Қуръони карим ва спорт автомобили

Рукн: Ибрат Чоп этилган: 18.12.2014

Ёш бир йигит олийгоҳни битириш учун тайёрланаётган эди. У кўп ойлардан бери бир савдогарнинг кўргазма залида турган чиройли спорт автомобилини кўриб завқланарди ва сотиб олишга отасининг бемалол қурби етишини биларди. Бир куни йигит отасига ўзининг энг олий истаги мана шу автомобил эканлигини тушунтирди.
Битирув куни яқинлашиши билан йигит отасининг ҳимматини кута бошлади. Ниҳоят, олийгоҳни тугатадиган куни эрталаб отаси уни ўзининг хонасига чақирди. Ота шундай қувноқ ўғли борлигидан фахрланишини, уни нечоғлик яхши кўришини маълум қилди ва бежирим ўрамдаги совға қутисини унга топширди.
Йигит иштиёқ билан, лекин нимадандир норозидай қутини очди ва бежирим, чарм-муқовали Қуръони каримни топди. Шунда у отасига жаҳл билан:
“Нима, асраб қўйган пулларингизнинг барчасига мен учун биттагина Қуръон совға қиласизми?" — деди-да, каломи шарифни қолдирганича уйдан югуриб чиқиб кетди...
Йиллар ўтиб ўша йигит ишида муваффақият қозонди. Унинг шинам уйи ва ажойиб оиласи бор эди. Бир куни у отасининг қариганлигини ўйлаб, эҳтимол, хабар олиш лозим дея фикр қилди. У отасини ўша битирув кунидан бери кўрмаганди. Озроқ ишларимни битириб олай, сўнг хотиржам отамни кўргани бораман, деб ўйлади.
Ишларини тартибга солиб бўлгунича, отасининг вафот этгани ҳамда барча мол-мулкини ўғлига васият қилиб қолдирганлиги тўғрисида телеграмма олди. Ота ҳовлисига келганда, тўсатдан унинг қалбини маҳзунлик ҳамда ўкиниш ҳисси қамраб олди. У отасининг муҳим ҳужжатларини излай бошлаганида, йиллар олдин қолдириб кетгани, ўша Қуръони каримни кўриб қолди. Кўзида ёш билан Қуръонни саҳифаларини оча бошлади. Бирдан, китобнинг орқасига тасма билан боғланган ковертдан калит тушиб кетди. Калитда у орзу қилган айнан ўша спорт автомобили сотувчисининг исми ёзилган ёрлиқ бўлиб, устига олийгоҳни битирган санаси ҳамда "Пули тўланган" деган ёзув турарди...

* * *

Yosh bir yigit oliygohni bitirish uchun tayyorlanayotgan edi. U ko‘p oylardan beri bir savdogarning ko‘rgazma zalida turgan chiroyli sport avtomobilini ko‘rib zavqlanardi va sotib olishga otasining bemalol qurbi yetishini bilardi. Bir kuni yigit otasiga o‘zining eng oliy istagi mana shu avtomobil ekanligini tushuntirdi.
Bitiruv kuni yaqinlashishi bilan yigit otasining himmatini kuta boshladi. Nihoyat, oliygohni tugatadigan kuni ertalab otasi uni o‘zining xonasiga chaqirdi. Ota shunday quvnoq o‘g‘li borligidan faxrlanishini, uni nechog‘lik yaxshi ko‘rishini ma’lum qildi va bejirim o‘ramdagi sovg‘a qutisini unga topshirdi.
Yigit ishtiyoq bilan, lekin nimadandir noroziday qutini ochdi va bejirim, charm-muqovali Qur’oni karimni topdi. Shunda u otasiga jahl bilan:
“Nima, asrab qo‘ygan pullaringizning barchasiga men uchun bittagina Qur’on sovg‘a qilasizmi?" — dedi-da, kalomi sharifni qoldirganicha uydan yugurib chiqib ketdi...
Yillar o‘tib o‘sha yigit ishida muvaffaqiyat qozondi. Uning shinam uyi va ajoyib oilasi bor edi. Bir kuni u otasining qariganligini o‘ylab, ehtimol, xabar olish lozim deya fikr qildi. U otasini o‘sha bitiruv kunidan beri ko‘rmagandi. Ozroq ishlarimni bitirib olay, so‘ng xotirjam otamni ko‘rgani boraman, deb o‘yladi.
Ishlarini tartibga solib bo‘lgunicha, otasining vafot etgani hamda barcha mol-mulkini o‘g‘liga vasiyat qilib qoldirganligi to‘g‘risida telegramma oldi. Ota hovlisiga kelganda, to‘satdan uning qalbini mahzunlik hamda o‘kinish hissi qamrab oldi. U otasining muhim hujjatlarini izlay boshlaganida, yillar oldin qoldirib ketgani, o‘sha Qur’oni karimni ko‘rib qoldi. Ko‘zida yosh bilan Qur’onni sahifalarini ocha boshladi. Birdan, kitobning orqasiga tasma bilan bog‘langan kovertdan kalit tushib ketdi. Kalitda u orzu qilgan aynan o‘sha sport avtomobili sotuvchisining ismi yozilgan yorliq bo‘lib, ustiga oliygohni bitirgan sanasi hamda "Puli to‘langan" degan yozuv turardi...

Muslim Buxoriy tayyorladi.