2014 йилда 6400 дан зиёд юртдошларимиз Умра зиёратига боришади

Дин ишлари бўйича қўмита Ахборот хизматининг маълум қилишича, 2014 йилда Республикамиз бўйича баҳорги Умра мавсумида 5 750 дан зиёд, Рамазон мавсумида эса 650 дан зиёд, жами 6400 дан зиёд зиёратчиларимиз муборак сафарга юбориш режалаштирилмоқда. Жумладан, 2013 йил Рамазон мавсумида Саудия Арабистони томонидан кўрсатилган муайян сабабларга кўра Умра сафарига бора олмаган 400 нафарга яқин зиёратчилар Жамоатчилик кенгаши қарорига асосан “Умра-2014” баҳор мавсумида зиёратга юборилиши кўзда тутилган.

Зиёратчиларимизни олиб бориш ва келиш муддати жорий йилнинг 15 февралдан 15 майга қадар давом этади.

Мадина шаҳрида зиёратчиларимиз 4 кун давомида Масжиди Набавийдан 25 метр масофадаги “Ажниҳа Тоййиба” меҳмонхонасида яшаб, барча муқаддас қадамжоларни зиёрат этадилар. Маккада эса узоқлиги 1 000 метрда жойлашган “Намаа ал-Мавадда” меҳмонхонасида 6 кун истиқомат қилиб, Умра ибодатларини адо этишга муяссар бўладилар.

Зиёратчиларимизга 8 нафар ишчи гуруҳи, 27 нафар шифокор, 4 нафар ошпазларимиз кечаю кундуз хизмат кўрсатишади. Шунингдек, меҳмонхоналар хоналарида ўрнатилган телевизор орқали ватандошларимиз “Ўзбекистон” телеканалини томоша қилиш имконига эга ҳам бўладилар.

Ўтган 2013 йилда 4879 нафар фуқаронинг Саудия Арабистонига Умра зиёратининг баҳорги (2 март - 29 апрель) ва 778 нафар фуқаронинг Рамазон мавсумидаги зиёратлари (22 июль - 10 август) ташкил этилган эди. Ўзбекистонлик 5080 нафар фуқаро Ҳаж зиёратини (27 сентябрь - 31 октябрь) адо этган эди.

Din ishlari bo‘yicha qo‘mita Axborot xizmatining ma’lum qilishicha, 2014 yilda Respublikamiz bo‘yicha bahorgi Umra mavsumida 5 750 dan ziyod, Ramazon mavsumida esa 650 dan ziyod, jami 6400 dan ziyod ziyoratchilarimiz muborak safarga yuborish rejalashtirilmoqda. Jumladan, 2013 yil Ramazon mavsumida Saudiya Arabistoni tomonidan ko‘rsatilgan muayyan sabablarga ko‘ra Umra safariga bora olmagan 400 nafarga yaqin ziyoratchilar Jamoatchilik kengashi qaroriga asosan “Umra-2014” bahor mavsumida ziyoratga yuborilishi ko‘zda tutilgan.

Ziyoratchilarimizni olib borish va kelish muddati joriy yilning 15 fevraldan 15 mayga qadar davom etadi.

Madina shahrida ziyoratchilarimiz 4 kun davomida Masjidi Nabaviydan 25 metr masofadagi “Ajniha Toyyiba” mehmonxonasida yashab, barcha muqaddas qadamjolarni ziyorat etadilar. Makkada esa uzoqligi 1 000 metrda joylashgan “Namaa al-Mavadda” mehmonxonasida 6 kun istiqomat qilib, Umra ibodatlarini ado etishga muyassar bo‘ladilar.

Ziyoratchilarimizga 8 nafar ishchi guruhi, 27 nafar shifokor, 4 nafar oshpazlarimiz kechayu kunduz xizmat ko‘rsatishadi. Shuningdek, mehmonxonalar xonalarida o‘rnatilgan televizor orqali vatandoshlarimiz “O‘zbekiston” telekanalini tomosha qilish imkoniga ega ham bo‘ladilar.

O‘tgan 2013 yilda 4879 nafar fuqaroning Saudiya Arabistoniga Umra ziyoratining bahorgi (2 mart - 29 aprel) va 778 nafar fuqaroning Ramazon mavsumidagi ziyoratlari (22 iyul - 10 avgust) tashkil etilgan edi. O‘zbekistonlik 5080 nafar fuqaro Haj ziyoratini (27 sentyabr - 31 oktyabr) ado etgan edi.

• Олдинги
• Кейинги