Тушунарсиз ҳолатлар

1. Оилали эркак-аёллар бегона эркак-аёлларга ўз жуфтлари устидан “Эрим романтикмас”, “Хотиним менга беэътибор” деб шикоят қиладилар ва шу асоссиз баҳонани орқасидан ўз жуфтларига хиёнат қилиб, ўзларини эса пок, айбсиз деб даъво қиладилар. “Нега эрингга хиёнат қилдинг?” деб сўрасангиз, “Мен у одам билан шунчаки дўстона мулоқот қилдим, холос” дейди.

2. Қизлар ўз ҳаётларининг гуллаган даврида интернет орқали бегона йигитларга шундай расмларини юборадиларки, у расмлардан ҳатто ҳайвонлар ҳам уялади.

3. Йигитлар узундан узун қимматли вақтларини компютер ёки телефон экрани қаршисида совуриб, у саҳифадан бу саҳифага ўтиб, бегона қизларни алдаб, бошини айлантириб, шундай калака қиладиларки, уларга ҳам бир кун қиёмат келади.

4. Ота-оналар фарзандларининг яхши еб-ичишига ва яхши кийинишига қаттиқ эътибор қаратадилар-у, аммо уларга ахлоқ-одоб ва динни ўргатишни унутадилар.

5. Турли соҳаларда меҳнат қилаётган ходимлар ўз хизматларини маош озлигини баҳона қилиб фидокорлик ва ихлос билан бажармайдилар. Улар Аллоҳ ҳалол ризққа барака бериб, ҳаром ризқнинг баракасини ўчириши унутадилар.

6. Йигит ва қизлар қимматли вақтларини ҳамда гулдек умрларини истироҳат боғларида ва турли дўконларда мақсадсиз изғиш билан совуриб юборадилар. Ибодатга эса вақтлари етишмайди. Ишлари кўп.

7. Йигит ва қизлар бутун қалб қўрлари билан қўшиқларни тинглашади. Агар Аллоҳнинг Каломини тинглайдиган бўлсалар, юраклари сиқилади. Улар билишмайдики, ҳалол билан ҳаром ҳеч қачон бир қалбда жамлана олмайди.

8. Лаззатли ва ёқимли нарсаларни ўзимиз учун сотиб олишга пулимизни аямаймиз. Аммо Аллоҳнинг уйларидаги эҳсон қутисига пул солиш ёки бирор фақирга садақа қилиш учун ҳамёнимизни кавлаб, эски 200 сўм, 500 сўмни қидирамиз.

9. Рамазонда ўзимизни тийиб, очлик ва чанқоқликка сабр қиламиз. Бироқ улуғ ойнинг кундузларини кино ва сериаллар кўриш, ифторлик вақтигача ухлаш билан ўтказамиз.

10. Сахарликдан ухлаб қолмаслик учун будилник вақтини тайёрлаб қўямиз. Аммо сахарликдан кейин бомдод намозини ўқиб, Аллоҳ билан учрашишга будилникни қўйишни унутамиз.

11. Бир-биримизни сўкамиз, ҳақорат қиламиз, обрўларимизга тил теккизамиз. Аллоҳ таолонинг “У бирор сўзни талаффуз қилса, албатта, унинг олдида ҳозиру нозир бўлган бир кузатувчи (сўзни ёзиб олувчи фаришта) бордир” (Қоф, 18) оятини унутамиз.

12. Кўпчилигимизда бир-иккитадан автоулов бор. Кўчалардан машиналар кўплигидан юролмай ҳам қоляпмиз. Аммо ўша автоуловларга ўтирганимизда, Аллоҳнинг “Бизларга бу (улов)ни бўйсундириб қўйган зотга тасбеҳ айтамиз. Бизлар ўзимиз бунга қодир эмас эдик” (Зухруф, 13) оятини унутиб қўямиз.

13. Айрим эркаклар ўз аёлларини ва қизларини кўчаларда, одамлар орасида ёнларида олиб юрадилар. Аммо улар ўша аёлларининг аврат жойларини очиб юришларига, юпқа ва тор кийим кийишларига индамайдилар. Уларни қизғонмайдилар, ҳамиятлари жунбушга келмайди, эркаклик ғурурлари ишга тушмайди. Бу гапни ўзларига айтсангиз, “Биз зиёли оиламиз”, “Биз маданиятли оиламиз”, “Биз эркин оиламиз” деб даъво қиладилар. Аслида ҳаё, иффат, ҳамият, ор-номус ҳақиқий маданият эканини билмайдилар ёки билсалар ҳам, ўзларини билмагандек тутадилар.

