Исломий таълим муассасаларига қабул давом этмоқда

Ўзбекистон мусулмонлари идораси тасарруфидаги Тошкент ислом институти ва ўрта махсус ислом билим юртларида ҳам жорий йилнинг 20 июнидан қабул жараёнлари бошланди, дея хабар беради Дин ишлари бўйича қўмита сайти.

Қабул жараёнларини юқори даражада ташкил этиш, абитуриентларга қулай шароитлар яратиш мақсадида барча диний таълим муассасаларида қабул жараёнига оид Низом ва йўриқномалар, қабул квотаси, тақдим этилиши лозим бўлган ҳужжатлар тўғрисида тўлиқ маълумотлар, кириш имтиҳонлари ўтказиладиган фанлар ва имтиҳоларни ўтказиш тартиби, фанлар бўйича ўтказиладиган маслаҳатлар жадвали ҳамда имтиҳон кунларини акс эттирувчи маълумотлар баннерлар ва эълонлар тахтасига жойлаштирилган.

 Абитуриентлар ва уларнинг ота-оналарига таълим йўналиши бўйича маълумот ва тавсиялар бериш мақсадида қабул ҳайъати таркибида маслаҳатчи ва тиббий ходим фаолият кўрсатмоқда. Таълим муассасаларида таълим йўналиши ва билим юрти фаолияти тўғрисида  маълумотлар берувчи баннерлар тайёрланган. Шунингдек, Тошкент ислом институтида узоқ вилоятлардан келган абитуриентлар учун ётоқхона ҳам ташкил қилинган.

Эслатиб ўтамиз, 2015-2016 ўқув йили учун қабул жараёнлари ўрта махсус ислом билим юртларида жорий йилнинг 10 июлига қадар, Тошкент ислом институти эса 20 июлига қадар давом этади.

 Ўрта махсус ислом билим юртларида қабул имтиҳонлари жорий йилнинг 13 июль куни “Она тили” фани бўйича диктант, “Маънавият ва маърифат”, “Чет тили”, “Тарих” фанларидан тест синов шаклида ўтказилади. Тошкент ислом институтида 23-24 июль кунлари “Маънавият ва маърифат”, “Чет тили” фанидан ижодий имтиҳон, 1 август куни “Ўзбекистон тарихи” ва “Она тили ва адабиёти” фанлари бўйича тест синов шаклида бўлиб ўтади.

Шуни таъкидлаб ўтиш ўтиш жоизки, мазкур таълим муассасаларида замон талабларига мос равишда ишлаб чиқилган таълим стандарти ва ўқув режалари асосида диний ва дунёвий билимларни ўргатиш билан бир қаторда чет тилларини ўқитишга ҳам алоҳида эътибор қаратилган. Жумладан, ҳар бир курсда тасдиқланган ўқув дастурларига мувофиқ араб ва инглиз тиллари малакали мутахассислар томонидан ўқитилиб, талабаларнинг чет тилларида эркин сўзлашишида малака ва кўникмаларини шакллантириш мақсадида тил кунлари ва фан тўгараклари ташкил этилган.

Ўрта махсус ислом билим юртларини битирган ўғил болаларга “Диншунослик” йўналиши бўйича “Имом-хатиб”, “Бошланғич араб тили мураббийси”, аёл-қизларга “Бошланғич араб тили мураббийси”, “Диний маърифат ва маънавий-ахлоқий тарбия масалалари бўйича маслаҳатчиси” мутахассислиги берилади.

Тошкент ислом институтини битирган ўғил болаларга “Имом-хатиб”, “Диншунос”, “Араб тили ўқитувчиси”, аёл-қизларга “Диншунос”, “Араб тили ўқитувчиси” мутахассислиги берилади.

Мустақиллик йилларида Ўзбекистон мусулмонлари идораси тизимидаги диний таълим муассасаларини 7500 дан зиёд ёшлар битириб, жамиятимиздаги ижтимоий соҳанинг турли йўналишларида фаолият юритиб келмоқда.

* * *

O‘zbekiston musulmonlari idorasi tasarrufidagi Toshkent islom instituti va o‘rta maxsus islom bilim yurtlarida ham joriy yilning 20 iyunidan qabul jarayonlari boshlandi, deya xabar beradi Din ishlari bo‘yicha qo‘mita sayti.

