“Сиз Пайғамбарни кўрганмисиз?” китоби қайта нашр этилди

Имом Бухорий номидаги Тошкент ислом институти “Диний фанлар” кафедраси катта ўқитувчиси, сийрат фани устози Абдул Азим Зиёуддиннинг “Сиз Пайғамбарни кўрганмисиз?” китоби тўлдирилиб, қайта нашр этилди. Китобнинг биринчи нашри 2007 йили амалга оширилган эди. Ушбу китоб Расулуллоҳ соллаллоҳу алайҳи васаллам сийратлари бўйича 197 та тест савол-жавобларидан иборат бўлиб, Макка даврини ўз ичига олади.

“Сиз Пайғамбарни кўрганмисиз?” китобига Шайх Абдулазиз Мансур муҳаррирлик қилган. Шайх Муҳаммад Содиқ Муҳаммад Юсуф (раҳматуллоҳи алайҳ), Тошкент шаҳар бош имом-хатиби Анвар қори Турсунов, Имом Бухорий номидаги Тошкент ислом институти ректори Ҳайдархон Йўлдошхўжаев сўзбоши ёзишган.

“Муаллиф ўз асарини ёзишда Пайғамбаримиз соллаллоҳу алайҳи васалламнинг сийрати шарифларига оид мўътабар манбалардан фойдаланганлар. У киши бу ишда китоб танлаш қобилиятлари ҳам юқори даражада эканини намойиш қилганлар десам, муболаға бўлмаса керак” дейилади Шайх Муҳаммад Содиқ Муҳаммад Юсуфнинг (раҳматуллоҳи алайҳ) сўзбошисида.

“Бу китобдан кўзланган асосий мақсад суюкли Пайғамбаримиз соллаллоҳу алайҳи васаллам сийратлари ҳақида маълумоти оз ўқувчиларга илм бериш, илмларини тартибга солиш, хатолари бўлса, тўғрилаш, баъзи тушунмаган жойларига аниқлик киритиш; маълумоти ўртача бўлган ўқувчиларнинг билимини ошириш; яхши маълумотга эга бўлган китобхонларнинг билимини савол-жавоб услубида мустаҳкамлаш ҳамдир” дейилади муаллиф муқаддимасида.

Сиз Пайғамбарни кўрганмисиз?” китобини Тошкент шаҳридаги Чорсу китоблар уйи ва бошқа китоб расталаридан сотиб олишингиз мумкин.

* * *

Imom Buxoriy nomidagi Toshkent islom instituti “Diniy fanlar” kafedrasi katta o‘qituvchisi, siyrat fani ustozi Abdul Azim Ziyouddinning “Siz Payg‘ambarni ko‘rganmisiz?” kitobi to‘ldirilib, qayta nashr etildi. Kitobning birinchi nashri 2007 yili amalga oshirilgan edi. Ushbu kitob Rasululloh sollallohu alayhi vasallam siyratlari bo‘yicha 197 ta test savol-javoblaridan iborat bo‘lib, Makka davrini o‘z ichiga oladi.

“Siz Payg‘ambarni ko‘rganmisiz?” kitobiga Shayx Abdulaziz Mansur muharrirlik qilgan. Shayx Muhammad Sodiq Muhammad Yusuf (rahmatullohi alayh), Toshkent shahar bosh imom-xatibi Anvar qori Tursunov, Imom Buxoriy nomidagi Toshkent islom instituti rektori Haydarxon Yo‘ldoshxo‘jaev so‘zboshi yozishgan.

“Muallif o‘z asarini yozishda Payg‘ambarimiz sollallohu alayhi vasallamning siyrati shariflariga oid mo‘‘tabar manbalardan foydalanganlar. U kishi bu ishda kitob tanlash qobiliyatlari ham yuqori darajada ekanini namoyish qilganlar desam, mubolag‘a bo‘lmasa kerak” deyiladi Shayx Muhammad Sodiq Muhammad Yusufning (rahmatullohi alayh) so‘zboshisida.

“Bu kitobdan ko‘zlangan asosiy maqsad suyukli Payg‘ambarimiz sollallohu alayhi vasallam siyratlari haqida ma’lumoti oz o‘quvchilarga ilm berish, ilmlarini tartibga solish, xatolari bo‘lsa, to‘g‘rilash, ba’zi tushunmagan joylariga aniqlik kiritish; ma’lumoti o‘rtacha bo‘lgan o‘quvchilarning bilimini oshirish; yaxshi ma’lumotga ega bo‘lgan kitobxonlarning bilimini savol-javob uslubida mustahkamlash hamdir” deyiladi muallif muqaddimasida.

Siz Payg‘ambarni ko‘rganmisiz?” kitobini Toshkent shahridagi Chorsu kitoblar uyi va boshqa kitob rastalaridan sotib olishingiz mumkin.

• Олдинги
• Кейинги