«Зиё» студиясидан Рамазон туҳфаси

Рукн: Янгиликлар Чоп этилган: 01.07.2013

Тошкент Ислом университетининг «Зиё» студияси бу йилги Рамазон ойида «Ўзбекистон» телерадиоканалида 15 та диний-маърифий мавзудаги кўрсатувни тақдим этади. Кўрсатувларда Республикамизнинг турли ҳудудларидаги диний олимлар, имом-хатиблар, давлат ва жамоат арбоблари, Тошкент Ислом университети талабалари иштирок этишади.

2013 йилги «Рамазон туҳфаси» кўрсатувларида «Ҳикматли Рамазон», «Меҳмондўстлик фазилатлари», «Волидам — ҳаёт чироғим», «Табаррук сиймо», «Ободлик меҳнат ила бўлур», «Дўстлик фазилатлари», «Яхши сўз жон озиғи», «Қўшничилик ҳақлари», «Маърифат билан қалблар мунаввар», «Ислом - бағрикенглик дини», «Бола гўзал – одоби ундан гўзал», «Абу Райҳон Беруний», «Буюклардан қолган битиклар», «Неъматлар шукри вожибдир», «Обод турмуш» мавзулари ёритилади.

Бу йилги дастурларда «Қуръон маънолари», «Ҳадислар гулдастаси», «Ривоятлар силсиласидан», «Зиё кўзгуси» янги рукнлари ўрин олган бўлиб, уларда кўрсатув мазмунига оид Қуръони карим оятлари уламолар томонидан шарҳланади, ҳадиси шарифларнинг арабча матни ва таржимаси университет талабалари томонидан тақдим этилади. Шунингдек  «Ривоятлар силсиласидан» рукнида қадимий ҳикоятлар, «Зиё кўзгуси»да замонавий ибратли воқеалар саҳналаштирилган. Ушбу телесаҳналарни Республика ёш томошабинлар театри актёрлари кўнгилли равишда ижро этганлар.

Рамазондан бошқа пайтларда «Зиё» студияси кўрсатувлари “Ўзбекистон” телерадиоканали орқали ойда икки марта ҳафтанинг жума кунлари «Эътиқод мустаҳкамлиги йўлида» рукни остида эфирга узатилади. Бугунги кунгача студияда 400 га яқин кўрсатув ва фильмлар тайёрланиб, эфирга узатилди. Студия томонидан тайёрланган видеомаҳсулотлардан аҳолининг турли қатламлари орасида олиб борилаётган тарғибот-ташвиқот ишларида ҳам кенг фойдаланиб келинмоқда.

Диний-маърифий йўналишдаги www.ziyo.uz сайтини ишга тушириш ва унда фойдали мақола ва маълумотларни жойлаб бориш ҳам студиянинг режаларидан биридир.

«Зиё» студияси директори, Ислом университети тадқиқотчиси Абдумалик Тўйчибоев, режиссёр Азиз Жўраев, телеоператор Дилшодбек Ишматбеков, муҳаррирлар Севара Нурмуҳамедова, Даврон Мақсудов, видеомуҳандислар Алишер Муҳаммадиев, Шоҳрух Ҳожибоев томонидан тақдим этиладиган маърифий кўрсатувлар юртдошларимиз учун Рамазонга муносиб совға бўлади деган умиддамиз.

* * *

Toshkent Islom universitetining «Ziyo» studiyasi bu yilgi Ramazon oyida «O‘zbekiston» teleradiokanalida 15 ta diniy-ma’rifiy mavzudagi ko‘rsatuvni taqdim etadi. Ko‘rsatuvlarda Respublikamizning turli hududlaridagi diniy olimlar, imom-xatiblar, davlat va jamoat arboblari, Toshkent Islom universiteti talabalari ishtirok etishadi.

2013 yilgi «Ramazon tuhfasi» ko‘rsatuvlarida «Hikmatli Ramazon», «Mehmondo‘stlik fazilatlari», «Volidam — hayot chirog‘im», «Tabarruk siymo», «Obodlik mehnat ila bo‘lur», «Do‘stlik fazilatlari», «Yaxshi so‘z jon ozig‘i», «Qo‘shnichilik haqlari», «Ma’rifat bilan qalblar munavvar», «Islom - bag‘rikenglik dini», «Bola go‘zal – odobi undan go‘zal», «Abu Rayhon Beruniy», «Buyuklardan qolgan bitiklar», «Ne’matlar shukri vojibdir», «Obod turmush» mavzulari yoritiladi.

Bu yilgi dasturlarda «Qur’on ma’nolari», «Hadislar guldastasi», «Rivoyatlar silsilasidan», «Ziyo ko‘zgusi» yangi ruknlari o‘rin olgan bo‘lib, ularda ko‘rsatuv mazmuniga oid Qur’oni karim oyatlari ulamolar tomonidan sharhlanadi, hadisi shariflarning arabcha matni va tarjimasi universitet talabalari tomonidan taqdim etiladi. Shuningdek  «Rivoyatlar silsilasidan» ruknida qadimiy hikoyatlar, «Ziyo ko‘zgusi»da zamonaviy ibratli voqealar sahnalashtirilgan. Ushbu telesahnalarni Respublika yosh tomoshabinlar teatri aktyorlari ko‘ngilli ravishda ijro etganlar.

Ramazondan boshqa paytlarda «Ziyo» studiyasi ko‘rsatuvlari “O‘zbekiston” teleradiokanali orqali oyda ikki marta haftaning juma kunlari «E’tiqod mustahkamligi yo‘lida» rukni ostida efirga uzatiladi. Bugungi kungacha studiyada 400 ga yaqin ko‘rsatuv va filmlar tayyorlanib, efirga uzatildi. Studiya tomonidan tayyorlangan videomahsulotlardan aholining turli qatlamlari orasida olib borilayotgan targ‘ibot-tashviqot ishlarida ham keng foydalanib kelinmoqda.

Diniy-ma’rifiy yo‘nalishdagi www.ziyo.uz saytini ishga tushirish va unda foydali maqola va ma’lumotlarni joylab borish ham studiyaning rejalaridan biridir.

«Ziyo» studiyasi direktori, Islom universiteti tadqiqotchisi Abdumalik To‘ychiboev, rejissyor Aziz Jo‘raev, teleoperator Dilshodbek Ishmatbekov, muharrirlar Sevara Nurmuhamedova, Davron Maqsudov, videomuhandislar Alisher Muhammadiev, Shohrux Hojiboev tomonidan taqdim etiladigan ma’rifiy ko‘rsatuvlar yurtdoshlarimiz uchun Ramazonga munosib sovg‘a bo‘ladi degan umiddamiz.