Qabul jarayonlarini yuqori darajada tashkil etish, abiturientlarga qulay sharoitlar yaratish maqsadida barcha diniy ta’lim muassasalarida qabul jarayoniga oid Nizom va yo‘riqnomalar, qabul kvotasi, taqdim etilishi lozim bo‘lgan hujjatlar to‘g‘risida to‘liq ma’lumotlar, kirish imtihonlari o‘tkaziladigan fanlar va imtiholarni o‘tkazish tartibi, fanlar bo‘yicha o‘tkaziladigan maslahatlar jadvali hamda imtihon kunlarini aks ettiruvchi ma’lumotlar bannerlar va e’lonlar taxtasiga joylashtirilgan.

 Abiturientlar va ularning ota-onalariga ta’lim yo‘nalishi bo‘yicha ma’lumot va tavsiyalar berish maqsadida qabul hay’ati tarkibida maslahatchi va tibbiy xodim faoliyat ko‘rsatmoqda. Ta’lim muassasalarida ta’lim yo‘nalishi va bilim yurti faoliyati to‘g‘risida  ma’lumotlar beruvchi bannerlar tayyorlangan. Shuningdek, Toshkent islom institutida uzoq viloyatlardan kelgan abiturientlar uchun yotoqxona ham tashkil qilingan.

Eslatib o‘tamiz, 2015-2016 o‘quv yili uchun qabul jarayonlari o‘rta maxsus islom bilim yurtlarida joriy yilning 10 iyuliga qadar, Toshkent islom instituti esa 20 iyuliga qadar davom etadi.

 O‘rta maxsus islom bilim yurtlarida qabul imtihonlari joriy yilning 13 iyul kuni “Ona tili” fani bo‘yicha diktant, “Ma’naviyat va ma’rifat”, “Chet tili”, “Tarix” fanlaridan test sinov shaklida o‘tkaziladi. Toshkent islom institutida 23-24 iyul kunlari “Ma’naviyat va ma’rifat”, “Chet tili” fanidan ijodiy imtihon, 1 avgust kuni “O‘zbekiston tarixi” va “Ona tili va adabiyoti” fanlari bo‘yicha test sinov shaklida bo‘lib o‘tadi.

Shuni ta’kidlab o‘tish o‘tish joizki, mazkur ta’lim muassasalarida zamon talablariga mos ravishda ishlab chiqilgan ta’lim standarti va o‘quv rejalari asosida diniy va dunyoviy bilimlarni o‘rgatish bilan bir qatorda chet tillarini o‘qitishga ham alohida e’tibor qaratilgan. Jumladan, har bir kursda tasdiqlangan o‘quv dasturlariga muvofiq arab va ingliz tillari malakali mutaxassislar tomonidan o‘qitilib, talabalarning chet tillarida erkin so‘zlashishida malaka va ko‘nikmalarini shakllantirish maqsadida til kunlari va fan to‘garaklari tashkil etilgan.

O‘rta maxsus islom bilim yurtlarini bitirgan o‘g‘il bolalarga “Dinshunoslik” yo‘nalishi bo‘yicha “Imom-xatib”, “Boshlang‘ich arab tili murabbiysi”, ayol-qizlarga “Boshlang‘ich arab tili murabbiysi”, “Diniy ma’rifat va ma’naviy-axloqiy tarbiya masalalari bo‘yicha maslahatchisi” mutaxassisligi beriladi.

Toshkent islom institutini bitirgan o‘g‘il bolalarga “Imom-xatib”, “Dinshunos”, “Arab tili o‘qituvchisi”, ayol-qizlarga “Dinshunos”, “Arab tili o‘qituvchisi” mutaxassisligi beriladi.

Mustaqillik yillarida O‘zbekiston musulmonlari idorasi tizimidagi diniy ta’lim muassasalarini 7500 dan ziyod yoshlar bitirib, jamiyatimizdagi ijtimoiy sohaning turli yo‘nalishlarida faoliyat yuritib kelmoqda.

• Олдинги
• Кейинги