Иброҳим Адҳам ибрати

Бир киши Иброҳим Адҳамдан насиҳат сўради.

– Ёпиқ турганни оч, очиқ турганни ёп! – дедилар.

– Тушунолмадим? – деди ҳалиги киши.

– Ҳамёнингнинг оғзини оч – сахий ва очиққўл бўл, то сендан ёрдам сўраганларга фойданг тегсин. Оғзингни эса ёп, то тилингдан ҳеч кимга азият етмасин! – дедилар.

* * *

Иброҳим Адҳамнинг йўлидан бир тош чиқди. Устига: “Тошни ўгириб, ортидагини ўқи!” деб ёзилган эди. Ўгириб: “Агар ўрганганларингга амал қилмасанг, у ҳолда нега ўрганмоқчисан?” деган ёзувга кўзи тушди. Шунда у: “Ё Аллоҳ! Сени таниган ҳеч бир банданг ҳақинг билан таниёлмайди. Шундай экан, Сендан ғофил одамнинг ҳоли не кечади?” дея йиғлади.

* * *

Иброҳим Адҳам бир киши билан дўст бўлди. Анча муддатдан сўнг, ажралишларига тўғри келди. Шунда дўсти:

– Узоқ вақт дўст бўлдик. Менда бирор камчилик ёки хато кўрган бўлсанг, айт, уни тузатай, – деди.

Шунда Иброҳим Адҳам:

– Мен сенга ҳамиша муҳаббат кўзи билан боқдим. Шу боис доимо яхшилигингни кўрдим. Қачон қарасам, менга фақат фазилатларинг кўринди. Айбингни билишни хоҳласанг, бошқалардан сўра, – деб жавоб берди.

Гулбаҳор Абдуллоҳ тайёрлади.

“Ҳидоят” журналининг 2012 йил, 11-сонидан олинди.

* * *

Bir kishi Ibrohim Adhamdan nasihat so‘radi.

– Yopiq turganni och, ochiq turganni yop! – dedilar.

– Tushunolmadim? – dedi haligi kishi.

– Hamyoningning og‘zini och – saxiy va ochiqqo‘l bo‘l, to sendan yordam so‘raganlarga foydang tegsin. Og‘zingni esa yop, to tilingdan hech kimga aziyat yetmasin! – dedilar.

* * *

Ibrohim Adhamning yo‘lidan bir tosh chiqdi. Ustiga: “Toshni o‘girib, ortidagini o‘qi!” deb yozilgan edi. O‘girib: “Agar o‘rganganlaringga amal qilmasang, u holda nega o‘rganmoqchisan?” degan yozuvga ko‘zi tushdi. Shunda u: “Yo Alloh! Seni tanigan hech bir bandang haqing bilan taniyolmaydi. Shunday ekan, Sendan g‘ofil odamning holi ne kechadi?” deya yig‘ladi.

* * *

Ibrohim Adham bir kishi bilan do‘st bo‘ldi. Ancha muddatdan so‘ng, ajralishlariga to‘g‘ri keldi. Shunda do‘sti:

– Uzoq vaqt do‘st bo‘ldik. Menda biror kamchilik yoki xato ko‘rgan bo‘lsang, ayt, uni tuzatay, – dedi.

Shunda Ibrohim Adham:

– Men senga hamisha muhabbat ko‘zi bilan boqdim. Shu bois doimo yaxshiligingni ko‘rdim. Qachon qarasam, menga faqat fazilatlaring ko‘rindi. Aybingni bilishni xohlasang, boshqalardan so‘ra, – deb javob berdi.

Gulbahor Abdulloh tayyorladi.

“Hidoyat” jurnalining 2012 yil, 11-sonidan olindi.

• Олдинги
• Кейинги