Бу йил 5200 ўзбекистонлик Ҳаж зиёратига боради

Рукн: Янгиликлар Чоп этилган: 07.03.2014

Дин ишлари бўйича қўмита ахборот хизматининг маълум қилишича, 2 март куни Ҳаж ишлари вазирлигининг Жидда шаҳридаги қароргоҳида 2014 йилги ҳаж мавсумини тартибли ўтказиш бўйича шартнома баённомаси имзоланди. Шартномада Ўзбекистондан келадиган ҳожиларнинг миқдори 5200 киши этиб белгиланди.

Жорий йилнинг 24 февраль - 2 март  кунлари Саудия Арабистони Подшоҳлиги Ҳаж ишлари вазирлиги таклифига биноан Дин ишлари бўйича қўмита раиси О.Юсупов, Ўзбекистон мусулмонлари идораси раиси, муфтий У.Алимов ва идора матбуот котиби Ж.Нуриддиновдан иборат Ўзбекистон Ҳаж делегацияси мазкур давлатда хизмат сафарида бўлиб қайтди.

25 февраль куни Макка шаҳрида умра амалларини бажараётган ўзбекистонлик зиёратчилар жойлашган “Наво мавадда” меҳмонхонасидаги шарт-шароитлар, озиқ-овқат ва транспорт таъминоти даражаси ўрганилди

26 февраль куни Ўзбекистон Ҳаж делегацияси Саудия Арабистони Подшоҳлиги Ҳаж ишлари вазири Бандар бин Мухаммад Хажжар  томонидан қабул қилинди. Қабул давомида вазирликнинг ҳаж ишларини ташкил этиш бўйича барча идоралари, шунингдек, Макка ва Мадина шаҳарларидаги вакилликлари томонидан ўзбекистонлик ҳожиларнинг Саудия ҳудудидаги тартибли ва уюшган ҳаракатига юксак баҳо берилди.

27 февраль куни Макка шаҳридаги транспорт хизмати ташкилотининг раҳбари Ахмад бин Абдулла Самбава бошчилигидаги ҳайъат аъзолари билан учрашув ўтказилди. Суҳбатда келгуси ҳаж мавсумида транспорт учун олдиндан тўланадиган кафолат пулларини ўтказиш бўйича тушунча берилиб, барча зарур маълумотларни интернет тизими орқали олиш мумкинлиги қайд этилди. Ташкилот томонидан Зул-ҳижжа ойининг 5-кунига қадар барча ҳожилар Мадина шаҳридан Макка шаҳрига етиб келишлари зарурлиги эслатиб ўтилди.

 28 февраль куни Бирлашган вакилликлар миллий муассасасининг Мадина  шаҳридаги ҳайъати аъзолари билан учрашув ўтказилди. Муассаса раҳбари доктор Юсуф бин Ахмад аль-Хавала суҳбатда ўзбекистонлик ҳожиларнинг ўтган хаж мавсумида Мадина шаҳридаги тартибли ва уюшган фаолиятини юқори баҳолади.

1 март куни  Мадина шаҳрида умра ибодатларини амалга ошираётган ўзбекистонлик зиёратчиларнинг меҳмонхонадаги шарт-шароитлари билан танишилди. “Сафо мавадда” меҳмонхонаси ҳарамдан 50 метр масофада жойлашган бўлиб, барча шароитларга эга.

* * *
 
Din ishlari bo‘yicha qo‘mita axborot xizmatining ma’lum qilishicha, 2 mart kuni Haj ishlari vazirligining Jidda shahridagi qarorgohida 2014 yilgi haj mavsumini tartibli o‘tkazish bo‘yicha shartnoma bayonnomasi imzolandi. Shartnomada O‘zbekistondan keladigan hojilarning miqdori 5200 kishi etib belgilandi.


Joriy yilning 24 fevral - 2 mart  kunlari Saudiya Arabistoni Podshohligi Haj ishlari vazirligi taklifiga binoan Din ishlari bo‘yicha qo‘mita raisi O.Yusupov, O‘zbekiston musulmonlari idorasi raisi, muftiy U.Alimov va idora matbuot kotibi J.Nuriddinovdan iborat O‘zbekiston Haj delegatsiyasi mazkur davlatda xizmat safarida bo‘lib qaytdi.

25 fevral kuni Makka shahrida umra amallarini bajarayotgan o‘zbekistonlik ziyoratchilar joylashgan “Navo mavadda” mehmonxonasidagi shart-sharoitlar, oziq-ovqat va transport ta’minoti darajasi o‘rganildi

26 fevral kuni O‘zbekiston Haj delegatsiyasi Saudiya Arabistoni Podshohligi Haj ishlari vaziri Bandar bin Muxammad Xajjar  tomonidan qabul qilindi. Qabul davomida vazirlikning haj ishlarini tashkil etish bo‘yicha barcha idoralari, shuningdek, Makka va Madina shaharlaridagi vakilliklari tomonidan o‘zbekistonlik hojilarning Saudiya hududidagi tartibli va uyushgan harakatiga yuksak baho berildi.

27 fevral kuni Makka shahridagi transport xizmati tashkilotining rahbari Axmad bin Abdulla Sambava boshchiligidagi hay’at a’zolari bilan uchrashuv o‘tkazildi. Suhbatda kelgusi haj mavsumida transport uchun oldindan to‘lanadigan kafolat pullarini o‘tkazish bo‘yicha tushuncha berilib, barcha zarur ma’lumotlarni internet tizimi orqali olish mumkinligi qayd etildi. Tashkilot tomonidan Zul-hijja oyining 5-kuniga qadar barcha hojilar Madina shahridan Makka shahriga yetib kelishlari zarurligi eslatib o‘tildi.

 28 fevral kuni Birlashgan vakilliklar milliy muassasasining Madina  shahridagi hay’ati a’zolari bilan uchrashuv o‘tkazildi. Muassasa rahbari doktor Yusuf bin Axmad al-Xavala suhbatda o‘zbekistonlik hojilarning o‘tgan xaj mavsumida Madina shahridagi tartibli va uyushgan faoliyatini yuqori baholadi.

1 mart kuni  Madina shahrida umra ibodatlarini amalga oshirayotgan o‘zbekistonlik ziyoratchilarning mehmonxonadagi shart-sharoitlari bilan tanishildi. “Safo mavadda” mehmonxonasi haramdan 50 metr masofada joylashgan bo‘lib, barcha sharoitlarga ega.