шу тарзда билдирган эдилар:

“Расулуллоҳ соллаллоҳу алайҳи васалламни карикатура қилиш мутлақо нотўғи. Ғарбликларнинг кўпчилиги ҳам бу ҳақиқатни тан олишади. Бу биринчи бор бўлаётгани йўқ. Авваллари ҳам бир неча марта бўлган. Бутун дунё бўйлаб норозиликлар бўлган. Халқаро ташкилотлар бундай қилмасликка чақирган. Аммо баъзилар бу ишни ўзига касб қилиб олганга ўхшайди. Барчага хилоф иш қилиб ном чиқаришга уринишган бўлишлари мумкин. Мусулмонлар учун Расулуллоҳ соллаллоҳу алайҳи васаллам жонларидан ҳам устин. Муҳаммад Мустафо соллаллоҳу алайҳи васалламнинг ўзларидан ҳам устин кўришлари матлуб.”

* * *

Bugungi juma ma’ruzalarida O‘zbekistonning bir qancha masjidlarida Frantsiyaning “Sharli Ebdo” jurnali chop etgan karikaturalarga nisbatan keskin munosabat bildirildi. O‘tgan hafta 5 million nusxada, musulmonlarning sevimli payg‘ambari Muhammad s.a.v.ni mazax qilgan  karikaturalar bilan sotuvga chiqarilgan jurnal butun dunyo musulmonlarining noroziligiga sabab bo‘lgan edi. Bunga qarshi qator mamlakatlarda norozilik namoyishlari bo‘lib o‘tdi.

“Musulmonlarning tuyg‘ularini haqorat qilish, payg‘ambarlar shaxsini behurmat qiluvchi masxara rasmlarni nashr etish hech qanday qolipga sig‘maydigan, insoniylik me’yorlariga butkul zid bo‘lgan ishdir. Buni inson huquqlari bilan oqlab bo‘lmaydi. Bu ishlar musulmonlarga nisbatan qilinayotgan katta fitnadir”, deyiladi ma’ruzalardan birida.

Kuni kecha O‘zbekiston Prezidenti Islom Karimov Oliy Majlis Senatining 22 yanvar, payshanba kuni bo‘lib o‘tgan birinchi majlisida Parijda “Sharli Ebdo” jurnali tahririyatida amalga oshirilgan terakt va undan keyingi voqealar yuzasidan fikr bildirar ekan, “Mana yaqinda Frantsiyada bo‘lgan namoyishni oladigan bo‘lsak, bunaqa o‘yinlar hammasi - xo‘jako‘rsinlik uchun, hammasi soxta obro‘ topish uchun bo‘lyapti. Diniy masalani o‘rtaga qo‘yish, siësatlashtirish, bu - birorta dinga ëqmaydi. E’tibor beringlar, dunëda tinchlik bo‘lib, ozgina mustahkamlashib boraëtganda, albatta bitta bemaza ish chiqib qoladi. Bunaqa o‘yinlar hisobidan obro‘ topish - populizmdir. O‘zbekcha aytganda, musulmoncha aytganda, muqaddas dinimizni mana shunaqa o‘yinlar uchun ishlatish, bu - uvoldir. Bu dunëda ham, u dunëda ham Xudo bunaqalarni hech qachon kechirmaydi. Shuni juda chuqur bilishimiz kerak”, - deb ta’kidlagandi.

Bundan avval Shayx Muhammad Sodiq Muhammad Yusuf hazratlari ham karikaturalarga munosabatini shu tarzda bildirgan edilar:

“Rasululloh sollallohu alayhi vasallamni karikatura qilish mutlaqo noto‘g‘i. G‘arbliklarning ko‘pchiligi ham bu haqiqatni tan olishadi. Bu birinchi bor bo‘layotgani yo‘q. Avvallari ham bir necha marta bo‘lgan. Butun dunyo bo‘ylab noroziliklar bo‘lgan. Xalqaro tashkilotlar bunday qilmaslikka chaqirgan. Ammo ba’zilar bu ishni o‘ziga kasb qilib olganga o‘xshaydi. Barchaga xilof ish qilib nom chiqarishga urinishgan bo‘lishlari mumkin. Musulmonlar uchun Rasululloh sollallohu alayhi vasallam jonlaridan ham ustin. Muhammad Mustafo sollallohu alayhi vasallamning o‘zlaridan ham ustin ko‘rishlari matlub.”