2015 йилда Ўзбекистондан 5200 киши Ҳаж сафарига боради

Рукн: Янгиликлар Чоп этилган: 26.02.2015

Жорий йилнинг 17-24 февраль   кунлари Саудия Арабистони Подшоҳлиги Ҳаж ишлари вазирлиги таклифига биноан Дин ишлари бўйича қўмита раиси О.Юсупов, Ўзбекистон мусулмонлари идораси раиси, муфтий У.Алимов, идора матбуот котиби Ж.Нуриддинов ва Тошкент ислом университети халқаро алоқалар бўлими мудири Ҳ. Ҳасановдан иборат Ўзбекистон Ҳаж делегацияси мазкур давлатда хизмат сафарида бўлиб қайтди, деб хабар беради ЎМИ сайти.

Ўзбекистон Ҳаж делегацияси Саудия Арабистони Подшоҳлиги Ҳаж ишлари вазири доктор Бандар бин Муҳаммад Хажжар  билан учрашди.

19 февраль куни Макка шаҳрида умра амалларини бажараётган ўзбекистонлик зиёратчилар жойлашган “Сафватут-миъод” меҳмонхонасидаги шарт-шароитлар, озиқ-овқат ва транспорт таъминоти даражаси ўрганилди, зиёратчилар билан суҳбатлашилди.

21 феврал куни  Мадина шаҳрида умра ибодатларини амалга ошираётган ўзбекистонлик зиёратчиларнинг меҳмонхонадаги шарт-шароитлари билан танишилди.

23 февраль куни Ҳаж ишлари вазирлигининг Жидда шаҳридаги қароргоҳида 2015 йилги ҳаж мавсумини тартибли ўтказиш бўйича шартнома баённомаси имзоланди. Шартномада Ўзбекистондан келадиган ҳожиларнинг миқдори 5200 киши этиб белгиланди.

22 февраль куни Маккаи мукаррамада Бутун жаҳон халқаро ислом конференцияси ўз ишини бошлади. Унинг ишида Ўзбекистон мусулмонлари идораси раиси, муфтий У.Алимов, ЎМИ раиси ўринбосари, шайх А.Мансур иштирок этди.

Маълумки, ЎМИ раиси, муфтий У.Алимов 2012 йилдан Ислом Олами Уюшмаси  Таъсис Мажлиси, Бутун жаҳон мусулмон уламолари Кенгаши аъзосидир.

Шайх А.Мансур  Ислом Ҳамкорлик Ташкилоти ҳузуридаги Халқаро ислом фиқҳи Академияси ва Ислом уюшмаси ҳузуридаги Халқаро мусулмон уламолари ҳайъати аъзосидир.

* * *

Joriy yilning 17-24 fevral   kunlari Saudiya Arabistoni Podshohligi Haj ishlari vazirligi taklifiga binoan Din ishlari bo‘yicha qo‘mita raisi O.Yusupov, O‘zbekiston musulmonlari idorasi raisi, muftiy U.Alimov, idora matbuot kotibi J.Nuriddinov va Toshkent islom universiteti xalqaro aloqalar bo‘limi mudiri H. Hasanovdan iborat O‘zbekiston Haj delegatsiyasi mazkur davlatda xizmat safarida bo‘lib qaytdi, deb xabar beradi O‘MI sayti.

O‘zbekiston Haj delegatsiyasi Saudiya Arabistoni Podshohligi Haj ishlari vaziri doktor Bandar bin Muhammad Xajjar  bilan uchrashdi.

19 fevral kuni Makka shahrida umra amallarini bajarayotgan o‘zbekistonlik ziyoratchilar joylashgan “Safvatut-mi’od” mehmonxonasidagi shart-sharoitlar, oziq-ovqat va transport ta’minoti darajasi o‘rganildi, ziyoratchilar bilan suhbatlashildi.

21 fevral kuni  Madina shahrida umra ibodatlarini amalga oshirayotgan o‘zbekistonlik ziyoratchilarning mehmonxonadagi shart-sharoitlari bilan tanishildi.

23 fevral kuni Haj ishlari vazirligining Jidda shahridagi qarorgohida 2015 yilgi haj mavsumini tartibli o‘tkazish bo‘yicha shartnoma bayonnomasi imzolandi. Shartnomada O‘zbekistondan keladigan hojilarning miqdori 5200 kishi etib belgilandi.

22 fevral kuni Makkai mukarramada Butun jahon xalqaro islom konferentsiyasi o‘z ishini boshladi. Uning ishida O‘zbekiston musulmonlari idorasi raisi, muftiy U.Alimov, O‘MI raisi o‘rinbosari, shayx A.Mansur ishtirok etdi.

Ma’lumki, O‘MI raisi, muftiy U.Alimov 2012 yildan Islom Olami Uyushmasi  Ta’sis Majlisi, Butun jahon musulmon ulamolari Kengashi a’zosidir.

Shayx A.Mansur  Islom Hamkorlik Tashkiloti huzuridagi Xalqaro islom fiqhi Akademiyasi va Islom uyushmasi huzuridagi Xalqaro musulmon ulamolari hay’ati a’zosidir.