Гўзал хотима

Рукн: Ибрат Чоп этилган: 08.07.2016

“Энг ибратли ҳаётий ҳикоялар” танловига

Устозимиз Азизхўжа домла билан суҳбатимизда шундай ҳикоя қилган эдилар:

– Мадина шаҳрида ўқиб юрган вақтларим эди. Бу ерда водий томондан келиб, муқим яшаб қолган бир ватандошим билан танишиб қолдим. У зот илм маърифатли, улуғ инсон эди. Етти нафар фарзандларининг барчаси ўқимишли эдилар.

Ҳожибобонинг Мадинайи мунаввара масжидига муҳаббати кучли бўлиб, имконлари бўлса ҳам Мадинадан ташқарига чиқмас эканлар.

Ҳар йили рамазон ойида неваралари билан биргаликда юртимиздан борган ҳожиларга ифторлик уюштириб, улар хизматида камарбаста бўлар, ҳожиларга зам-зам суви тарқатиб чиқар эдилар.

У зот билан суҳбатимизда нима учун Мадинадан ташқарига чиқмасликлари сабабини сўрадим:

– Ҳожи бобо, Аллоҳ сизга кўп яхшиликлар бериб, фарзандларингиз ўқиб, олим бўлишибди. Бошқа давлатларда ўз ўрнини топиб, хизмат қилишмоқда. Қўлингизни қаерга чўзсангиз етади. Нега бошқа давлатларга чиқиб дам олмайсиз, юрт кезмайсиз? Мадинани шу қадар азиз жой деб билишингизнинг сабаби нимада?

Ҳожибобо шундай жавоб бердилар:

– Тўғри айтасиз, қўлимни қаерга чўзсам етади. Имкониятим етарли. Мадинадан бошқа шаҳарларда яшайдиган фарзандларим уйларига боришимни хоҳлашади. Ўлим қош билан қовоқнинг ўртасида, дейдилар. Мадинадан ташқарига чиқсам, ажалим бошқа шаҳарда қолиб кетишидан қўрқаман. Мени шу ерда, Пайғамбаримиз алайҳиссалом жуссалари бор жойда, у зотни кўрган саҳобалар ётган жойда дафн этишларини орзу қиламан.

Аллоҳ Ҳожибобонинг ниятларини ижобат этди. Рамазон ойи эди. Қадр кечаларининг бирида Ҳожибобо Пайғамбар алайҳиссаломнинг равза ва минбарлари орасида ҳожиларга зам-зам суви тарқатаётганларида жон таслим қилдилар. Ҳожибобонинг васиятларига кўра, у зотнинг жасади саҳобалар ётган жойга дафн этилди. Аллоҳ таоло у зотни раҳматига олсин.

Аллоҳ таоло Ҳожибобонинг ниятлари, ихлосларига яраша, Пайғамбаримиз Муҳаммад с.а.в.га чексиз муҳаббатлари туфайли қалбларидаги орзуларига етказди. Аллоҳ у зотнинг умрлари поёнига етгунига қадар Мадинада сақлаб қолди.

Абдул Мўмин

* * *

Ustozimiz Azizxo‘ja domla bilan suhbatimizda shunday hikoya qilgan edilar:

– Madina shahrida o‘qib yurgan vaqtlarim edi. Bu yerda vodiy tomondan kelib, muqim yashab qolgan bir vatandoshim bilan tanishib qoldim. U zot ilm ma’rifatli, ulug‘ inson edi. Yetti nafar farzandlarining barchasi o‘qimishli edilar.

Hojiboboning Madinayi munavvara masjidiga muhabbati kuchli bo‘lib, imkonlari bo‘lsa ham Madinadan tashqariga chiqmas ekanlar.

Har yili ramazon oyida nevaralari bilan birgalikda yurtimizdan borgan hojilarga iftorlik uyushtirib, ular xizmatida kamarbasta bo‘lar, hojilarga zam-zam suvi tarqatib chiqar edilar.

U zot bilan suhbatimizda nima uchun Madinadan tashqariga chiqmasliklari sababini so‘radim:

– Hoji bobo, Alloh sizga ko‘p yaxshiliklar berib, farzandlaringiz o‘qib, olim bo‘lishibdi. Boshqa davlatlarda o‘z o‘rnini topib, xizmat qilishmoqda. Qo‘lingizni qaerga cho‘zsangiz yetadi. Nega boshqa davlatlarga chiqib dam olmaysiz, yurt kezmaysiz? Madinani shu qadar aziz joy deb bilishingizning sababi nimada?

Hojibobo shunday javob berdilar:

– To‘g‘ri aytasiz, qo‘limni qaerga cho‘zsam yetadi. Imkoniyatim yetarli. Madinadan boshqa shaharlarda yashaydigan farzandlarim uylariga borishimni xohlashadi. O‘lim qosh bilan qovoqning o‘rtasida, deydilar. Madinadan tashqariga chiqsam, ajalim boshqa shaharda qolib ketishidan qo‘rqaman. Meni shu yerda, Payg‘ambarimiz alayhissalom jussalari bor joyda, u zotni ko‘rgan sahobalar yotgan joyda dafn etishlarini orzu qilaman.

Alloh Hojiboboning niyatlarini ijobat etdi. Ramazon oyi edi. Qadr kechalarining birida Hojibobo Payg‘ambar alayhissalomning ravza va minbarlari orasida hojilarga zam-zam suvi tarqatayotganlarida jon taslim qildilar. Hojiboboning vasiyatlariga ko‘ra, u zotning jasadi sahobalar yotgan joyga dafn etildi. Alloh taolo u zotni rahmatiga olsin.

Alloh taolo Hojiboboning niyatlari, ixloslariga yarasha, Payg‘ambarimiz Muhammad s.a.v.ga cheksiz muhabbatlari tufayli qalblaridagi orzulariga yetkazdi. Alloh u zotning umrlari poyoniga yetguniga qadar Madinada saqlab qoldi.

Abdul Mo‘min