Жамоат жойларида спиртли ичимлик ичганлик ва тамаки чекканлик учун жарима солинади

Ўзбекистон Президенти томонидан 19 февралда имзоланган «Соғлом бола йили» давлат дастурида Маъмурий жавобгарлик тўғрисидаги Кодексга жамоат жойларида спиртли ичимлик ичганлик ва тамаки чекканлик учун жазо чораларини белгиловчи тузатишларни ишлаб чиқиш кўзда тутилган.

Маъмурий жавобгарлик тўғрисидаги кодексга тузатишлар киритиш тўғрисидаги қонун лойиҳаси 2014 йилнинг тўртинчи чорагида ишлаб чиқилади. Режага кўра, унда жамоат жойларида алкогол маҳсулотни истеъмол қилганлик учун маъмурий жарималар миқдорида оширилади, шунингдек, жамоат жойларида тамаки маҳсулотларини истеъмол қилиш ҳамда алкогол ва тамаки маҳсулотларини тарғиб қилганлик учун маъмурий чоралар белгиланади.

Ўзбекистон Президенти томонидан имзоланган 2011 йил 5 октябрда «Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги қонун талабларини бузганлик учун Маъмурий жавобгарлик тўғрисидаги кодекс ва бошқа қонун ҳужжатларига киритиладиган тузатишлар ишлаб чиқилган, бироқ охир-оқибат улар қабул қилинмаган эди.

Қонунга асосан, алкогол маҳсулотларни иш жойида, кўчаларда, стадионларда, хиёбонларда, хиёбонлар, истироҳат боғларида, жамоат транспортининг барча турларида ва бошқа жамоат жойларида алкоголь маҳсулотини истеъмол қилишга йўл қўйилмайди. Мазкур қоида алкоголь маҳсулотини қуйиб реализация қилиш рухсат этилган савдо ва умумий овқатланиш объектларига, шунингдек тўйлар, юбилейлар ва бошқа тантаналар ҳамда маросимлар ўтказиладиган жойларга нисбатан татбиқ этилмайди.

Иш жойларида, соғлиқни сақлаш, таълим, спорт-соғломлаштириш муассасаларида, ёнғин чиқиш хавфи бўлган жойларда, шу жумладан автомобилларга ёнилғи қуйиш шохобчаларида ва бошқа жамоат жойларида, тамаки маҳсулотини (носвой ҳам ушбу маҳсулот қаторига киритилган) истеъмол қилиш учун махсус ажратилган жойлар ва (ёки) хоналар бундан мустасно, шунингдек жамоат транспортининг барча турларида тамаки маҳсулотини истеъмол қилишга йўл қўйилмайди.

Қонун талабларини бузганлик учун жазолар у қадар қатъий эмаслиги сабаб, одамлар уларга ҳар доим ҳам риоя этаверишмайди. Хусусан, кўчалар, стадионлар, хиёбонлар, истироҳат боғлари, жамоат транспорти ва бошқа жамоат жойлари (рухсат этилган савдо ва умумий овқатланиш объектларидан ташқари)да спиртли ичимлик ичганлик учун энг кам иш ҳақи (ҳозирча – 96 минг 105 сўм)нинг 1/10 баравари (9 минг 610 сўм)дан 1/3 баравари (32 минг 35 сўм)гача жарима кўзда тутилган.

Жамоат жойларида тамаки маҳсулотларини истеъмол қилганлик учун эса Маъмурий жавобгарлик тўғрисидаги кодексда ҳеч қандай чора кўзда тутилмаган. Фақатгина жамоат транспорида чекканлик учун жарима белгиланган бўлиб, у энг кам иш ҳақининг 1/20 баравари (4 минг 805 сўм)ни ташкил этади.

O‘zbekiston Prezidenti tomonidan 19 fevralda imzolangan «Sog‘lom bola yili» davlat dasturida Ma’muriy javobgarlik to‘g‘risidagi Kodeksga jamoat joylarida spirtli ichimlik ichganlik va tamaki chekkanlik uchun jazo choralarini belgilovchi tuzatishlarni ishlab chiqish ko‘zda tutilgan.

Ma’muriy javobgarlik to‘g‘risidagi kodeksga tuzatishlar kiritish to‘g‘risidagi qonun loyihasi 2014 yilning to‘rtinchi choragida ishlab chiqiladi. Rejaga ko‘ra, unda jamoat joylarida alkogol mahsulotni iste’mol qilganlik uchun ma’muriy jarimalar miqdorida oshiriladi, shuningdek, jamoat joylarida tamaki mahsulotlarini iste’mol qilish hamda alkogol va tamaki mahsulotlarini targ‘ib qilganlik uchun ma’muriy choralar belgilanadi.

O‘zbekiston Prezidenti tomonidan imzolangan 2011 yil 5 oktyabrda «Alkogol va tamaki mahsulotlarining tarqatilishi hamda iste’mol qilinishini cheklash to‘g‘risida»gi qonun talablarini buzganlik uchun Ma’muriy javobgarlik to‘g‘risidagi kodeks va boshqa qonun hujjatlariga kiritiladigan tuzatishlar ishlab chiqilgan, biroq oxir-oqibat ular qabul qilinmagan edi.

Qonunga asosan, alkogol mahsulotlarni ish joyida, ko‘chalarda, stadionlarda, xiyobonlarda, xiyobonlar, istirohat bog‘larida, jamoat transportining barcha turlarida va boshqa jamoat joylarida alkogol mahsulotini iste’mol qilishga yo‘l qo‘yilmaydi. Mazkur qoida alkogol mahsulotini quyib realizatsiya qilish ruxsat etilgan savdo va umumiy ovqatlanish ob’ektlariga, shuningdek to‘ylar, yubileylar va boshqa tantanalar hamda marosimlar o‘tkaziladigan joylarga nisbatan tatbiq etilmaydi.

Ish joylarida, sog‘liqni saqlash, ta’lim, sport-sog‘lomlashtirish muassasalarida, yong‘in chiqish xavfi bo‘lgan joylarda, shu jumladan avtomobillarga yonilg‘i quyish shoxobchalarida va boshqa jamoat joylarida, tamaki mahsulotini (nosvoy ham ushbu mahsulot qatoriga kiritilgan) iste’mol qilish uchun maxsus ajratilgan joylar va (yoki) xonalar bundan mustasno, shuningdek jamoat transportining barcha turlarida tamaki mahsulotini iste’mol qilishga yo‘l qo‘yilmaydi.

Qonun talablarini buzganlik uchun jazolar u qadar qat’iy emasligi sabab, odamlar ularga har doim ham rioya etaverishmaydi. Xususan, ko‘chalar, stadionlar, xiyobonlar, istirohat bog‘lari, jamoat transporti va boshqa jamoat joylari (ruxsat etilgan savdo va umumiy ovqatlanish ob’ektlaridan tashqari)da spirtli ichimlik ichganlik uchun eng kam ish haqi (hozircha – 96 ming 105 so‘m)ning 1/10 baravari (9 ming 610 so‘m)dan 1/3 baravari (32 ming 35 so‘m)gacha jarima ko‘zda tutilgan.

Jamoat joylarida tamaki mahsulotlarini iste’mol qilganlik uchun esa Ma’muriy javobgarlik to‘g‘risidagi kodeksda hech qanday chora ko‘zda tutilmagan. Faqatgina jamoat transporida chekkanlik uchun jarima belgilangan bo‘lib, u eng kam ish haqining 1/20 baravari (4 ming 805 so‘m)ni tashkil etadi.

• Олдинги
• Кейинги