Юртимизда хатми Қуръонлар ниҳоясига етмоқда

Юртимизда рамазон ойининг безаги бўлмиш таровеҳ намозларида Қуръони каримни хатм қилиш яхши анъанага айланган. Илоҳий каломни тўлиқ йод олган ҳофиз ёшларнинг йилдан-йилга кўпайиб бориши билан хатм ўзказиладиган масжидлар сафи ҳам кенгайиб бормоқда. Жорий йилги рамазон ойида диёримизнинг қарийб барча масжидларида намозхонлар хушовоз ва гўзал тажвид билан қироат қилинган Аллоҳнинг каломига сомеъ бўлдилар. Айниқса, хатмнинг якунида масжидга илоҳий файзу футуҳ ёғилади, ундан баҳраманд бўлишни истаган аҳли мўмин масжидларни тўлдирадилар. Куни кеча ана шундай раҳмат нурларидан мунаввар бўлган яна бир маскан – Тошкент шаҳридаги “Юнусобод-Оқтепа” масжидида бўлдик. Масжид имом-хатиби Муҳаммадзафар Аҳмаджонов ўзи каломуллоҳни тўлиқ кўтарган қори бўлгани учун намозхонларга қулайлик яратиш мақсадида ҳар кунги таровеҳ намозида бир порадан ўқиб берди. У Қуръони карим оятларини шошилмай, равон тиловат қилар экан, намозхонларни ўзгача сокинлик, ажиб бир ҳаловат руҳи чулғаб олар эди. Муҳаммадзафар Аҳмаджонов айни пайтда Тошкент ислом институтининг олди ўқитувчиларидан бири. Унинг тажвид қоидаларини мукаммал ўзлаштиргани талабаларга қироат фанидан таълим беришида жуда қўл келмоқда.

Масжидга ташриф буюрган Ўзбекистон мусулмонлари идораси раиси ўринбосари Абдураззоқ Юнус намозхонларни хатмона якуни билан қутлаб, бу муборак кунларни қадрига етишга, унинг фазилатидан имкон қадар кўпроқ фойдаланиб қолишга чақирди.
Кенг ва ёруғ масжидда истироҳат намозини (таровеҳнинг ана шундай маънони беради) хатми Қуръон якуни билан ўтказаётган намозхонларнинг дилларидан шундай кунларга етказгани учун Яратганга ҳамду санолар тўкилаётгани шубҳасиз эди. Зеро намоз сўнггида қилинган дуо ва илтижолар ҳам диллардаги ўша покиза тилакларга ҳамоҳанг бўлди. Бу каби муборак кечаларда қалб ва тил бирлигидаги мусаффо тилаклар ижобат бўлгай, иншааллоҳ!

Шу куни пойтахтимиздаги яна бир файзли маскан “Ҳофиз Кўҳакий” жомеъ масжидида ҳам хатмона якунланди. Масжидга етиб келагинимизда ёш қори, Тошкент ислом институтининг биринчи курс талабаси Жасурбек Қулбоэв хатмда қироат қилар, масжид ичи ва ҳовлиси эса игна ташласанг ерга тушмайдиган даражада намозхонлар билан тўла эди. Масжидга сиғмаган яна юздан орти киши ташқарида ўтирган кўйи илоҳий каломга қулоқ тутарди. Қуръони каримни жуда ёшлигидаёқ йод олган Жасурбек қорининг ёниқ оҳангдаги тиловати тўғридан-тўғри дилларга хитоб қиларди. Намозхонлардан бирининг мамнун ҳолдаги сўзларига қулоқ тутамиз: “Бу йилги таровеҳда қоридан ёлчидик. Жасурбек қори ҳар куни мана шундай тарзда, бир порадан ўқиб беради. Бу айниқса менга ўхшаб кун бўйи ишда бўладиган одамларга жуда маъқул тушмоқда. Қори бола умридан барака топсин, уни мана шундай тарбиялаган ота-онасию устозларига раҳмат!”
Масжидга ташриф буюрган Тошкент қориларининг устози, саксон беш ёшли Яҳё қори домла хатмонанинг охирги сураларини табаррукан ўқиб берди, намоз сўнггида эса рамазон ва хатми Қуръон шарофатидан элу юрт тинч, халқимиз фаровон бўлишини сўраб дуолар қилди. Умрини илоҳий каломни кенг ёйиш ва қори етиштириш билан ўтказган мўйсафид қори домланинг дуою илтижоларига барча намозхонлар чин дилдан “омин”, деб турардилар.

Нуъмон Отабоев.
Суратларни Ҳамдам Шораҳмедов олган.