Нозимжон Ҳошимжон таржимаси

* * *

1. Oilali erkak-ayollar begona erkak-ayollarga o‘z juftlari ustidan “Erim romantikmas”, “Xotinim menga bee’tibor” deb shikoyat qiladilar va shu asossiz bahonani orqasidan o‘z juftlariga xiyonat qilib, o‘zlarini esa pok, aybsiz deb da’vo qiladilar. “Nega eringga xiyonat qilding?” deb so‘rasangiz, “Men u odam bilan shunchaki do‘stona muloqot qildim, xolos” deydi.

2. Qizlar o‘z hayotlarining gullagan davrida internet orqali begona yigitlarga shunday rasmlarini yuboradilarki, u rasmlardan hatto hayvonlar ham uyaladi.

3. Yigitlar uzundan uzun qimmatli vaqtlarini kompyuter yoki telefon ekrani qarshisida sovurib, u sahifadan bu sahifaga o‘tib, begona qizlarni aldab, boshini aylantirib, shunday kalaka qiladilarki, ularga ham bir kun qiyomat keladi.

4. Ota-onalar farzandlarining yaxshi yeb-ichishiga va yaxshi kiyinishiga qattiq e’tibor qaratadilar-u, ammo ularga axloq-odob va dinni o‘rgatishni unutadilar.

5. Turli sohalarda mehnat qilayotgan xodimlar o‘z xizmatlarini maosh ozligini bahona qilib fidokorlik va ixlos bilan bajarmaydilar. Ular Alloh halol rizqqa baraka berib, harom rizqning barakasini o‘chirishi unutadilar.

6. Yigit va qizlar qimmatli vaqtlarini hamda guldek umrlarini istirohat bog‘larida va turli do‘konlarda maqsadsiz izg‘ish bilan sovurib yuboradilar. Ibodatga esa vaqtlari yetishmaydi. Ishlari ko‘p.

7. Yigit va qizlar butun qalb qo‘rlari bilan qo‘shiqlarni tinglashadi. Agar Allohning Kalomini tinglaydigan bo‘lsalar, yuraklari siqiladi. Ular bilishmaydiki, halol bilan harom hech qachon bir qalbda jamlana olmaydi.

8. Lazzatli va yoqimli narsalarni o‘zimiz uchun sotib olishga pulimizni ayamaymiz. Ammo Allohning uylaridagi ehson qutisiga pul solish yoki biror faqirga sadaqa qilish uchun hamyonimizni kavlab, eski 200 so‘m, 500 so‘mni qidiramiz.

9. Ramazonda o‘zimizni tiyib, ochlik va chanqoqlikka sabr qilamiz. Biroq ulug‘ oyning kunduzlarini kino va seriallar ko‘rish, iftorlik vaqtigacha uxlash bilan o‘tkazamiz.

10. Saxarlikdan uxlab qolmaslik uchun budilnik vaqtini tayyorlab qo‘yamiz. Ammo saxarlikdan keyin bomdod namozini o‘qib, Alloh bilan uchrashishga budilnikni qo‘yishni unutamiz.

11. Bir-birimizni so‘kamiz, haqorat qilamiz, obro‘larimizga til tekkizamiz. Alloh taoloning “U biror so‘zni talaffuz qilsa, albatta, uning oldida hoziru nozir bo‘lgan bir kuzatuvchi (so‘zni yozib oluvchi farishta) bordir” (Qof, 18) oyatini unutamiz.

12. Ko‘pchiligimizda bir-ikkitadan avtoulov bor. Ko‘chalardan mashinalar ko‘pligidan yurolmay ham qolyapmiz. Ammo o‘sha avtoulovlarga o‘tirganimizda, Allohning “Bizlarga bu (ulov)ni bo‘ysundirib qo‘ygan zotga tasbeh aytamiz. Bizlar o‘zimiz bunga qodir emas edik” (Zuxruf, 13) oyatini unutib qo‘yamiz.

13. Ayrim erkaklar o‘z ayollarini va qizlarini ko‘chalarda, odamlar orasida yonlarida olib yuradilar. Ammo ular o‘sha ayollarining avrat joylarini ochib yurishlariga, yupqa va tor kiyim kiyishlariga indamaydilar. Ularni qizg‘onmaydilar, hamiyatlari junbushga kelmaydi, erkaklik g‘ururlari ishga tushmaydi. Bu gapni o‘zlariga aytsangiz, “Biz ziyoli oilamiz”, “Biz madaniyatli oilamiz”, “Biz erkin oilamiz” deb da’vo qiladilar. Aslida hayo, iffat, hamiyat, or-nomus haqiqiy madaniyat ekanini bilmaydilar yoki bilsalar ham, o‘zlarini bilmagandek tutadilar.

Nozimjon Hoshimjon tarjimasi

• Олдинги
• Кейинги