Рамазондаги Умра сафарига Ўзбекистондан 670 нафар зиёратчилар юборилади

Жорий йилнинг 6 июлидан 11 июль кунига қадар “Ўзбекистон ҳаво йўллари” миллий авиакомпаниясининг замонавий авиалайнерларида ўзбекистонлик зиёратчиларни Рамазон ойидаги умра сафарига юбориш режалаштирилган.

Бугунги кунда фуқароларимизнинг ҳужжатлари Саудия Арабистони Подшоҳлигининг Тошкентдаги элчихонасига виза расмийлаштириш учун тайёрланмоқда, дея хабар беради Дин ишлари бўйича қўмита сайти.

Саудия Арабистони Подшоҳлигида ҳавонинг аномал даражада исиб кетиши ҳамда зиёратга борувчи фуқароларимизнинг ҳоҳиш истакларини инобатга олиб, Рамазон мавсумида жами 670 нафар (зиёратчиларнинг асосий қисми 5496 нафари Баҳор мавсумида зиёратга борган) фуқаролар Тошкент–Жидда–Тошкент йўналиши бўйича 3 та чартер авиарейсида зиёратга борадилар.

Зиёратчиларга мавсум давомида ўзбекистонлик 2 нафар ишчи гуруҳи, 13 нафар гуруҳ раҳбари (элликбоши), 3 нафар шифокор ва 2 нафар ошпаз хизмат кўрсатади.

Зиёратчиларга сафардан олдин давлат рамзлари туширилган махсус кийим (камзул) ва сумкалар, “Умра” қўлланмаси ва видеойўриқномалар тақдим этилди.

Барча зиёратчилар марказлашган тиббий пунктларида менингит ва гриппга қарши зардоб билан эмландилар. Саудия Арабистонида ҳаво ҳароратининг юқори даражада бўлиши кузатилаётганлигини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма-тавсиялар ишлаб чиқилиб, тегишли тушунтириш ишлари олиб борилмоқда.

Ўзбекистонлик зиёратчилар истиқомат қилишлари учун Мадина шаҳрида “Масжиди набавий”дан 150 метр масофада жойлашган тўрт юлдузли “Фейруз ал-Хайр” меҳмонхонаси, Макка шаҳрида эса “Ҳарам масжиди”дан 1500-2000 метр узоқликда жойлашган “Совфат ал-Мийаъд” меҳмонхонаси тайёрлаб қўйилган.

Ўзбекистонлик зиёратчилар Мадина шаҳрида 3 кеча - 4 кундуз бўлиб, бу ердаги муқаддас қадамжоларни зиёрат қилгандан сўнг Макка шаҳрига йўл оладилар.

Меҳмонхонада зиёратчиларимиз саҳарлик ва ифторлик қилишлари учун ошхона, соғлиқларини доимий равишда назорат қилиб туриш мақсадида тиббиёт пункти ташкил этилган. Ҳар бир хонада телевизор, музлатгич, кондиционер ва бошқа зарур анжомлар билан таъминланган. Зиёратчиларимиз сунъий йўлдош орқали Ўзбекистон телевидениеси дастурларини томоша қилиш, Ватанимизда бўлаётган воқеалардан хабардор бўлиш имкониятлари яратилган.

Зиёратчиларни Саудия Арабистонида кутиб олиш, кузатиш ва уларга қулай шароитлар яратиш ишлари Ўзбекистон Республикаси Президентининг ПҚ-869 сон Қарори асосида Жиддадаги Бош консуллик таркибида жорий этилган “Ҳаж” ва “Умра” масалалари бўйича атташе билан ҳамкорликда ташкил этилади.

* * *

Joriy yilning 6 iyulidan 11 iyul kuniga qadar “O‘zbekiston havo yo‘llari” milliy aviakompaniyasining zamonaviy avialaynerlarida o‘zbekistonlik ziyoratchilarni Ramazon oyidagi umra safariga yuborish rejalashtirilgan.

Bugungi kunda fuqarolarimizning hujjatlari Saudiya Arabistoni Podshohligining Toshkentdagi elchixonasiga viza rasmiylashtirish uchun tayyorlanmoqda, deya xabar beradi Din ishlari bo‘yicha qo‘mita sayti.

Saudiya Arabistoni Podshohligida havoning anomal darajada isib ketishi hamda ziyoratga boruvchi fuqarolarimizning hohish istaklarini inobatga olib, Ramazon mavsumida jami 670 nafar (ziyoratchilarning asosiy qismi 5496 nafari Bahor mavsumida ziyoratga borgan) fuqarolar Toshkent–Jidda–Toshkent yo‘nalishi bo‘yicha 3 ta charter aviareysida ziyoratga boradilar.

Ziyoratchilarga mavsum davomida o‘zbekistonlik 2 nafar ishchi guruhi, 13 nafar guruh rahbari (ellikboshi), 3 nafar shifokor va 2 nafar oshpaz xizmat ko‘rsatadi.

Ziyoratchilarga safardan oldin davlat ramzlari tushirilgan maxsus kiyim (kamzul) va sumkalar, “Umra” qo‘llanmasi va videoyo‘riqnomalar taqdim etildi.

Barcha ziyoratchilar markazlashgan tibbiy punktlarida meningit va grippga qarshi zardob bilan emlandilar. Saudiya Arabistonida havo haroratining yuqori darajada bo‘lishi kuzatilayotganligini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma-tavsiyalar ishlab chiqilib, tegishli tushuntirish ishlari olib borilmoqda.

O‘zbekistonlik ziyoratchilar istiqomat qilishlari uchun Madina shahrida “Masjidi nabaviy”dan 150 metr masofada joylashgan to‘rt yulduzli “Feyruz al-Xayr” mehmonxonasi, Makka shahrida esa “Haram masjidi”dan 1500-2000 metr uzoqlikda joylashgan “Sovfat al-Miya’d” mehmonxonasi tayyorlab qo‘yilgan.

O‘zbekistonlik ziyoratchilar Madina shahrida 3 kecha - 4 kunduz bo‘lib, bu yerdagi muqaddas qadamjolarni ziyorat qilgandan so‘ng Makka shahriga yo‘l oladilar.

Mehmonxonada ziyoratchilarimiz saharlik va iftorlik qilishlari uchun oshxona, sog‘liqlarini doimiy ravishda nazorat qilib turish maqsadida tibbiyot punkti tashkil etilgan. Har bir xonada televizor, muzlatgich, konditsioner va boshqa zarur anjomlar bilan ta’minlangan. Ziyoratchilarimiz sun’iy yo‘ldosh orqali O‘zbekiston televideniesi dasturlarini tomosha qilish, Vatanimizda bo‘layotgan voqealardan xabardor bo‘lish imkoniyatlari yaratilgan.

Ziyoratchilarni Saudiya Arabistonida kutib olish, kuzatish va ularga qulay sharoitlar yaratish ishlari O‘zbekiston Respublikasi Prezidentining PQ-869 son Qarori asosida Jiddadagi Bosh konsullik tarkibida joriy etilgan “Haj” va “Umra” masalalari bo‘yicha attashe bilan hamkorlikda tashkil etiladi.

• Олдинги
• Кейинги