Амир Темур қурдирган масжид

Рукн: Янгиликлар Чоп этилган: 01.10.2014

Тошкент шаҳридаги Юнусобод даҳасида жойлашган “Ҳасанбой” жоме масжидида  тўлиқ қайта таъмирлаш ишлари ниҳоясига етди. Масжид биноси асососан ҳашар йўли билан ва ҳомийлар кўмагида тикланди. Ҳудудга ажратилган умумий ер майдони 2910 квадрат метрни ташкил қилади. Хонақоҳ бир вақтда икки минг нафар намозхонни ўз бағрига олади.  Гумбаз баландлиги 17 метр.

Намозхонларга қулай ва осон бўлиши учун масжидда айвон, намоз ўқиш учун қўшимча ва маъмурий бинолар, шинам ва шарқона услубда барпо этилган шийпонлар мавжуд. Масжидда кутубхона ҳам фаолият олиб бормоқда. Замонавий услубда қурилган таҳоратхона ҳам намозхонлар хизматида.

Тарихий маълумотларга кўра, ушбу масжид  Амир Темур даврида  қурилган. 1390 йили  Амир Темур Тошкент қалъаси ва унинг атрофини обод этиш баробарида  ушбу масжидни тиклашга ҳам амр этган. Ўша вақтларда бу жоме “Оқ масжид” деб аталган. Кейинчалик бу ерлар “Ҳасанбой”, дейилиб, масжид ҳам мазкур ҳудуд номини олган. 1917 йили масжид ёпилиб, 1929 йилда хонақоҳ колхоз ихтиёрига берилади. Мустақилликдан сўнг жомеъ масжиди яна ўз фаолиятини бошлайди.

* * *

Toshkent shahridagi Yunusobod dahasida joylashgan “Hasanboy” jome masjidida  to‘liq qayta ta’mirlash ishlari nihoyasiga yetdi. Masjid binosi asososan hashar yo‘li bilan va homiylar ko‘magida tiklandi. Hududga ajratilgan umumiy yer maydoni 2910 kvadrat metrni tashkil qiladi. Xonaqoh bir vaqtda ikki ming nafar namozxonni o‘z bag‘riga oladi.  Gumbaz balandligi 17 metr.

Namozxonlarga qulay va oson bo‘lishi uchun masjidda ayvon, namoz o‘qish uchun qo‘shimcha va ma’muriy binolar, shinam va sharqona uslubda barpo etilgan shiyponlar mavjud. Masjidda kutubxona ham faoliyat olib bormoqda. Zamonaviy uslubda qurilgan tahoratxona ham namozxonlar xizmatida.

Tarixiy ma’lumotlarga ko‘ra, ushbu masjid  Amir Temur davrida  qurilgan. 1390 yili  Amir Temur Toshkent qal’asi va uning atrofini obod etish barobarida  ushbu masjidni tiklashga ham amr etgan. O‘sha vaqtlarda bu jome “Oq masjid” deb atalgan. Keyinchalik bu yerlar “Hasanboy”, deyilib, masjid ham mazkur hudud nomini olgan. 1917 yili masjid yopilib, 1929 yilda xonaqoh kolxoz ixtiyoriga beriladi. Mustaqillikdan so‘ng jome’ masjidi yana o‘z faoliyatini boshlaydi.