Марғилондаги “Хонақоҳ” жоме масжидида хатмона

Фарғона вилояти, Марғилон шаҳридаги “Хонақоҳ” жоме масжидида хатми Қуръон адо этилди. Хатмонага Ўзбекистон мусулмонлари идораси раиси, муфтий Усмонхон Алимов ташриф буюрдилар. Фарғона вилояти ва Марғилон шаҳридаги илм аҳллари, мухлислар жам бўлган хатмонага 7000 га яқин жамоат йиғилди.

16 кун давомида Муҳаммад Али ва Иброҳимжон қорилар хуш қироатлари билан, имом-хатиб Убайдуллоҳ Абдуллаев таъсирли маърузалари билан жамоатни мамнун қилдилар. Хатмонада маъруза қилган муфтий ҳазратлари тинчлик ва осойишталик неъмати, шукроналик, фарзандларимизни комил инсон этиб тарбиялаш, уларни турли ёт ғоялар таъсиридан сақлаш каби долзарб мавзуларда гапириб, Марғилон уламолари ҳақида ҳам илиқ фикрларини билдирдилар.

Собиқ мустабид даврида Фарғона вилоятида атиги 4 та масжид фаолият кўрсатган бўлса, ҳозирда вилоятдаги масжидларнинг умумий сони 198 тани ташкил қилади. Айни кунларда Фарғона вилоятида фаолият кўрсатаётган масжидларнинг 149 тасида хатми Қуръон ва 49 тасида таровеҳ намозлари ўқилмоқда.

* * *

Farg‘ona viloyati, Marg‘ilon shahridagi “Xonaqoh” jome masjidida xatmi Qur’on ado etildi. Xatmonaga O‘zbekiston musulmonlari idorasi raisi, muftiy Usmonxon Alimov tashrif buyurdilar. Farg‘ona viloyati va Marg‘ilon shahridagi ilm ahllari, muxlislar jam bo‘lgan xatmonaga 7000 ga yaqin jamoat yig‘ildi.

16 kun davomida Muhammad Ali va Ibrohimjon qorilar xush qiroatlari bilan, imom-xatib Ubaydulloh Abdullaev ta’sirli ma’ruzalari bilan jamoatni mamnun qildilar. Xatmonada ma’ruza qilgan muftiy hazratlari tinchlik va osoyishtalik ne’mati, shukronalik, farzandlarimizni komil inson etib tarbiyalash, ularni turli yot g‘oyalar ta’siridan saqlash kabi dolzarb mavzularda gapirib, Marg‘ilon ulamolari haqida ham iliq fikrlarini bildirdilar.

Sobiq mustabid davrida Farg‘ona viloyatida atigi 4 ta masjid faoliyat ko‘rsatgan bo‘lsa, hozirda viloyatdagi masjidlarning umumiy soni 198 tani tashkil qiladi. Ayni kunlarda Farg‘ona viloyatida faoliyat ko‘rsatayotgan masjidlarning 149 tasida xatmi Qur’on va 49 tasida taroveh namozlari o‘qilmoqda.

• Олдинги
• Кейинги