Асл бойлик нима?

Рукн: Ибрат Чоп этилган: 17.12.2014

Фақир киши Жаноби Ҳаққа нолий бошлабди: «Эй Яратган эгам, нега мени бошқа бандаларингдан кам кўрдинг, ризқимни кам қилиб яратдинг?!» Унинг бу гапларини бир йўловчи эшитиб қолибди ва сўрабди: «Биродар, тинчликми? Нимадан норизосан?!» Шунда халиги киши: «Аллоҳ менга кўп ризқ ато этмади, тинмай меҳнат қиламан, бироқ фақирликдан чиқиб кета олмаяпман!» Йўловчи бир оз ўйланиб тургач дебди: «Майли, сенга беш минг тилла бераман, эвазига битта кўзингдан воз кечасан!» Фақир қаттиқ қўрқиб кетиб, икки қадам орқага чекинибди: «Эсинг борми? Қандай қилиб беш минг эвазига кўзимдан воз кечишим мумкин?!» Йўловчи савдолашишда давом этибди: «Унда битта қўлингни берақол. Ўн минг танга бераман? «Бўлмайди, – жаҳллана бошлабди фақир, – юз минг берсанг ҳам қўлимни бермайман!» «Майли, ундай бўлса, шу ўн мингга битта бармоғингни бер!» – уни ҳоли-жонига қўймабди йўловчи. «Нега бармоғимни сотарканман?! Бутун дунёнинг молига алмашмайман бармоғимни!» Унинг бу гапини эшитган йўловчи мақсадга кўча қолибди: «Эй ношукр банда, унда нега нолияпсан? Аллоҳ сенга қанча бойлик берганини кўрмаяпсанми? Тўрт мучанг соғ, ақлу хушинг жойида. Сен эса, фақирликдан нолиб ўтирибсан. Аллоҳ берган шунча неъматга шукр қилиш керак эмасми?!»

Беҳруз Ёқубов тайёрлади

* * *

Faqir kishi Janobi Haqqa noliy boshlabdi: «Ey Yaratgan egam, nega meni boshqa bandalaringdan kam ko‘rding, rizqimni kam qilib yaratding?!» Uning bu gaplarini bir yo‘lovchi eshitib qolibdi va so‘rabdi: «Birodar, tinchlikmi? Nimadan norizosan?!» Shunda xaligi kishi: «Alloh menga ko‘p rizq ato etmadi, tinmay mehnat qilaman, biroq faqirlikdan chiqib keta olmayapman!» Yo‘lovchi bir oz o‘ylanib turgach debdi: «Mayli, senga besh ming tilla beraman, evaziga bitta ko‘zingdan voz kechasan!» Faqir qattiq qo‘rqib ketib, ikki qadam orqaga chekinibdi: «Esing bormi? Qanday qilib besh ming evaziga ko‘zimdan voz kechishim mumkin?!» Yo‘lovchi savdolashishda davom etibdi: «Unda bitta qo‘lingni beraqol. O‘n ming tanga beraman? «Bo‘lmaydi, – jahllana boshlabdi faqir, – yuz ming bersang ham qo‘limni bermayman!» «Mayli, unday bo‘lsa, shu o‘n mingga bitta barmog‘ingni ber!» – uni holi-joniga qo‘ymabdi yo‘lovchi. «Nega barmog‘imni sotarkanman?! Butun dunyoning moliga almashmayman barmog‘imni!» Uning bu gapini eshitgan yo‘lovchi maqsadga ko‘cha qolibdi: «Ey noshukr banda, unda nega noliyapsan? Alloh senga qancha boylik berganini ko‘rmayapsanmi? To‘rt muchang sog‘, aqlu xushing joyida. Sen esa, faqirlikdan nolib o‘tiribsan. Alloh bergan shuncha ne’matga shukr qilish kerak emasmi?!»

Behruz Yoqubov tayyorladi
"Hidoyat" jurnalidan olindi