Ўзбекистонлик профессор ХХI аср даҳолари қаторидан жой олди

Рукн: Янгиликлар Чоп этилган: 19.12.2012

Америка Биография институти самарқандлик профессор, физика-математика фанлари доктори Неъмат Низомовни “Йил одами-2012” унвонига сазовор, деб топди.

73 ёшли профессор Неъмат Низомов Халқаро Биография маркази томонидан “Дунёнинг 100 та етакчи муҳандислари” рўйхатига ҳам киритилди. Шунингдек, жорий йилда профессор Низомовнинг номи “21 аср даҳолари” деб номланган китобдан ҳам жой олди.

2010 йилда Низомовнинг номи Американинг "Ким бу ким" (Who‘s Who in the World 2010) китобига киритилган.

Шунингдек, профессор Кембриж нашриётининг "21 асрнинг 2000 та атоқли интеллектуаллари" (2000 Outstanding Intellectuals of the 21st century) китобига ҳам киритилди.

Профессор Низомов Марказий Осиёда ягона ҳисобланган Молекуляр люминестценция ва фотохимия лабораторияси мудири ҳисобланади. 300 дан зиёд илмий-педагогик ишлар муаллифи бўлган профессор Низомов ўнлаб кашфиётлар муаллифи ҳамдир.

Унинг кумуш ўрнини босадиган модда, ғалла вирусига қарши кашфиёти, пахта ёғининг сифатини аниқлаш индикатори каби ихтиролари машҳур. Шунингдек, профессор болгариялик олимлар билан биргаликда рак касаллиги бўйича илмий изланишлар олиб бормоқда.

* * *

Amerika Biografiya instituti samarqandlik professor, fizika-matematika fanlari doktori Ne’mat Nizomovni “Yil odami-2012” unvoniga sazovor, deb topdi.

73 yoshli professor Ne’mat Nizomov Xalqaro Biografiya markazi tomonidan “Dunyoning 100 ta yetakchi muhandislari” ro‘yxatiga ham kiritildi. Shuningdek, joriy yilda professor Nizomovning nomi “XXI asr daholari” deb nomlangan kitobdan ham joy oldi.

2010 yilda Nizomovning nomi Amerikaning "Kim bu kim" (Who‘s Who in the World 2010) kitobiga kiritilgan.

Shuningdek, professor Kembrij nashriyotining "21 asrning 2000 ta atoqli intellektuallari" (2000 Outstanding Intellectuals of the 21st century) kitobiga ham kiritildi.

Professor Nizomov Markaziy Osiyoda yagona hisoblangan Molekulyar lyuminestsentsiya va fotoximiya laboratoriyasi mudiri hisoblanadi. 300 dan ziyod ilmiy-pedagogik ishlar muallifi bo‘lgan professor Nizomov o‘nlab kashfiyotlar muallifi hamdir.

Uning kumush o‘rnini bosadigan modda, g’alla virusiga qarshi kashfiyoti, paxta yog‘ining sifatini aniqlash indikatori kabi ixtirolari mashhur. Shuningdek, professor bolgariyalik olimlar bilan birgalikda rak kasalligi bo‘yicha ilmiy izlanishlar olib bormoqda.