168 нафар зиёратчиларимиз Умра сафарига жўнаб кетишди

6 июль куни ўзбекистонлик зиёратчиларнинг дастлабки 168 нафардан иборат гуруҳи “Ўзбекистон ҳаво йўллари” МАКнинг замонавий авиалайнерида Саудия Арабистони Подшоҳлигига Рамазон мавсумида умра амалларини бажариш учун учиб кетдилар. Рамазон мавсумида 670 нафар зиёратчиларни умра сафарига юбориш режалаштирилган, дея хабар беради Дин ишлари бўйича қўмита матбуот хизмати.

Сафарга чиқишдан олдин барча зиёратчилар марказлашган тиббий пунктларда мененгит ва гриппга қарши зардоб билан эмландилар. Саудия Арабистонида ҳаво ҳароратининг юқори даражада бўлишини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма ва тавсиялар ишлаб чиқилиб, тегишли тушунтириш ишлари олиб борилди.

Рамазон мавсумида зиёрат 10 кунни ташкил этади. Зиёратчилар Мадина шаҳрида 3 кун, Маккада эса 7 кун бўладилар. Зиёратчиларга мавсум давомида ўзбекистонлик 2 нафар ишчи гуруҳи, 3 нафар шифокор ва 2 нафар ошпаз хизмат кўрсатади.

Ўзбекистонлик зиёратчилар истиқомат қилишлари учун Мадина шаҳрида “Масжиди набавий”дан 100-150 метр масофада жойлашган тўрт юлдузли “Фейрузатул Хайр” меҳмонхонаси, Макка шаҳрида эса “Харам масжиди”дан 1500-2000 метр узоқликдаги “Совфатал Мийаъд” меҳмонхонаси тайёрлаб қўйилган.

Меҳмонхоналарда зиёратчиларимизнинг саҳарлик ва ифторлик қилишлари учун ошхона ҳамда уларнинг соғлиқларини доимий назорат қилиш мақсадида минишифохоналар фаолияти ташкил этилган.

Шунингдек, зиёратчилар учун меҳмонхоналарда сунъий йўлдош орқали Ўзбекистон телевидениеси дастурларини томоша қилиш, Ватанимизда бўлаётган воқеалардан хабардор бўлиш имкониятлари яратилган.

Зиёратчиларни Саудия Арабистони Подшоҳлигида кутиб олиш, кузатиш ва уларга қулай шарт-шароитлар яратиш ишлари Дин ишлари бўйича қўмита ва Ўзбекистон мусулмонлари идораси ишчи гуруҳи томонидан “Ҳаж” ва “Умра” масалалари бўйича атташе ҳамкорлигида ташкил этилади.

* * *

6 iyul kuni o‘zbekistonlik ziyoratchilarning dastlabki 168 nafardan iborat guruhi “O‘zbekiston havo yo‘llari” MAKning zamonaviy avialaynerida Saudiya Arabistoni Podshohligiga Ramazon mavsumida umra amallarini bajarish uchun uchib ketdilar. Ramazon mavsumida 670 nafar ziyoratchilarni umra safariga yuborish rejalashtirilgan, deya xabar beradi Din ishlari bo‘yicha qo‘mita matbuot xizmati.

Safarga chiqishdan oldin barcha ziyoratchilar markazlashgan tibbiy punktlarda menengit va grippga qarshi zardob bilan emlandilar. Saudiya Arabistonida havo haroratining yuqori darajada bo‘lishini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma va tavsiyalar ishlab chiqilib, tegishli tushuntirish ishlari olib borildi.

Ramazon mavsumida ziyorat 10 kunni tashkil etadi. Ziyoratchilar Madina shahrida 3 kun, Makkada esa 7 kun bo‘ladilar. Ziyoratchilarga mavsum davomida o‘zbekistonlik 2 nafar ishchi guruhi, 3 nafar shifokor va 2 nafar oshpaz xizmat ko‘rsatadi.

O‘zbekistonlik ziyoratchilar istiqomat qilishlari uchun Madina shahrida “Masjidi nabaviy”dan 100-150 metr masofada joylashgan to‘rt yulduzli “Feyruzatul Xayr” mehmonxonasi, Makka shahrida esa “Xaram masjidi”dan 1500-2000 metr uzoqlikdagi “Sovfatal Miya’d” mehmonxonasi tayyorlab qo‘yilgan.

Mehmonxonalarda ziyoratchilarimizning saharlik va iftorlik qilishlari uchun oshxona hamda ularning sog‘liqlarini doimiy nazorat qilish maqsadida minishifoxonalar faoliyati tashkil etilgan.

Shuningdek, ziyoratchilar uchun mehmonxonalarda sun’iy yo‘ldosh orqali O‘zbekiston televideniesi dasturlarini tomosha qilish, Vatanimizda bo‘layotgan voqealardan xabardor bo‘lish imkoniyatlari yaratilgan.

Ziyoratchilarni Saudiya Arabistoni Podshohligida kutib olish, kuzatish va ularga qulay shart-sharoitlar yaratish ishlari Din ishlari bo‘yicha qo‘mita va O‘zbekiston musulmonlari idorasi ishchi guruhi tomonidan “Haj” va “Umra” masalalari bo‘yicha attashe hamkorligida tashkil etiladi.

• Олдинги
• Кейинги