Ўзбек қорилари АҚШ ва Россияда таровиҳ намозларида хатми Қуръонни адо этмоқдалар

Рукн: Янгиликлар Чоп этилган: 24.06.2015

Бир неча йилдирки турли хорижий давлатларнинг Рамазон ойида мазкур муқаддас ой билан боғлиқ диний маросим ва ибодатларнини ўтказиб беришда амалий кўмак сифатида юртимиз қориларини сўраб мурожаат этишлари яхши анъанага айланди.

Ўтган йиллар давомида Америка Қўшма Штатлари, Россия Федерацияси ҳамда Украина давлатлари сўровига биноан қориларимиз мазкур давлатларда бўлиб, хатми Қуръон ва Рамазон ойидаги диний маросимларни ўтказишда ёрдам кўрсатиб қайтдилар, дея хабар беради Дин ишлари бўйича қўмита сайти.

 Бу йилги Рамазон ойида ўзбекистонлик Фаррух қори Худойбердиев АҚШнинг Нью-Жерси штати, Довер шаҳридаги ватандошларимиз билан рўзанинг беш куни мобайнида мазкур улуғ ойнинг фазилатлари, ота-онага меҳр ва уларга яхшилик қилиш, ҳалоллик, Ватан туйғуси, илм олиш, силаи-раҳм каби мавзуларда суҳбатлар ўтказиб, таровеҳ намозларида Қуръони каримни хатм қилмоқда.

Шу кунларда яна бир Қуръон хофизи Миродил қори Ҳайдаров ҳам Россия Федерациясининг Саратов вилоятидаги турли миллат вакилларидан иборат мусулмон қардошларимизга ўз ибодатларини амалга оширишда ёрдам бериб келмоқда.

Қориларимиз томонидан амалга оширилаётган таҳсинга сазовор мазкур савобли ишлардан илҳомланган Америкадаги Туркистонликлар жамияти раиси Абдулла Хўжа ва Россия Федерациясининг Саратов вилояти Бош муфтийси Муқаддас ҳазрат Бибарсовлар дунёга Имом Бухорий, Имом Термизий, Алишер Навоий ва бошқа жуда кўплаб мутафаккир олимларни берган ушбу муборак юрт авлодлари ҳали-ҳануз илм-маърифат, дин-диёнат зиёсини тарқатаётганликларини алоҳида мамнуният билан таъкидламоқдалар.

* * *

Bir necha yildirki turli xorijiy davlatlarning Ramazon oyida mazkur muqaddas oy bilan bog‘liq diniy marosim va ibodatlarnini o‘tkazib berishda amaliy ko‘mak sifatida yurtimiz qorilarini so‘rab murojaat etishlari yaxshi an’anaga aylandi.

O‘tgan yillar davomida Amerika Qo‘shma Shtatlari, Rossiya Federatsiyasi hamda Ukraina davlatlari so‘roviga binoan qorilarimiz mazkur davlatlarda bo‘lib, xatmi Qur’on va Ramazon oyidagi diniy marosimlarni o‘tkazishda yordam ko‘rsatib qaytdilar, deya xabar beradi Din ishlari bo‘yicha qo‘mita sayti.

 Bu yilgi Ramazon oyida o‘zbekistonlik Farrux qori Xudoyberdiev AQShning Nyu-Jersi shtati, Dover shahridagi vatandoshlarimiz bilan ro‘zaning besh kuni mobaynida mazkur ulug‘ oyning fazilatlari, ota-onaga mehr va ularga yaxshilik qilish, halollik, Vatan tuyg‘usi, ilm olish, silai-rahm kabi mavzularda suhbatlar o‘tkazib, taroveh namozlarida Qur’oni karimni xatm qilmoqda.

Shu kunlarda yana bir Qur’on xofizi Mirodil qori Haydarov ham Rossiya Federatsiyasining Saratov viloyatidagi turli millat vakillaridan iborat musulmon qardoshlarimizga o‘z ibodatlarini amalga oshirishda yordam berib kelmoqda.

Qorilarimiz tomonidan amalga oshirilayotgan tahsinga sazovor mazkur savobli ishlardan ilhomlangan Amerikadagi Turkistonliklar jamiyati raisi Abdulla Xo‘ja va Rossiya Federatsiyasining Saratov viloyati Bosh muftiysi Muqaddas hazrat Bibarsovlar dunyoga Imom Buxoriy, Imom Termiziy, Alisher Navoiy va boshqa juda ko‘plab mutafakkir olimlarni bergan ushbu muborak yurt avlodlari hali-hanuz ilm-ma’rifat, din-diyonat ziyosini tarqatayotganliklarini alohida mamnuniyat bilan ta’kidlamoqdalar.