Америкалик ўзбеклар ифторликда йиғилишди

Туркистон-Америка Ассоциацияси томонидан АҚШнинг Нью Жерси штатида ватандошларимиз учун ифторлик дастурхони ёзилди. Ифторлик зиёфатига узоқ-яқиндан ватандошларимиз ташриф буюришди. Меҳмонларга миллий таомимиз бўлмиш ош тортилди.

Туркистон-Америка Ассоциацияси нодавлат-нотижорат маданий ташкилоти собиқ Иттифоқ даврида ватандан чиқиб, Америкага келиб қолган туркистонликлар томонидан 1958 йилда ташкил этилган. Ташкилотнинг асосий мақсади турли маданий тадбирлар ўтказиш орқали АҚШдаги туркистонликларнинг ўзаро алоқаларини мустаҳкамлаб, уларнинг бирдамлигини, жипслигини таъминлашдир.

Ассоциация ҳар йили шу мақсадда динимизни, она тилимизни сақлаш, урф-одатларимиз ва маданиятимизни асраб-авайлаш ва ривожлантириш доирасида турли маданий тадбирлар ўтказиб келади. Ассоциация ўз бағрига Америкада истиқомат қилувчи минглаб ўзбек оилаларини жамлаган. Ташкилотга ота-онаси асли марғилонлик бўлган Абдулла Хўжа раҳбарлик қилади.

АҚШда бугунги кунда 20 мингдан ортиқ этник америкалик ўзбеклар истиқомат қилишади. Уларнинг аксарияти бундан 30-40 йил илгари Осиё ва Европадан кўчиб ўтишган.

* * *

Turkiston-Amerika Assotsiatsiyasi tomonidan AQShning Nyu Jersi shtatida vatandoshlarimiz uchun iftorlik dasturxoni yozildi. Iftorlik ziyofatiga uzoq-yaqindan vatandoshlarimiz tashrif buyurishdi. Mehmonlarga milliy taomimiz bo‘lmish osh tortildi.

Turkiston-Amerika Assotsiatsiyasi nodavlat-notijorat madaniy tashkiloti sobiq Ittifoq davrida vatandan chiqib, Amerikaga kelib qolgan turkistonliklar tomonidan 1958 yilda tashkil etilgan. Tashkilotning asosiy maqsadi turli madaniy tadbirlar o‘tkazish orqali AQShdagi turkistonliklarning o‘zaro aloqalarini mustahkamlab, ularning birdamligini, jipsligini ta’minlashdir.

Assotsiatsiya har yili shu maqsadda dinimizni, ona tilimizni saqlash, urf-odatlarimiz va madaniyatimizni asrab-avaylash va rivojlantirish doirasida turli madaniy tadbirlar o‘tkazib keladi. Assotsiatsiya o‘z bag‘riga Amerikada istiqomat qiluvchi minglab o‘zbek oilalarini jamlagan. Tashkilotga ota-onasi asli marg‘ilonlik bo‘lgan Abdulla Xo‘ja rahbarlik qiladi.

AQShda bugungi kunda 20 mingdan ortiq etnik amerikalik o‘zbeklar istiqomat qilishadi. Ularning aksariyati bundan 30-40 yil ilgari Osiyo va Yevropadan ko‘chib o‘tishgan.

• Олдинги
• Кейинги