Ўзбекистонда Қурбон ҳайити 4 октябрда нишонланади

Ўзбекистон Республикаси Президентининг Қарорига кўра, муборак Қурбон ҳайитининг халқимиз маънавий ҳаётидаги ўрни ва аҳамиятини эътиборга олиб, миллий-диний қадриятларимизни сақлаш ва улуғлаш мақсадида ҳамда Ўзбекистон Республикаси Президентининг “Диний байрам – Қурбон ҳайитини дам олиш куни деб эълон қилиш ҳақида”ги 1991 йил 20 июндаги ПФ-221-сон Фармонига мувофиқ Ўзбекистон мусулмонлари идорасининг жорий йилда Қурбон ҳайитининг биринчи куни 4 октябрь шанба кунига тўғри келиши ҳақидаги мурожаатини инобатга олиб, 2014 йил 4 октябрь дам олиш куни деб белгиланди.

Қарорга кўра, Республика “Нуроний”, “Маҳалла” жамғармалари ва бошқа барча мутасадди идора, жамоат ташкилотлари Қурбон ҳайитининг жойларда тартибли ва юқори даражада, халқимизнинг миллий қадриятларига мос равишда ўтиши учун тегишли тадбирларни амалга ошириши, Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига Қурбон ҳайитини нишонлаш билан боғлиқ тадбирларни кенг ёритиш тавсия этилди.

Саудия Арабистони Олий маҳкамаси мелодий 2014 йилнинг 25 сентябрь куни ҳижрий 1435 йил Зулҳижжа ойининг биринчи кунига тўғри келишини эълон қилди. Ҳожиларнинг Арафот водийсида туришлари 3 октябрга, Қурбон ҳайитининг биринчи куни  эса 4 октябрга тўғри келади.

O‘zbekiston Respublikasi Prezidentining Qaroriga ko‘ra, muborak Qurbon hayitining xalqimiz ma’naviy hayotidagi o‘rni va ahamiyatini e’tiborga olib, milliy-diniy qadriyatlarimizni saqlash va ulug‘lash maqsadida hamda O‘zbekiston Respublikasi Prezidentining “Diniy bayram – Qurbon hayitini dam olish kuni deb e’lon qilish haqida”gi 1991 yil 20 iyundagi PF-221-son Farmoniga muvofiq O‘zbekiston musulmonlari idorasining joriy yilda Qurbon hayitining birinchi kuni 4 oktyabr shanba kuniga to‘g‘ri kelishi haqidagi murojaatini inobatga olib, 2014 yil 4 oktyabr dam olish kuni deb belgilandi.

Qarorga ko‘ra, Respublika “Nuroniy”, “Mahalla” jamg‘armalari va boshqa barcha mutasaddi idora, jamoat tashkilotlari Qurbon hayitining joylarda tartibli va yuqori darajada, xalqimizning milliy qadriyatlariga mos ravishda o‘tishi uchun tegishli tadbirlarni amalga oshirishi, O‘zbekiston Milliy teleradiokompaniyasi, O‘zbekiston Milliy axborot agentligi va boshqa ommaviy axborot vositalariga Qurbon hayitini nishonlash bilan bog‘liq tadbirlarni keng yoritish tavsiya etildi.

Saudiya Arabistoni Oliy mahkamasi melodiy 2014 yilning 25 sentyabr kuni hijriy 1435 yil Zulhijja oyining birinchi kuniga to‘g‘ri kelishini e’lon qildi. Hojilarning Arafot vodiysida turishlari 3 oktyabrga, Qurbon hayitining birinchi kuni  esa 4 oktyabrga to‘g‘ri keladi.

• Олдинги
• Кейинги