* * *

Yurtimizda ramazon oyining bezagi bo‘lmish taroveh namozlarida Qur’oni karimni xatm qilish yaxshi an’anaga aylangan. Ilohiy kalomni to‘liq yod olgan hofiz yoshlarning yildan-yilga ko‘payib borishi bilan xatm o‘zkaziladigan masjidlar safi ham kengayib bormoqda. Joriy yilgi ramazon oyida diyorimizning qariyb barcha masjidlarida namozxonlar xushovoz va go‘zal tajvid bilan qiroat qilingan Allohning kalomiga some’ bo‘ldilar. Ayniqsa, xatmning yakunida masjidga ilohiy fayzu futuh yog‘iladi, undan bahramand bo‘lishni istagan ahli mo‘min masjidlarni to‘ldiradilar. Kuni kecha ana shunday rahmat nurlaridan munavvar bo‘lgan yana bir maskan – Toshkent shahridagi “Yunusobod-Oqtepa” masjidida bo‘ldik. Masjid imom-xatibi Muhammadzafar Ahmadjonov o‘zi kalomullohni to‘liq ko‘targan qori bo‘lgani uchun namozxonlarga qulaylik yaratish maqsadida har kungi taroveh namozida bir poradan o‘qib berdi. U Qur’oni karim oyatlarini shoshilmay, ravon tilovat qilar ekan, namozxonlarni o‘zgacha sokinlik, ajib bir halovat ruhi chulg‘ab olar edi. Muhammadzafar Ahmadjonov ayni paytda Toshkent islom institutining oldi o‘qituvchilaridan biri. Uning tajvid qoidalarini mukammal o‘zlashtirgani talabalarga qiroat fanidan ta’lim berishida juda qo‘l kelmoqda.

Masjidga tashrif buyurgan O’zbekiston musulmonlari idorasi raisi o‘rinbosari Abdurazzoq Yunus namozxonlarni xatmona yakuni bilan qutlab, bu muborak kunlarni qadriga yetishga, uning fazilatidan imkon qadar ko‘proq foydalanib qolishga chaqirdi.
Keng va yorug‘ masjidda istirohat namozini (tarovehning ana shunday ma’noni beradi) xatmi Qur’on yakuni bilan o‘tkazayotgan namozxonlarning dillaridan shunday kunlarga yetkazgani uchun Yaratganga hamdu sanolar to‘kilayotgani shubhasiz edi. Zero namoz so‘nggida qilingan duo va iltijolar ham dillardagi o‘sha pokiza tilaklarga hamohang bo‘ldi. Bu kabi muborak kechalarda qalb va til birligidagi musaffo tilaklar ijobat bo‘lgay, inshaalloh!

Shu kuni poytaxtimizdagi yana bir fayzli maskan “Hofiz Ko‘hakiy” jome’ masjidida ham xatmona yakunlandi. Masjidga yetib kelaginimizda yosh qori, Toshkent islom institutining birinchi kurs talabasi Jasurbek Qulboev xatmda qiroat qilar, masjid ichi va hovlisi esa igna tashlasang yerga tushmaydigan darajada namozxonlar bilan to‘la edi. Masjidga sig‘magan yana yuzdan orti kishi tashqarida o‘tirgan ko‘yi ilohiy kalomga quloq tutardi. Qur’oni karimni juda yoshligidayoq yod olgan Jasurbek qorining yoniq ohangdagi tilovati to‘g‘ridan-to‘g‘ri dillarga xitob qilardi. Namozxonlardan birining mamnun holdagi so‘zlariga quloq tutamiz: “Bu yilgi tarovehda qoridan yolchidik. Jasurbek qori har kuni mana shunday tarzda, bir poradan o‘qib beradi. Bu ayniqsa menga o‘xshab kun bo‘yi ishda bo‘ladigan odamlarga juda ma’qul tushmoqda. Qori bola umridan baraka topsin, uni mana shunday tarbiyalagan ota-onasiyu ustozlariga rahmat!”
Masjidga tashrif buyurgan Toshkent qorilarining ustozi, sakson besh yoshli Yahyo qori domla xatmonaning oxirgi suralarini tabarrukan o‘qib berdi, namoz so‘nggida esa ramazon va xatmi Qur’on sharofatidan elu yurt tinch, xalqimiz farovon bo‘lishini so‘rab duolar qildi. Umrini ilohiy kalomni keng yoyish va qori yetishtirish bilan o‘tkazgan mo‘ysafid qori domlaning duoyu iltijolariga barcha namozxonlar chin dildan “omin”, deb turardilar.

Nu’mon Otaboyev.
Suratlarni Hamdam Shorahmedov olgan.

• Олдинги
• Кейинги